ភ្នំពេញ៖ ក្រុមហ៊ុន ដើមអម្ពិល អ៊ែតវើថាយស៊ីង ឯ.ក និងសារព័ត៌មានអនឡាញចំនួនពីរផ្សេងទៀត បានចុះអនុស្សរណៈ នៃការយោគយល់ជាមួយក្រុមហ៊ុន Asian Hub Co, Ltd ដែលតំណាងឲ្យស្ថាប័នព័ត៌មានធំៗចំនួន៥ នៅប្រទេសកូរ៉េខាងត្បូង ។
ពិធីចុះអនុស្សរណៈត្រូវបានធ្វើឡើង នាថ្ងៃទី២៦ ខែវិច្ឆិកានេះ ក្រោមវត្តមានរបស់លោក សយ រិទ្ឋី នាយកផ្នែកទីផ្សារនៃគេហទំព័រដើមអម្ពិល និងលោកស្រី Jinhee Choi អគ្គនាយិកាក្រុមហ៊ុន Asianhub Co, Ltd ។ សម្រាប់តំណាងសារព័ត៌មានពីរទៀត ដែលបានចូលរួមចុះហត្ថលេខារួមមាន៖ លោក យិន លាងគង់បាន សហស្ថាបនិក និងជាអគ្គនាយកគេហទំព័រPropertyarea.asia &Cambodiafinancialtimes.com និងលោក អាន ច័ន្ទថ្លា នាយកប្រតិបត្តិសារព័ត៌មានអនឡាញ Cen.com.kh ។
ចំពោះគោលបំណងនៃការចុះអនុស្សរណៈនេះ ធ្វើឡើងដើម្បីចែករំលែកព័ត៌មានពីគ្នាទៅវិញទៅមក ដោយសារព័ត៌មាននៅប្រទេសកូរ៉េ ដែលស្ថិតនៅក្រោមឆ័ត្ររបស់ Asian hub នឹងយកព៌ត៌មានទាក់ទង នឹងសេដ្ឋកិច្ចសង្គម វប្បធ៌ម ទេសចរណ៍ពីគេហទំព័រដើមអម្ពិល ហើយសារព័ត៌មានដើម្ពិល នឹងយកព័ត៌មានពីសារព័ត៌មានធំៗទាំង៥ យកមកចុះផ្សាយដោយមិនគិតថ្លៃ ៕
