ស្របពេលពិភពលោក កាន់តែធ្វើទំនើបកម្ម ទៅលើប្រព័ន្ធផ្សព្វផ្សាយ បែបឌីជីថល “កម្ពុជា” ទោះជាប្រទេសតូច ជាមួយចំនួនពលរដ្ឋ ប្រមាណ ១៦លាននាក់ ក៏កំពុងស្រូបយកបច្ចេកទេស និងគំហើញថ្មីៗពីបរទេស ដើម្បីពង្រឹងសក្តានុពល ប្រព័ន្ធផ្សព្វផ្សាយក្នុងស្រុក ឆ្ពោះទៅដល់ស្តង់ដា បែបឌីជីថលដែរ។

គិតត្រឹមពាក់កណ្តាល ឆ្នាំ២០២០ ពលរដ្ឋកម្ពុជាប្រមាណ ១០លាននាក់ ស្មើប្រមាណ ៦៣% នៃប្រជាជនកម្ពុជាសរុប កំពុងរស់នៅជាមួយ បច្ចេកវិទ្យាឌីជីថល ពិសេសការប្រើប្រាស់ កម្មវិធីទំនាក់ទំនងសង្គម និងកម្មវិធីផ្សេងៗទៀត លើទូរសព្ទ។ តួលេខនេះ ក៏រំពឹងថានឹងកើនឡើង យ៉ាងឆាប់រហ័ស បន្ថែមទៀតពីមួយឆ្នាំ ទៅមួយឆ្នាំ ស្របទៅនឹងការវិវត្តន៍ នៃវិស័យបច្ចេកវិទ្យា។

ផ្អែកលើកំណើនយ៉ាងលឿន ក្នុងបរិបទប្រើប្រាស់បច្ចេកវិទ្យា នៅកម្ពុជា ដូចនេះ TNAOT APP ក៏កំពុងបោះជំហានជាមួយ ចក្ខុវិស័យដ៏រឹងមាំ នៅលើទឹកដីកម្ពុជា ក្នុងនាមជាប្រព័ន្ធផ្សព្វផ្សាយឌីជីផល បែបថ្មីដ៏ធំមួយ ពោលគឺ TNAOT APP មានទស្សនវិស័យចម្បង ក្នុងការផ្សារភ្ជាប់ ការរស់នៅប្រចាំថ្ងៃ របស់ប្រជាជនកម្ពុជា ជាមួយនឹងបច្ចេកវិទ្យាទំនើប តាមរយៈកម្មវិធីទូរសព្ទវ័យឆ្លាត ដោយបើកទូលាយនូវ ការទទួល និងផ្ដល់ព័ត៌មាន ទាន់ហេតុការណ៍ថ្មីៗ ដែលកំពុងកើតឡើង ទាំងក្នុងស្រុក និងអន្ដរជាតិ រួមទាំងមាតិកាសម្បូរបែប ពីការចូលរួមបញ្ចេញគំនិតមតិ និងបង្ហោះស្នាដៃ របស់អ្នកប្រើប្រាស់ក្នុង TNAOT APP ផ្ទាល់តែម្តង។

ចាប់តាំងពីឆ្នាំ ២០១៧ មកដល់បច្ចុប្បន្ននេះ អ្នកប្រើប្រាស់ TNAOT APP តែងបានចូលរួមកម្មវិធីថ្មីៗ និងទទួលបាននូវមាតិកា ប្រចាំថ្ងៃដ៏សម្បូរបែប ទាំងព័ត៌មាន ការកម្សាន្ត និងចំណេះដឹងទូទៅ នៅលើទូរសព្ទដៃរបស់ពួកគាត់។ យើងខ្ញុំអាចចាត់ទុកបានថា នេះជាការបោះជំហាន ទៅមុខមួយរបស់ TNAOT APP ក្នុងប្រតិបត្តិការប្រមាណជាង ២ ឆ្នាំមកនេះ ។

ដោយសម្លឹងឃើញតម្រូវការ និងឈរលើគោលជំហរវឌ្ឈនភាព TNAOT APP មានក្រុមការងារជំនាញ សកម្ម និងមានភាពច្នៃប្រឌិតខ្ពស់ ធ្វើយ៉ាងណា បំពេញតម្រូវការ របស់អ្នកប្រើប្រាស់។ ដើម្បីបង្កើតមាតិកាប្រចាំថ្ងៃ ឲ្យកាន់តែសម្បូរបែប និងមានអត្ថប្រយោជន៍ ការចូលរួមបង្ហោះស្នាដៃ របស់មិត្តអ្នកប្រើប្រាស់ ទាំងអ្នកធម្មតា អ្នកមានចំណេះដឹងវិជ្ជាជីវៈ និងស្ថាប័នផ្សេងៗ គឺជាការរួមចំណែក យ៉ាងសំខាន់ដល់ TNAOT APP ដោយក្នុងនោះ មានដូចជា ការចែករំលែកតាមរយៈ News Feed, Wemedia ជាដើម។ អ្វីកាន់តែអស្ចារ្យទៀតនោះ News Feed និង Wemedia របស់ TNAOT APP ដែលជាវេទិកាថ្មីមួយ មិនត្រឹមបើកទូលាយ សម្រាប់សាធារណជន បង្ហោះស្នាដៃប៉ុណ្ណោះទេ តែអ្នកបង្ហោះស្នាដៃទាំងនោះ ក៏នឹងទទួលបានអ្នកគាំទ្រ រួមនិងរង្វាន់ពី TNAOT APP ទៀតផង។

ដូចនេះ បន្ថែមលើមាតិកា សារព័ត៌មានប្រចាំថ្ងៃទាំងភាសាខ្មែរ និងភាសាចិន នៅលើ TNAOT APP យើងមានក្រុមការងារជំនាញ ដែលសកម្ម និងមានភាពច្នៃប្រឌិតខ្ពស់ ធ្វើយ៉ាងណា ឲ្យមានការចូលរួមឲ្យបានច្រើន និងសកម្មពីសាធារណជន គ្រប់គ្នា គ្រប់ស្ថាបនផ្សេងៗ ដើម្បីមកបង្កើត នូវវេទិការបង្ហាញពី ស្នាដៃរបស់ខ្លួន។

ទន្ទឹមនេះ TNAOT APP ក៏កំពុងសហការជាមួយ បណ្តាប្រព័ន្ធផ្សព្វផ្សាយ តារាល្បីៗ Influencers លើបណ្តាញសង្គម តារា TikTok និង YouTuber ជាដើម ដើម្បីជួយផ្សព្វផ្សាយ ដល់អ្នកដែលចង់ មានវេទិកាស្នាដៃផ្ទាល់ខ្លួន មកបង្កើតនូវកម្មវិធីថ្មីៗ ប្លែកៗចែករំលែកក្នុង TNAOT APP នឹងជំរុញឲ្យកម្មវិធី ទូរសព្ទនេះ ពោរពេញទៅដោយព័ត៌មាន និងមាតិកាកាន់សម្បូរបែប និងមានតម្លៃ។

ចំណុចដែលមិនអាចមើលរំលងបាន ក្នុងនាមជាប្រព័ន្ធផ្សព្វផ្សាយ បែបឌីជីថលឈានមុខគេ TNAOT APP ក៏តែងចូលរួមយ៉ាងសកម្ម ក្នុងកិច្ចការមនុស្សធម៌ កិច្ចការសង្គម និងការការពារធម្មជាតិ ទៀតផង ដោយមានកិច្ចសហការ ជាមួយស្ថាប័នរាជរដ្ឋាភិបាល អង្គការ និងសមាគម ក្រៅរដ្ឋាភិបាលជាដើម។ កន្លងមក TNAOT APP បានបរិច្ចាគថវិកា សម្ភារៈដល់យោធិនពិការ អតីតយុទ្ធជន ក៏ដូចជាការដាំកូនឈើជាដើម។

ថ្មីៗនេះ TNAOT APP ក៏បង្កើតយុទ្ធនាការផ្តល់ ម៉ាស់ការពារវីរុសកូវីដ ១៩ រាប់ម៉ឺនម៉ាស់ ទៅដល់ប្រជាជនកម្ពុជា ទាំងទីសាធារណៈ សមាគម អង្គភាព ក្រសួងស្ថាប័ននានា ដែលសកម្មភាពទាំងនេះបង្ហាញថា ទោះជាស្ថិតក្នុងវិស័យឯកជនក្តី TNAOT APP នៅតែយកចិត្តទុកដាក់ជាខ្លាំង ក្នុងការចូលរួមជាមួយវិស័យរដ្ឋ និងវិស័យសាធារណៈ។

ជារួម ឈរលើទស្សនវិស័យរឹងមាំ និងការប្តេជ្ញារួមគ្នា TNAOT APP នឹងក្លាយជាវេទិកា ប្រព័ន្ធផ្សព្វផ្សាយ បែបឌីជីថលឈានមុខគេ ក្នុងការប្រមូលផ្តុំស្នាដៃ និងបង្ហាញមាតិកាល្អៗ សម្រាប់កម្ពុជា៕

ក្នុងថ្ងៃនេះ ក្រុមហ៊ុនសែលកាត ត្រូវបានប្រកាសទទួលស្គាល់ ដោយស្ថាប័ន OpenSignal ជាជ័យលាភីពានរង្វាន់ បទពិសោធន៍ នៃការលេងហ្គេម (Games Experience) ដំបូងគេបង្អស់ នៅក្នុងប្រទេសកម្ពុជា។

សេចក្តីប្រកាសនេះ បានបញ្ជាក់ឱ្យកាន់តែច្បាស់ នូវភាពនាំមុខគេ របស់ក្រុមហ៊ុន សែលកាត ទៅលើវិស័យកីឡាអេឡិចត្រូនិច នៅក្នុងប្រទេសកម្ពុជា ក៏ដូចជាបង្ហាញ ឱ្យឃើញថា យុទ្ធសាស្រ្តរបស់ក្រុមហ៊ុន ក្នុងការផ្តល់ជូនបទពិសោធន៍ ប្រើប្រាស់បណ្តាញទូរស័ព្ទចល័ត ប្រកបដោយគុណភាពខ្ពស់ ដល់អ្នកស្នេហា វិស័យហ្គេម ត្រូវបានទទួលស្គាល់ យ៉ាងទូលំទូលាយនៅក្នុងតំបន់ និងទូទាំងពិភពលោកផងដែរ។

Opensignal គឺជាស្ថាប័នឯករាជ្យមួយ ដែលបានបង្កើតស្តង់ដារពិភពលោក សម្រាប់ការវិភាគ ទៅលើបទពិសោធន៍ ប្រើប្រាស់ទូរស័ព្ទចល័ត របស់អតិថិជន។

តាមរយៈរបាយការណ៍ចុងក្រោយ របស់ស្ថាប័ននេះ ស្តីអំពីប្រទេសកម្ពុជា បានបង្ហាញឱ្យដឹងថា ក្រុមហ៊ុនសែលកាត គឺជាប្រតិបត្តិករថ្នាក់ជាតិ តែមួយគត់ ដែលអ្នកប្រើប្រាស់ទទួលបាន បទពិសោធន៍ នៃការលេងហ្គេម កម្រិតខ្ពស់ជាងគេបំផុត ក្នុងបណ្តាញ4G។

បទពិសោធន៏ នៃការលេងហ្គេម របស់សែលកាត នៅលើបណ្តាញ 4GLTE ទទួលបានពិន្ទុ 47.2 ក្នុងចំណោមពិន្ទុផ្តល់ជូន 100 ខណៈក្រុមហ៊ុនមិត្តហ្វូន ទទួលបានពិន្ទុ 39.9 ហើយក្រុមហ៊ុន Smart Axiata ទទួលបាន 38.8 ពិន្ទុ ។ (ពិន្ទុក្រោម 40 ត្រូវបានចាត់ទុកថា ស្ថិតនៅក្នុងកម្រិត “អន់បំផុត”។)

លោក អៀន វ៉ាតសុន (Ian Watson) នាយកប្រតិបត្តិ ក្រុមហ៊ុនសែលកាត បានមានប្រសាសន៍ ឱ្យដឹងថា ប្រទេសកម្ពុជា ត្រូវតែខិតខំបង្កើន កម្រិតគុណភាពបន្តទៀត ទើបអាចឈានទៅដល់ កម្រិតប្រដំប្រសងគ្នា ជាមួយនឹងទីផ្សារកីឡាអេឡិចត្រូនិច ឈានមុខគេផ្សេងទៀត ដូចជាប្រទេសថៃ និងប្រទេសម៉ាឡេស៊ី ជាដើម ដែលទីផ្សារទាំងពីរនេះ ទទួលបានពិន្ទុ សម្រាប់បទពិសោធន៍ នៃការលេងហ្គេម ច្រើនជាង 70 (ពោលគឺឋិតនៅ ក្នុងកម្រិត “បង្គួរ”) ។

លោក វ៉ាតសុន បានមានប្រសាសន៍ បន្តទៀតថា៖ “សែលកាតបានចាប់ផ្តើម ផ្តោតទៅលើវិស័យ កីឡាអេឡិចត្រូនិច ចាប់តាំងពីឆ្នាំ 2018 មកម្ល៉េះ ហើយទន្ទឹមនឹងនោះ ក្រុមហ៊ុនក៏បានរៀបចំ កម្មវិធីប្រកួត ក៏ដូចជាចាប់ដៃគូសហការ ដើម្បីជួយបំពេញ សេចក្តីត្រូវការ របស់សហគមន៍ កីឡាអេឡិចត្រូនិច នៅក្នុងប្រទេសកម្ពុជា ដែលតាមរយៈការប៉ាន់ស្មាន គឺមានប្រហែលជាង 2 លាននាក់ ក្នុងពេលបច្ចុប្បន្ននេះ។

“ខណៈដែលសែលកាត អាចទទួលបានពិន្ទុ 47.2 សម្រាប់បទពិសោធន៍ នៃការលេងហ្គេម4Gនេះ គឺយើងអាចសន្មត់បានថា វាជាសមិទ្ធិផល ដ៏អស្ចារ្យបំផុតមួយ ព្រោះថាបើពិនិត្យមើល ទៅកាន់ប្រទេសថៃ និងម៉ាឡេស៊ី ឯណោះវិញ ទីផ្សារឈានមុខគេ ទាំងពីរនេះ មានអ្នកលេងហ្គេម ប្រហែលជាង 20 លាននាក់ ហើយប្រតិបត្តិករ បណ្តាញទូរស័ព្ទចល័ត របស់ពួកគេ ដែលមានដូចជា AIS និង Maxis វិញទៀតសោត ក៏សុទ្ធតែមានសមត្ថភាពខ្ពស់ ទៅលើការរៀបចំកម្មវិធី សម្រាប់វិស័យកីឡាអេឡិចត្រូនិច របស់ពួកគេផងដែរ។

ក្រុមហ៊ុនសែលកាត នឹងនៅតែបន្តគាំទ្រ ក៏ដូចជាជួយអភិវឌ្ឍ សហគមន៍វិស័យ កីឡាអេឡិចត្រូនិច នៅក្នុងប្រទេសកម្ពុជា រួមទាំងជួយផ្សាភ្ជាប់ កីឡាករក្នុងស្រុក ជាមួយនឹងវិស័យ កីឡាអេឡិចត្រូនិចអន្តរជាតិ ដែលកំពុងរីកលូតលាស់ជាខ្លាំង ដើម្បីចូលរួមជម្រុញទឹកចិត្ត ដល់អ្នកសេ្នហា វិស័យហ្គេមទាំងអស់ ដែលមានបំណង ចង់ក្លាយខ្លួន ជាកីឡាករអាជីព នៅក្នុងវិស័យកីឡាមួយនេះ។

លោក វ៉ាតសុន បានមានប្រសាសន៍ បន្ថែមថា លោកសូមកោតសរសើរជាខ្លាំង ចំពោះស្ថាប័នឯករាជ្យអន្តរជាតិ ដែលក្នុងនោះរួមមានស្ថាប័ន Opensignal ជាដើម ដែលបានខិតខំប្រឹងប្រែង ក្នុងការស្វែងយល់ពីតម្រូវការ និងអាកប្បកិរិយា របស់អ្នកប្រើប្រាស់ ក្នុងសម័យដ៏ជឿនលឿន បំផុតបែបនេះ ដើម្បីណែនាំនូវកម្រិត វាស់ស្ទង់ថ្មី តួយ៉ាងដូចជា បទពិសោធន៍ នៃការលេងហ្គេមនេះជាដើម។

កម្រិតវាស់ស្ទង់ថ្មីនេះ ដែលត្រូវបានបង្កើត ផ្អែកលើស្តង់ដាររបស់ ITU (សហភាពទូរគមនាគមន៍អន្តរជាតិ) នឹងចូលរួមវិភាគទៅលើ បទពិសោធន៍ នៃការលេងហ្គេមជាលក្ខណៈ បណ្តាញលើទូរស័ព្ទចល័ត ថាតើវានឹងមានឥទ្ធិពល បែបណាខ្លះ ទៅលើលក្ខខណ្ឌបណ្តាញ ទូរស័ព្ទចល័ត ដែលក្នុងនោះរួមមាន ទាំងល្បឿននៃការបញ្ជូនទិន្នន័យ និងបញ្ហារួមទាំងភាពយឺតយ៉ាវ នៃការបញ្ចូនរលកសញ្ញាផងដែរ។

លោក វ៉ាតសុន បានឱ្យដឹងទៀតថា៖ “ក្នុងចំណោមកីឡាករ ហ្គេមទាំងអស់ ពិតជាមិនមាននរណា ដែលចង់ចាញ់ការប្រកួត ដោយសារ តែបណ្តាញអ៊ីនធើណិត ដំណើរការយឺតនោះឡើយ”។

“ជាពិសេសសម្រាប់ កីឡាអេឡិចត្រូនិច ដែលជាប្រភេទហ្គេមទាមទារ ឱ្យប្រើប្រាស់ជំនាញ ខ្លាំងនេះតែម្តង គឺបណ្តាញអ៊ីនធើណិត មានតួនាទីសំខាន់ ខ្លាំងណាស់ ពោលគឺវាអាចមានឥទ្ធិពល កំណត់ជោគវាសនា អ្នកនាំមុខគេ នៅក្នុងតារាងចំណាត់ថ្នាក់តែម្តង”។

ដើម្បីអបអរសាទរ នូវសមិទ្ធិផលដែលទទួលបាននេះ ក្រុមហ៊ុនសែលកាត នឹងធ្វើការរៀបចំកម្មវិធី ផ្សាយរយៈពេលពេញមួយថ្ងៃ នាថ្ងៃទី 14 ខែសីហាខាងមុខនេះ ដើម្បីឱ្យអ្នកលេងហ្គេម អាចស្វែងយល់បន្ថែម អំពីកីឡាអេឡិចត្រូនិច ក៏ដូចជាដើម្បីឱ្យពួកគាត់ បានទស្សនា នូវការប្រកួតប្រជែងគ្នា ដោយផ្ទាល់ របស់កីឡាករ ហ្គេមអាជីព នៅលើបណ្តាញទូរស័ព្ទចល័ត សែលកាតផងដែរ។

ព្រឹត្តិការណ៍ប្រកួតប្រជែងនេះ នឹងមានផ្សាយផ្ទាល់ នៅលើទំព័រហ្វេសប៊ុកថ្មី របស់សែលកាត ដែលមានឈ្មោះថា PlayGame ដោយក្នុងនោះ នឹងមានការចូលរួម ពីសំណាក់កីឡាករ និងអ្នកអត្ថាធិប្បាយល្បីៗ រួមមានដូចជា ក្រុម Orange Esports, Henaa, Ice Frogz, Ream Angkor, Private Plork និងក្រុមកីឡាករផ្សេងៗ ជាច្រើនទៀតផងដែរ។

ព័ត៌មានបន្ថែម ស្តីអំពីការវាស់ស្ទង់ និងការផ្តល់ពិន្ទុទៅលើ បទពិសោធន៍ នៃការលេងហ្គេម របស់ស្ថាប័ន OpenSignal (2020)៖
សម្រាប់ការវាស់ស្ទង់ទៅលើ បទពិសោធន៍ នៃការលេងហ្គេមលើទូរស័ព្ទចល័ត ជាលក្ខណៈបណ្តាញ គឺប្រទេសសិង្ហបុរី ជាជ័យលាភីមេដាយមាស ដែលទទួលបានពិន្ទុ 84.5។

កីឡាករនៅតាមបណ្តាប្រទេស ក្នុងទ្វីបអាស៊ីមានកម្រិត បទពិសោធន៍ នៃការលេងហ្គេម ច្រើនសណ្ឋានជាងតំបន់ផ្សេងៗ ដទៃទៀត ដោយក្នុងនោះ៖
31 ភាគរយនៃបណ្តាប្រទេស ក្នុងទ្វីបអាស៊ី បានស្ថិតនៅក្នុងចំណាត់ថ្នាក់ ខ្សោយ 27 ភាគរយ បានឋិតនៅ ក្នុងកម្រិតបង្គួរ 15 ភាគរយ ទទួលបានចំណាត់ថ្នាក់ល្អ និង 8 ភាគរយទៀត ទទួលបានចំណាត់ថ្នាក់ល្អបំផុត។

ទីផ្សារហ្គេមសំខាន់ៗ នៅក្នុងអាស៊ី ដែលទើបតែឈានដល់កម្រិត ពាក់កណ្តាល នៃតារាងសម្រាប់បទពិសោធន៍ នៃការលេងហ្គេមមានដូចជា៖ ទីក្រុងហុងកុង ប្រទេសម៉ាឡេស៊ី ថៃ និង វៀតណាម ដែលបទពិសោធន៍ នៃការលេងហ្គេម មានកម្រិតបង្គួរ ខណៈប្រទេសឥណ្ឌូណេស៊ី បានធ្លាក់ចូល ទៅក្នុងចំណាត់ថ្នាក់ខ្សោយ ដោយទទួលបាន ពិន្ទុត្រឹមតែ 63.6 ប៉ុណ្ណោះ៕

ភ្នំពេញ​៖ និស្សិតឆ្នាំទី២ នៃដេប៉ាតឺម៉ង់ ប្រព័ន្ធផ្សព្វផ្សាយ និងសារគមនាគមន៍(DMC) នៃសាកលវិទ្យាល័យ ភូមិន្ទភ្នំពេញ នឹងសម្ភាធពិព័រណ៍រូបថត លើកទីពីររបស់ខ្លួន តាមរយៈប្រព័ន្ធឌីជីថលជំនួសវិញ ដើម្បីចូលរួមបង្ការ និងទប់ស្កាត់ ការរីករាលដាល នៃជំងឺកូវីដ១៩។

ពិព័រណ៍រូបថតនេះ នឹងប្រព្រឹត្តទៅចាប់ថ្ងៃទី៣ ខែសីហា ឆ្នាំ២០២០ រហូតដល់ថ្ងៃទី ៣១ ខែសីហា ឆ្នាំ២០២០ តាមរយៈគេហទំព័រ www.dmcphotofest.com ទំព័រហ្វេសប៊ុក DMC Photo Festival (https://www.facebook.com/DmcPhotoFestival) និងទំព័រហ្វេសប៊ុក របស់ដេប៉ាតឺម៉ង់ ប្រព័ន្ធផ្សព្វផ្សាយ និងសារគមនាគមន៍ (https://www.facebook.com/DMC.CCI)។

ពិព័រណ៍រូបថតលើកទីពីរនេះ ត្រូវបានផលិត និងរៀបចំ ដោយនិស្សិតឆ្នាំទីពីរ ជំនាន់ទី១៨ ក្រោមការដឹកនាំ ​របស់លោក ផន ភារិទ្ធ (Miller) ដែលជាគ្រូបង្រៀនថតរូប នៃដេប៉ាតឺម៉ង់ផ្ទាល់។

លោក ផន ភារិទ្ធ បានឲ្យដឹងថា ពិព័រណ៍នេះ ត្រូវបានរៀបចំឡើង ដើម្បីបង្ហាញស្នាដៃថតរូប របស់និស្សិត បន្ទាប់ពីពួកគេ បានសិក្សា អំពីរបច្ចេកទេសថតរូប រយៈពេលមួយឆមាសរួមមក។ គ្រប់រូបថត ដែលនឹងបង្ហាញនោះ នឹងមិនត្រឹមតែឆ្លុះបញ្ចាំង ពីការខិតខំប្រឹងប្រែង របស់និស្សិតប៉ុណ្ណោះទេ ប៉ុន្តែក៏នឹងឆ្លុះបញ្ចាំង ពីស្ថានភាពសង្គម នាពេលបច្ចុប្បន្នផងដែរ។

លោកបានបន្ថែមថា «យើងប្រើរូបភាពជំនួសវីដេអូ ជាសារដើម្បីពញ្ញាក់អារម្មណ៍ អ្នកទស្សនាពីសកម្មភាព ដែលពួកគាត់ជួបប្រទះរាល់ថ្ងៃ។ បើទោះបីស្នាដៃ របស់និស្សិតមិនសូវជាល្អ ដូចអ្នកថតរូបអាជីព ក៏ដោយ ក៏យើងបានព្យាយាម សម្រិតសម្រាំង ឲ្យស្នាដៃទាំងនោះឆ្លុះបញ្ចាំងពីសង្គមវិញ ដោយរូបថត មានលក្ខណៈជាស៊េរីបណ្ដាក់ ទៅតាមសាច់រឿង ឲ្យអ្នកចូលរួមបានយល់។»

លោក អ៊ុង ប៊ុនអ៊ី ប្រធានដេប៉ាតឺម៉​ង់ ប្រព័ន្ធផ្សព្វផ្សាយ និងសារគមនាគមន៍ បាននិយាយថា «ពិព័រណ៍រូបថត DMC Photo Festival នេះ បានផ្សារភ្ជាប់ទ្រឹស្តី ទៅនឹងការអនុវត្ត ជាក់ស្តែងរបស់និស្សិត ក្នុងន័យលើកកម្ពស់ ចំណេះដឹង និងចំណេះធ្វើ របស់និស្សិតDMCផ្ទាល់។ លោកលើកឡើងថា ដេប៉ាតឺម៉ង់ក៏ចង់ជំរុញ ឲ្យនិស្សិតយកឱកាសនេះ សិក្សាស្រាវជ្រាវ ពីបញ្ហាប្រឈម ក៏ដូចជាវឌ្ឍនភាពនានា ក្នុងសង្គម ហើយយកមកឆ្លុះបញ្ចាំង តាមរយៈជំនាញ ដែលខ្លួនបានសិក្សា។

លោកបន្តថា «តាមរយៈការពិព័រណ៍រូបថតនេះ សាធារណជនក៏មានឱកាស បានដឹងឮ ក៏ដូចជាយល់ដឹង ពីរឿងរ៉ាវសង្គមទាំងនោះ និងចូលរួមជាផ្នែកមួយ នៃដំណោះស្រាយ ព្រោះថាពួកគេ ក៏ជាផ្នែកមួយ នៃរឿងរ៉ាវសង្គមទាំងនោះដែរ។»

ជានិស្សិតឆ្នាំទីពីរ នៃដេប៉ាតឺម៉ង់ និងជាផលិតករម្នាក់ នៃកម្មវិធីតាំងពិព័រណ៌ រូបថតនេះ កញ្ញា សុខ ស្រីលុច បាននិយាយថា៖ «ពួកយើងបានខិតខំប្រឹងប្រែងយ៉ាងខ្លាំង បើទោះបីពេលខ្លះ ត្រូវនៅហាលថ្ងៃ ចុះទូកកណ្ដាលទន្លេ និងត្រូវចុះទៅទីតាំងឆ្ងាយៗ ក៏ដោយ ក៏យើងនៅទ្រាំ ដើម្បីបានរូបមួយៗ។» កញ្ញាសង្ឃឹមថា ពិព័រណ៍រូបថតលើកទីពីរ ដែលនឹងត្រូវប្រារព្វធ្វើ នៅពេលខាងមុខនេះ នឹងមានអ្នកចូលរួមគាំទ្រច្រើន។

លោក នូ វិរៈ ជានិស្សិតឆ្នាំទីពីរ នៃដេប៉ាតឺម៉ង់ និងអ្នករៀបចំកម្មវិធី បាននិយាយថា៖ «ពាក់ព័ន្ធជាមួយនឹងព្រឹត្តិការណ៍ ពិព័រណ៍រូបថតDMCនេះ កាលពីមុនយើងចង់ឲ្យមាន ការរៀបចំដាក់តាំងបង្ហាញ នៅក្នុងបរិវេណ នៃសាកលវិទ្យាល័យ ភូមិន្ទភ្នំពេញ ក៏ប៉ុន្តែដោយសារ តែជំងឺកូវីដ១៩ យើងអត់អាចបើកកម្មវិធីនេះ ជាសាធារណៈ បាននោះទេ ដោយយើងគោរពតាម គោលការណ៍រក្សាគម្លាតសង្គម របស់ក្រសួងសុខាភិបាល យើងក៏បានសម្រេចចិត្ត ជាមួយនឹងគណៈគ្រប់គ្រង ដេប៉ាតឺម៉ង់ រៀបចំកម្មវិធីនេះ ទៅតាមប្រព័ន្ធឌីជីថលវិញ។

មានន័យថា រូបភាពរបស់ក្រុមនិស្សិត ដែលបានផលិត ទាំង៩ប្រធានបទ ស្មើនឹងប្រមាណជាង ២០០សន្លឹក នឹងត្រូវបានដាក់បង្ហាញ នៅលើគេហទំព័រ ផ្លូវការរបស់យើង ដើម្បីអាចឲ្យសាធារណជន បានទស្សនា។»

លោក នូ វីរៈ បាននិយាយថា ក្រៅពីការទស្សនារូបថត សាធារណជន ក៏អាចតាមដានកម្មវិធី កិច្ចពិភាក្សារវាងវាគ្មិន និងទស្សនីយភាព ផ្សេងទៀតរួមមាន៖
សប្តាហ៍ទី១ ៖ ជួបជាមួយកិច្ចពិភាក្សា តាមក្រុមរបស់គម្រោង នៃពិព័រណ៍ រួមទាំងការបង្ហាញក្បាច់របាំខ្មែរ របស់អ្នកគ្រូ វុធ ច័ន្ទម៉ូលី និងកិច្ចពិភាក្សាអំពីការថតរូប បែបកំសាន្តដោយលោក សួង ម៉ារឌី (Suong Mardy)។

សប្តាហ៍ទី២ ៖ កិច្ចពិភាក្សា តាមក្រុមរបស់គម្រោង នៃពិព័រណ៍ រួមទាំងការពិភាក្សាអំពីការថតរូប ក្នុងវិស័យសារព័ត៌មាន ដោយលោក លោក លន ហ្សាឌីណា (Lon Jadina) និងកិច្ចពិភាក្សា អំពីការថតរូបបែប Travel Photography ដោយលោក ឡា ម៉ូ (La Mo)។

សប្តាហ៍ទី៣ ៖ កិច្ចពិភាក្សា តាមក្រុមរបស់គម្រោង នៃពិព័រណ៍ រួមទាំងការពិភាក្សា អំពីការអប់រំផ្លូវចិត្ត តាមរយៈការសមាធិ ដោយលោកគ្រូ នឹម ឈុន្នី (Noem Chhunny) និងការពិភាក្សាអំពីការថតរូប បែបពាណិជ្ជកម្ម ដោយលោក ថៃ វ៉ាន់ថា (Jerry Thai) ។

សប្តាហ៍ទី៤ ៖ កិច្ចពិភាក្សា តាមក្រុមរបស់គម្រោង នៃពិព័រណ៍ រួមទាំងការពិភាក្សា អំពីស្រ្តីជាអ្នកថតរូប ក្នុងវិស័យសារព័ត៌មាន ដោយលោកស្រី Lim Jessica។

សប្តាហ៍ទី៥ ៖ ការបង្ហាញសិល្បៈ របស់តារាចម្រៀងលោក ម៉ា ច័ន្ទបញ្ញា។»

សម្រាប់ព័ត៌មានបន្ថែម សូមទាក់ទង តាមរយៈទំព័រ ហ្វេសប៊ុកផ្លូវការ របស់យើង (DMC Photo Festival) ឬទំនាក់ទំនងកញ្ញា សួន ស្រីដែត តាមរយៈលេខទូរស័ព្ទ ០១៧ ៥៦៦ ៩២៦និងលោក ជា តារាពេជ្រ តាមរយៈលេខទូរស័ព្ទ ០៧០ ៩៩ ៣៩ ៦០៕