ភ្នំពេញ៖ ក្រុមប្រណាំងរថយន្ត Off-Road កម្ពុជា ដែលបានចេញទៅប្រកួតក្នុងកម្មវិធី The Magnificent Ten 2024 នៅប្រទេសថៃ បានបញ្ចប់ហើយ ដោយក្នុងចំណោម២៨ក្រុម ដែលស្មើនឹងរថយន្ត ៨៤គ្រឿង មកពី៤ប្រទេស ក្រុមកីឡាករកម្ពុជា ធ្វើបានល្អដោយទទួលបានចំណាត់ថ្នាក់លេខ៩ ខណៈការចូលរួមប្រកួតនេះ សម្រាប់កីឡាករកម្ពុជា កាន់តែទទួលបានបទពិសោធន៍ថ្មីបន្ថែមទៀត ។
សូមរំលឹកថា ក្រុមកីឡាករនៃក្រុមប្រណាំរថយន្ត Off-Road កម្ពុជា បានចេញដំណើរទៅកាន់ប្រទេសថៃ កាលពីថ្ងៃទី២៤ ខែមិថុនា ឆ្នាំ២០២៤ ដើម្បីចូលរួមប្រកួត ក្នុងកម្មវិធីThe Magnificent Ten 2024 ដែលជាកម្មវិធីប្រណាំងOffroadធំបំផុត ប្រចាំឆ្នាំនៅ Grandprix Motor park Thailand ។
ក្រោយបញ្ចប់ការប្រកួតនេះ លោក ឈិន សីហា ដែលជាប្រធានក្រុម ដែលបានដឹកនាំក្រុមចូលរួមប្រកួត បានបង្ហាញចំណាប់អារម្មណ៍របស់ខ្លួន នាថ្ងៃទី២ ខែកក្កដានេះថា “ចំពោះក្រុមរបស់យើងពីមួយឆ្នាំទៅមួយឆ្នាំ មានការរីកចម្រើន និងមានការអភិវឌ្ឍល្អទៅៗ បើយើងប្រៀបធៀបទៅឆ្នាំមុនៗដែលយើងចូលរួម។ ឆ្នាំនេះ យើងធ្វើបានល្អច្រើន ទាំងបច្ចេកទេស ទាំងការងារជាក្រុម ទាំងបទពិសោធន៍និងអ្វីៗគ្រប់បែបយ៉ាង ដែលបានត្រៀម សម្រាប់ការចូលប្រកួតនេះ ដូចនេះគឺយើងបានធ្វើកាន់តែល្អប្រសើរថែមមួយកម្រិតទៀត សម្រាប់ការប្រកួតក្នុងកម្មវិធី The Magnificent Ten” ។
លោក ឈិន សីហា បានគូសបញ្ជាក់ថា “ចំណុចពិសេសខ្ញុំសង្កេតឃើញថា គឺបច្ចេកទេសរថយន្ត និងការរៀបចំរថយន្ត ការប្រើប្រាស់ឧបករណ៍បច្ចេកទេសផ្សេងៗ មានការរៀបចំឡាន គឺយើងត្រូវតាមស្តង់ដារមួយដ៏ខ្ពស់ ដែលអាចចូលទៅប្រឡូក ក្នុងចំណោមអ្នកខ្លាំងទាំងអស់បាន គឺមានន័យថា គេមានអីយើងមានហ្នឹងដែរ ទាំងត្រើយការលេ ទាំងត្រើយល្បឿន ទាំងបូមឡានជើងក្រោមទាំងបច្ចេកទេស ទាំងសុវត្ថិភាព និងគ្រឿងម៉ាស៊ីនអីទាំងអស់ គឺយើងពេញលក្ខណៈជាស្តង់ដារ ដើម្បីចូលប្រកួតក្នុងចំណោមអន្តរជាតិបាន”។
លោកប្រធានក្រុម បានគូសរំលេចថា “ថ្វីត្បិតតែយើងធ្វើមិនបានចំណាត់ថ្នាក់ដូចអ្វីដែលរំពឹកទុកនោះក៏ពិតមែន ក៏ប៉ុន្តែយើងបានចំណាត់ថ្នាក់នេះ (លេខ៩) គឺជាចំណាត់ថ្នាក់មួយដែលក្នុងចំណោមក្រុមខ្លាំងទាំង១០ មកពី២៤ក្រុម ដែលសរុបទាំងអស់៨៤រថយន្ត ។ ឆ្នាំទី៣ នេះ យើងអាចឡើងមកកាន់កន្លែង ក្រុមខ្លាំងទាំង១០បាន ហើយសូមជម្រាបផងដែរថា កម្មវិធីនេះ គេធ្វើមកជាង២០ឆ្នាំហើយ អញ្ចឹងអ្នកដែលចូលក្នុងកម្មវិធីនេះ គេមានបទពិសោធន៍ជាង២០ឆ្នាំហើយ សម្រាប់យើងទើបតែបាន៣ឆ្នាំនេះ ហើយយើងអាចឡើងមកកាន់តំណែងTop10នេះ បានន័យថា យើងក៏មិនធម្មតាដែរ” ។
ដោយឡែកសម្រាប់បទពិសោធន៍ការប្រកួតឆ្នាំនេះ ត្រូវបានលោកប្រធានក្រុម មើលឃើញថា ទាំងសមត្ថភាព ទាំងបច្ចេកទេស ទាំងបទពិសោធន៍របស់ក្រុមកម្ពុជា គឺមានការរីកចម្រើនលឿន លើសពីការរំពឹងទុក។ ហើយមួយទៀតគឺក្រុមការងារទាំងអស់ ដែលមកចូលរួមប្រកួត គឺមានភាពស្រុះស្រួលគ្នា មានទំនួលខុសត្រូវខ្ពស់ ក៏ដូចជាការបំពេញភារៈកិច្ចរបស់ខ្លួននីមួយៗ គឺមានភាពច្បាស់លាស់ល្អ ។
លោក ឈិន សីហា បានបញ្ចាក់ថា “ខ្ញុំសូមនិយាយថា ៩០% គឺយើងដើរ(សហការ) បានល្អទាំងអស់ នេះគឺជាបទពិសោធន៍ និងជាការងារក្រុម ដែលជាចំណុចមួយ ដែលខ្ញុំសង្កេតឃើញ ហើយមួយទៀតនោះ អ្វីដែលជាចំណុចរបស់ខ្ញុំក្នុងការកែតម្រូវ និងបង្កើនឡើងវិញនោះ គឺពេលប្រណាំងជាក្រុម កីឡាកររបស់យើងនៅមានចំណុចខ្វះខាតមួយចំនួន ដូចជា ការទំនាក់ទំនងគ្នា ជាពិសេសប្រព័ន្ធវិទ្យុទាក់ទងតែម្តង” ។
ជាមួយគ្នានេះ លោក ឈិន សីហា ជឿជាក់ថា កីឡាករកម្ពុជា ប្រសិនបើនៅបន្តរក្សាការដឹកនាំ និងរៀបចំកម្មវិធីនេះបន្តទៅទៀត មិនយូរទេ កម្ពុជា នឹងអាចមានឱកាសទទួលតំណែងជើងឯកបាន ។
សូមបញ្ជាក់ថា កីឡាករ ដែលបានចូលរួមប្រកួត ដែលមានលក្ខណៈប្រណាំងជាក្រុម 3ឡាន/ក្រុម មាន៖១. កីឡាករ វង្ស គឹមហួត Co Driver កីឡាករ មុំ ណី, ២. កីឡាករ ព្រំ រស្មី Co Driver កីឡាករ លាភហេង និង៣. កីឡាករ ញឹម សុវណ្ណារ៉ូ Co Driver កីឡាករ ហេង បញ្ញា ។ ក្នុងនោះមានក្រុមការងារសរុបចំនួន ២២នាក់ ទាំងរថយន្តប្រណាំង និងរថយន្តService សរុបជាង១០គ្រឿង ដឹកនាំដោយប្រធានក្រុម លោក ឈិន សីហា ។
នោះក៏មានក្រុមហ៊ុនដែលបានជួយឧបត្ថម ក្រុមកីឡាករប្រណាំង រួមមាន៖ ប្រេងម៉ាស៊ីន Top 1 Oil Cambodia, ក្រុមហ៊ុនដឹកជញ្ជូនផ្លូវសមុទ្រ GTVC , Liberty Carz, Mattrid Beer និងភេសជ្ជៈ Champion និង Siam Prototype Cambodia៕
Home›អត្ថបទពាណិជ្ជកម្ម›ក្រុមប្រណាំងរថយន្ត Off-Road កម្ពុជា ទទួលបានចំណាត់ថ្នាក់លេខ៩ ក្នុងចំណោម២៨ក្រុម ក្នុងការប្រកួតកម្មវិធី The Magnificent Ten 2024 នៅប្រទេសថៃ ភ្នំពេញ៖ ក្រុមប្រណាំងរថយន្ត Off-Road កម្ពុជា ដែលបានចេញទៅប្រកួតក្នុងកម្មវិធី The Magnificent Ten 2024 នៅប្រទេសថៃ បានបញ្ចប…
តើអ្នកយល់ថាព័ត៌មាននេះនឹងប៉ះពាល់ដល់ទីផ្សារយ៉ាងដូចម្តេច?
អត្ថបទពាក់ព័ន្ធ
ជំពូកថ្មីនៃជីវិត៖ ដំណើរតស៊ូរបស់លោក ជិន វាសនា ឆ្ពោះទៅរកឯករាជ្យភាពហិរញ្ញវត្ថុជាមួយ foodpandaNovember 1, 2026SECO Aftermarket ប្រារព្ធខួប ៦០ឆ្នាំ នៃគុណភាព និងភាពជឿជាក់ក្នុងវិស័យគ្រឿងបន្លាស់រថយន្តOctober 27, 2026Taobao Cambodia បើកយុទ្ធនាការ Double 11 ដ៏ធំប្រចាំឆ្នាំជាមួយការផ្តល់ជូនពិសេស សម្រាប់អ្នកប្រើប្រាស់កម្ពុជា នូវកន្លែងទទួលទំនិញជាង 1000ទីតាំង និងការចូលរួមពីតារាសម្តែងចិនដ៏ល្បីល្បាញ Zhang LingheOctober 27, 2026ក្រុមហ៊ុន វឌ្ឍនៈ បន្តទទួលបានការកោតសរសើរលើគុណភាព ស្តង់ដារ និងសុវត្ថិភាពផលិតផល!October 21, 2026
