ភ្នំពេញ ថ្ងៃទី 27 មេសា 2022 – ធនាគារ ABA ដែលជាធនាគារពាណិជ្ជឈានមុខនៅកម្ពុជា បានប្រកាសចូលរួម វិភាគទានសប្បុរសធម៌ 200,000 ដុល្លារអាមេរិក ជូនកាកបាទក្រហមកម្ពុជា ក្នុងឱកាសខួបទី 159 ទិវាពិភពលោកកាកបាទក្រហម និងអឌ្ឍចន្ទក្រហម 8 ឧសភា ឆ្នាំ 2022។ ថវិកាសប្បុរសធម៌ពី ABA នឹងយកទៅប្រើប្រាស់ ដើម្បីបម្រើសកម្មភាពមនុស្សធម៌របស់កាកបាទក្រហមកម្ពុជាទូទាំងប្រទេស។
ពិធីប្រគល់ថវិកាសប្បុរសធម៌នេះ ធ្វើឡើងក្រោមអធិបតីភាពលោកជំទាវ កិត្តិបណ្ឌិត អ៊ុក ម៉ាលី អគ្គទេសាភិបាលរង ធនាគារជាតិ នៃកម្ពុជា និងជាអគ្គហេរញ្ញិក កាកបាទក្រហមកម្ពុជា, លោក Askhat Azhikhanov នាយកប្រតិបត្តិធនាគារ ABA និងភ្ញៀវកិត្តិយសជាច្រើនរូបទៀតនៅស្នាក់ការកណ្ដាលកាកបាទក្រហមកម្ពុជា។
ថ្លែងក្នុងពិធីនេះ លោក Askhat Azhikhanov បានមានប្រសាសន៍ថា៖ “កាកបាទក្រហមកម្ពុជាដើរតួយ៉ាងសំខាន់ក្នុងការពង្រឹងភាពធន់សហគមន៍ និងជួយសម្រាលទុក្ខលំបាកប្រជាពលរដ្ឋរងគ្រោះ និងងាយរងគ្រោះបំផុតនៅកម្ពុជា ពិសេសអំឡុងពេលនៃគ្រោះធម្មជាតិដូចជាគ្រោះទឹកជំនន់ និងរាំងស្ងួតជាដើម។ ធនាគារ ABA សូមសម្ដែង ការអរគុណ និងគាំទ្រយ៉ាងពេញទំហឹងនូវរាល់គំនិតផ្ដួចផ្ដើមរបស់រដ្ឋាភិបាល ក្នុងការផ្ដល់កញ្ចប់ ជំនួយសង្គ្រោះ បន្ទាន់, សេវាសុខាភិបាល ក្នុងសហគមន៍ និងសុខុមាលភាពសង្គមជូនប្រជាពលរដ្ឋកម្ពុជាគ្រប់រូប។ ការបរិច្ចាគ ដ៏ស្ដួចស្ដើងរបស់យើងខ្ញុំបានឆ្លុះ បញ្ចាំងពី ការបន្ដប្ដេជ្ញាចិត្តរបស់ ABA ក្នុងការរួមចំណែកជាវិជ្ជមានដល់សហគមន៍ ក្នុងស្រុក ហើយយើងខ្ញុំសង្ឃឹមថាថវិកានេះនឹងជួយសម្រួលការងារដ៏មានតម្លៃរបស់កាកបាទក្រហមកម្ពុជា”។
កាកបាទក្រហមកម្ពុជា ជាអង្គការសប្បុរសធម៌ឈានមុខគេនៅកម្ពុជា ដែលត្រូវបានបង្កើតឡើងនៅឆ្នាំ 1955 ក្រោមវីរភាព ដឹកនាំដ៏ឈ្លាសវៃរបស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន។
អង្គការនេះ ត្រូវបានទទួលស្គាល់ជាផ្លូវការពីរាជរដ្ឋាភិបាលកម្ពុជាថា ជាជំនួយការឲ្យអាជ្ញាធរសាធារណៈ នៅក្នុងវិស័យមនុស្សធម៌ ដោយចូលរួមក្នុងសកម្មភាពជាច្រើនរួមមាន កម្មវិធីជំនួយសង្គ្រោះគ្រោះមហន្តរាយផ្សេងៗ កិច្ចខិតខំប្រឹងប្រែងផ្នែកមនុស្សធម៌ និងសកម្មភាពសុខុមាលភាពនានាក្នុងប្រទេសកម្ពុជា៕
