បរទេស៖ រូបិយប័ណ្ណគ្រីបតូ (Cryptocurrency) Binance កាលពីថ្ងៃព្រហស្បតិ៍ បានបញ្ជាក់ថា ខ្លួនបានរងគ្រោះដោយការលួចចូលប្រព័ន្ធ (Hack) ដ៏ធំមួយ ដែលប៉ះពាល់ដល់ទឹកប្រាក់ប្រមាណ ៦,៣ ពាន់លានដុល្លារអាមេរិក (៥,៥ ពាន់លានអឺរ៉ូ) ក្នុងនោះប្រហែលពាក់កណ្តាលនៃចំនួននេះ ត្រូវបានបង្កកដើម្បីទប់ស្កាត់ការលួចយកទ្រង់ទ្រាយធំ នេះបើយោងតាមការចេញផ្សាយពីសារព័ត៌មាន EuroNews ថ្ងៃទី៣០ ខែតុលា ឆ្នាំ២០២៦ ។
ក្រុមហ៊ុនជួញដូរគ្រីបតូដ៏ធំបំផុតរបស់ពិភពលោកមួយនេះ បានបង្ហោះសារជាបន្តបន្ទាប់នៅលើបណ្តាញសង្គម X ដែលមានលក្ខណៈផ្ទុយគ្នាបន្តិចបន្តួច ដោយដំបូងបានអះអាងថា "មូលនិធិរបស់អ្នកប្រើប្រាស់មានសុវត្ថិភាពទាំងស្រុង" ប៉ុន្តែក្នុងពេលជាមួយគ្នានេះ ក៏បានបញ្ជាក់ថាខ្លួននឹង "រ៉ាប់រងរាល់ការខាតបង់ទាំងអស់"។
ក្រោយមក គណនី X របស់ Binance ប្រចាំតំបន់អាមេរិកឡាទីន បានគូសបញ្ជាក់បន្ថែមថា៖ "ផលប៉ះពាល់សរុបត្រូវបានប៉ាន់ប្រមាណថាមានចំនួនប្រហែល ៦,៣ ពាន់លានដុល្លារ។ យើងបានធ្វើការយ៉ាងជិតស្និទ្ធជាមួយដៃគូប្លុកឆេន (Blockchain) ដើម្បីបង្កកទ្រព្យសកម្មដែលរងផលប៉ះពាល់ ដោយរហូតមកដល់ពេលនេះ ទឹកប្រាក់ប្រមាណ ៣ ពាន់លានដុល្លារ ត្រូវបានបង្កកដោយជោគជ័យនៅលើប្រព័ន្ធ (On-chain)"។
ទំហំនៃការវាយប្រហារនេះ មានចំនួនច្រើនជាង ៤ដង បើធៀបនឹងកំណត់ត្រានៃការវាយប្រហារតាមអ៊ីនធឺណិតដ៏ធំបំផុតកាលពីខែកុម្ភៈ ឆ្នាំ២០២៥ លើផ្លាតហ្វម Bybit ដែលមានទំហំ ១,៥ ពាន់លានដុល្លារ។ ក្រុមហ៊ុនស៊ើបអង្កេតប្រព័ន្ធប្លុកឆេន TRM Labs បានលើកឡើងកាលពីថ្ងៃព្រហស្បតិ៍ ដោយមាន "ទំនុកចិត្តខ្ពស់" ថា ការវាយប្រហារលើ Binance នេះ ត្រូវបានរៀបចំឡើងដោយក្រុមហកឃ័រ (Hackers) ឈ្មោះ TraderTraitor ដែលមានទំនាក់ទំនងនឹងទីក្រុងព្យុងយ៉ាង ប្រទេសកូរ៉េខាងជើង។ ក្រុមនេះត្រូវបានគេជឿថាជាផ្នែកមួយនៃក្រុម Lazarus Group ដែលល្បីល្បាញកាលពីឆ្នាំ២០១៤ ក្នុងការលួចចូលប្រព័ន្ធក្រុមហ៊ុន Sony Pictures។
ចំពោះវិធានការឆ្លើយតប កាលពីព្រឹកថ្ងៃសុក្រ Binance បានប្រកាសផ្អាកការដាក់និងដកប្រាក់ទាំងអស់ជាបណ្តោះអាសន្ន ដើម្បីឱ្យក្រុមការងារធ្វើការត្រួតពិនិត្យសុវត្ថិភាព បង្កកមូលនិធិបន្ថែម និងសហការជាមួយអាជ្ញាធរអនុវត្តច្បាប់។
យោងតាមការស៊ើបអង្កេតបឋម ការវាយលុកនេះមានការពាក់ព័ន្ធនឹងកុំព្យូទ័រយួរដៃរបស់ "វិស្វករផ្នែក DevOps" ម្នាក់ ដែលត្រូវបានគេលួចជ្រៀតចូល ធ្វើឱ្យជនខិលខូចអាចចូលទៅកាន់ "Service container" និងធ្វើប្រតិបត្តិការដកប្រាក់ដោយគ្មានការអនុញ្ញាត។ ទោះជាយ៉ាងណា Binance បានសង្កត់ធ្ងន់ថា គ្មានភស្តុតាងណាមួយបង្ហាញពីការបែកធ្លាយកូនសោឯកជន (Private keys) ពីកាបូបលុយអេឡិចត្រូនិក (Wallets) នោះទេ។
ជុំវិញព្រឹត្តិការណ៍នេះ ក្រុមហ៊ុនបោះផ្សាយរូបិយប័ណ្ណគ្រីបតូ (Stablecoins) ធំៗ ក៏បានចូលរួមអន្តរាគមន៍ទប់ស្កាត់ផងដែរ។ លោក Paolo Ardoino នាយកប្រតិបត្តិក្រុមហ៊ុន Tether ដែលគ្រប់គ្រង USDT បានឱ្យដឹងថា ក្រុមហ៊ុនលោកបានបង្កកទឹកប្រាក់ប្រមាណ ១,៦ ពាន់លានដុល្លារ។ ចំណែកលោក Jeremy Allaire ប្រធានក្រុមហ៊ុន Circle ដែលបោះផ្សាយ USDC ក៏បានបញ្ជាក់ពីការបង្កកទឹកប្រាក់ជាង ៨០០ លានដុល្លារផងដែរ។
ដំណឹងនៃការវាយប្រហារដ៏កក្រើកនេះ បានធ្វើឱ្យទីផ្សាររូបិយប័ណ្ណគ្រីបតូធ្លាក់ចុះភ្លាមៗ។ តម្លៃ Bitcoin និង Ethereum បានធ្លាក់ចុះជិត ៥% និង ៦% មុនពេលងើបឡើងវិញខ្លះមកនៅត្រឹមធ្លាក់ចុះ ០,៨%។ ចំណែកឯកាក់ BNB របស់ Binance ផ្ទាល់ បានធ្លាក់ចុះជិត ១០% មុនពេលស្ទុះងើបឡើងវិញ ២,៧% ក្រោយមានការចេញមុខធ្វើអន្តរាគមន៍។
ព្រឹត្តិការណ៍នេះ ក៏បានកើតឡើងស្របពេលដែលអ្នកសង្កេតការណ៍ជាច្រើនកំពុងសម្តែងការព្រួយបារម្ភថា សមត្ថភាពដែលកាន់តែរីកចម្រើននៃបញ្ញាសិប្បនិម្មិត (AI) អាចនឹងគំរាមកំហែងដល់ប្រព័ន្ធគ្រីបតូក្រាហ្វី (Cryptography) និងពិធីសារសន្តិសុខបច្ចេកវិទ្យាព័ត៌មាន (IT Security) នាពេលអនាគត។
Home›ព័ត៌មានសេដ្ឋកិច្ច›កក្រើកទីផ្សារគ្រីបតូ៖ Binance រងការវាយប្រហារតាមអ៊ីនធឺណិត ទំហំទឹកប្រាក់ ៦,៣ពាន់លានដុល្លារបរទេស៖ រូបិយប័ណ្ណគ្រីបតូ (Cryptocurrency) Binance កាលពីថ្ងៃព្រហស្បតិ៍ បានបញ្ជាក់ថា ខ្លួនបានរងគ្រោះដោយការលួចចូលប្រព័ន្ធ (Hack) ដ៏ធំមួយ ដែលប៉ះពាល់ដល់ទឹកប្រាក់ប្រមាណ ៦,៣ ព…
តើអ្នកយល់ថាព័ត៌មាននេះនឹងប៉ះពាល់ដល់ទីផ្សារយ៉ាងដូចម្តេច?
អត្ថបទពាក់ព័ន្ធ
មហាសេដ្ឋីមានបំផុតទី២ នៅអាស៊ី ជាប់ឈ្មោះក្នុងបញ្ជីអ្នកខាតបង់ទ្រព្យសម្បត្តិធំបំផុតលើពិភពលោក បន្ទាប់ពីការបោះផ្សាយលក់ភាគហ៊ុនជាសាធារណៈ (IPO)October 31, 2026តម្លៃមាសនៅប្រទេសវៀតណាមបានធ្លាក់ចុះដល់កម្រិតទាបបំផុតក្នុងរយៈពេលមួយខែ ខណៈដែលអត្រាមាសដុំនៅលើសកលលោកបានធ្លាក់ចុះក្រោម ៤.០០០ ដុល្លារអាមេរិកOctober 31, 2026ពាណិជ្ជកម្មវៀតណាមបំបែកកំណត់ត្រាថ្មី សម្រេចបានជាង ១ទ្រីលានដុល្លារ ត្រឹមរយៈពេល១០ខែOctober 31, 2026ក្រុមហ៊ុន Meta, TikTok និង X ចាញ់ក្តីស្ថាប័នឃ្លាំមើលចក្រភពអង់គ្លេស ជុំវិញការទាមទារទិន្នន័យនៃការត្រួតពិនិត្យមាតិកា October 31, 2026
