ភ្នំពេញ៖ DELI-ZONE ជាក្រុមរាំច្រៀងដែលមានសមាជិកស្រី ៤នាក់ របស់ប្រទេសជប៉ុន បានសម្រេចចិត្តជ្រើសរើសប្រទេសកម្ពុជា ក្នុងចំណោមប្រទេសជាមាជិកអាស៊ាន ថតចម្រៀងកាយវិការ(MV)ថ្មី ពោលគឺបទ “WOMAN POWER” ជាលើកទីពីរ ដោយហេតុពួកគេយល់ឃើញកម្ពុជាប្រទេសមានភាពទាក់ទាញសម្បូរទៅដោយតំបន់ទេសចរណ៍ វប្បធម៌ប្រពៃណីល្អៗ។ តាមរយៈMVនេះពួកគេរំពឹងថានឹងធ្វើឲ្យទំនាក់ទំនង រវាងប្រទេសទាំងពីកាន់តែមានភាពល្អប្រសើរបន្ថែមទៀត។
បទ “WOMAN POWER” ជាប្រភេទបទចម្រៀងដែលនិយាយអំពីភាពរឹងមាំ ,សេរីភាព , សិទ្ធិ និងភាពឯករាជ្យរបស់ស្រ្តី ។ MVនេះនឹងចេញផ្សាយផ្លូវការនាពេលឆាប់ៗខាងមុខនេះ។ DELI-ZONE សង្ឃឹមថា តាមរយៈបទភ្លេងតន្រ្តីនេះនឹងផ្សារភ្ជាប់ជាស្ពានរវាងទំនាក់ទំនង និងសិល្បៈវប្បធម៌ប្រពៃណីប្រទេសទាំងពីរ កាន់តែល្អប្រសើរថែមទៀត។ ក្នុងឱកាសស្នាក់នៅប្រទេសកម្ពុជា នៅរាត្រីថ្ងៃទី១០ សីហានេះ ក្រុមពួកគេនឹងចូលរួមសម្ដែងចម្រៀងនៅ Back Street Bar។
កត្តាដែលជំរុញឱ្យ ក្រុមDELI-ZONE ជ្រើសរើសការប្រទេសកម្ពុជា ជាកន្លែងថតបទចម្រៀង MV លើកទី២នេះ ដោយសារតែពួកគាត់បានមកដល់ប្រទេសកម្ពុជាលើកទីដំបូង ពួកគាត់មានអារម្មណ៍រំភើបនៅពេលបានឃើញប្រជាជនកម្ពុជា មានភាពរួសរាយរាក់ទាក់និងចិត្តល្អ ធ្វើឲ្យក្រុមពួកគេចងចាំក្នុងចិត្តមិនភ្លេច និងដើម្បីបង្ហាញអំពីវប្បធម៌ ប្រពៃណី ក៏ដូចជាតំបន់ទេសចរណ៍ទៅដល់ប្រទេសជប៉ុនឱ្យបានស្គាល់អំពីវប្បធម៌ដ៏ផូរផង់របស់ខ្មែរ ក៏ដូចជាប្រទេសជាច្រើនលើពិភពលោកបានស្គាល់ពីប្រទេសកម្ពុជា តាមរយៈការថតបទចម្រៀង MV នេះ។
ក្រុម DELI-ZONE បានមកប្រទេសកម្ពុជា ជាលើកទី២ ហើយពួកគាត់ក៏បានដើរកម្សាន្តនៅតាមតំបន់ទេសចរណ៍ជាច្រើន។ តំបន់ទេសចរណ៍ដែលធ្វើឱ្យពួកគេទាក់អារម្មណ៍ខ្លាំងជាងនោះគឺនៅតំបន់ឆ្នេរកំពង់សោម ខេត្តព្រះសីហនុ ក្នុងកម្មវិធីបង្ហោះខ្លែងលេងនៅតាមឆ្នេរសមុទ្រ ដែលជាអនុស្សាវរីយ៍ចងចាំក្នុងចិត្តមិនអាចភ្លេច។
ពួកគេមកថតចម្រៀងកាយវិការ(MV) បទទីមួយនៅប្រទេសកម្ពុជា ប្រភេទបទមរតដើមលោកតា ស៊ីន ស៊ីសាមុត គឺបទ នោរអើយ ស្រីនោរ (Lady named “Yes or No” ) ជាមួយតារាចម្រៀងសម្ចាស់បទ “អូនអ៊ូក” គឺលោក កែវ សីហា ។ ពួកគេបានយកមក Remix ដើម្បីបង្កើតជាបទភ្លេងថ្មី។
សូមបញ្ជាក់ថា DELI-ZONE ជាក្រុមរាំច្រៀងដែលមានសមាជិកស្រី ៤នាក់ បង្កើតឡើងបានរយៈពេល៤ឆ្មាំហើយ។ ក្រុមនេះមានមូលដ្ឋាននៅ Kyushu ប្រទេសជប៉ុន។ ដោយមានបទពីសោធលើវិស័យនេះច្រើនឆ្នាំ ទើបក្រុមពួកគេសម្រេចជ្រើសរើសយកប្រទេសកម្ពុជា ថតបទចម្រៀង MV លើកទី២ និងដើម្បីពង្រីកឱ្យពិភពលោកស្គាល់ពីក្រុមចម្រៀង DELI-ZONE ផងដែរ៕
