ភ្នំពេញ៖ ការផ្តល់រង្វាន់តាមរយៈក្រវិលកំប៉ុងសម្រាប់ផលិតផលស្រាបៀរ និងភេសជ្ជៈ នឹងត្រូវបិទបញ្ចប់ជាផ្លូវការចាប់ពីខែតុលានេះតទៅ ដែលជាការផ្លាស់ប្តូរដ៏ធំមួយនៅក្នុងទីផ្សារ និងកំពុងបង្កើតជាក្តីបារម្ភដល់ម្ចាស់ហាងលក់ភេសជ្ជៈនានា ពាក់ព័ន្ធនឹងការគ្រប់គ្រងផលិតផលមានរង្វាន់ក្នុងស្តុក ព្រមទាំងការដោះស្រាយក្រវិលរង្វាន់ដែលនៅសេសសល់។
ឆ្លើយតបនឹងក្តីបារម្ភនេះ ក្រុមហ៊ុន វឌ្ឍនៈ បានចេញលិខិតបញ្ជាក់ និងធានាជាលាយលក្ខណ៍អក្សរជូនដល់ដៃគូអាជីវកម្មដែលបានបញ្ជាទិញផលិតផលផ្ទាល់ពីរោងចក្រ។
ក្រុមហ៊ុនបានធានាទទួលខុសត្រូវទាំងស្រុងលើការដោះស្រាយក្រវិលរង្វាន់ និងផលិតផលដែលមានរង្វាន់នៅក្នុងស្តុករបស់អតិថិជន ដើម្បីផ្តល់ភាពកក់ក្តៅ និងរក្សាស្ថិរភាពអាជីវកម្មរបស់ដៃគូចែកចាយ។
ចំណាត់ការនេះទទួលបានការគាំទ្រយ៉ាងខ្លាំងពីសំណាក់អាជីវករ ដោយចាត់ទុកថាជាការបង្ហាញនូវការទទួលខុសត្រូវខ្ពស់ ការផ្តល់ទំនុកចិត្ត និងការរួមសុខទុក្ខជាមួយដៃគូអាជីវកម្មក្នុងកាលៈទេសៈផ្លាស់ប្តូរនេះ។
ក្នុងនោះដែរអ្នកឧកញ៉ា សំអាង វឌ្ឍនៈ អគ្គនាយកក្រុមហ៊ុន វឌ្ឍនៈ បានលោកឡើងថា ភាពជាដៃគូពិតប្រាកដ មិនមែនគ្រាន់តែរីករាយជាមួយគ្នានៅពេលអាជីវកម្មជោគជ័យនោះទេ ប៉ុន្តែគឺការឈរនៅជាមួយគ្នា ទទួលខុសត្រូវជាមួយគ្នា និងចូលរួមដោះស្រាយបញ្ហាជាមួយគ្នា នៅពេលមានការលំបាក។
នេះគឺជាទំនួលខុសត្រូវដែលក្រុមហ៊ុន វឌ្ឍនៈ ប្រកាន់ខ្ជាប់ចំពោះដៃគូអាជីវកម្មរបស់យើងខ្ញុំ។ រង្វាន់អាចបញ្ចប់ ប៉ុន្តែការប្តេជ្ញាចិត្តចំពោះគុណភាព និងភាពជាដៃគូរបស់ក្រុមហ៊ុន វឌ្ឍនៈ នឹងបន្តទៅមុខ៕
