សៀមរាប៖ រដ្ឋមន្ត្រីទេសចរណ៍កម្ពុជា-ឡាវ-មីយ៉ាន់ម៉ា-វៀតណាម ហៅកាត់ CLMV បានអនុម័តផែនការសកម្មភាពពង្រីកកិច្ចសហប្រតិបត្តិការទេសចរណ៍ CLMV ឆ្នាំ២០២៣-២០២៥ ដោយបន្តផ្តោតលើយុទ្ធសាស្ត្រ «ប្រទេសបួន គោលដៅតែមួយ» ដើម្បីជំរុញកំណើនទេសចរក្នុងតំបន់ឱ្យកាន់តែច្រើនជាងមុន។
ការអនុម័តនេះធ្វើឡើងក្នុងកិច្ចប្រជុំរដ្ឋមន្ត្រីទេសចរណ៍ CLMV លើកទី៦ នារសៀលថ្ងៃទី៣ ខែវិច្ឆិកា ឆ្នាំ២០២២ នៅខេត្តសៀមរាប ក្រោមការដឹកនាំរបស់លោកជំទាវ Suanesavanh Vignaket រដ្ឋមន្ត្រីព័ត៌មាន វប្បធម៌ និងទេសចរណ៍ឡាវ និងដោយមានការចូលរួមពីឯកឧត្តម ថោង ខុន រដ្ឋមន្ត្រីក្រសួងទេសចរណ៍កម្ពុជា លោក Htay Aung រដ្ឋមន្ត្រីក្រសួងសណ្ឋាគារមីយ៉ាន់ម៉ា និងឯកឧត្ដម Doan Van Viet អនុរដ្ឋមន្ត្រីវប្បធម៌ កីឡា និងទេសចរណ៍វៀតណាម។
កិច្ចប្រជុំរដ្ឋមន្ត្រីទេសចរណ៍កម្ពុជា-ឡាវ-មីយ៉ាន់ម៉ា-វៀតណាមលើកទី៦ បានរៀបចំឡើងនៅថ្ងៃទី៣ ខែវិច្ឆិកា ឆ្នាំ២០២២ នៅខេត្តសៀមរាប ដែលចូលរួមដោយរដ្ឋមន្ត្រីព័ត៌មាន វប្បធម៌ និងទេសចរណ៍ឡាវ រដ្ឋមន្ត្រីទេសចរណ៍កម្ពុជា និងអនុរដ្ឋមន្ត្រីវប្បធម៌ កីឡា និងទេសចរណ៍វៀតណាម ។នេះបើយោងតាមហ្វេសប៊ុករបស់ក្រសួងទេសចរណ៍ Ministry of Tourism, Cambodia។
នាឱកាសនោះ កិច្ចប្រជុំបានកោតសរសើរចំពោះសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា សម្រាប់សារស្វាគមន៍ដ៏មានអត្ថន័យ។ រដ្ឋមន្រ្តីកោតសរសើរយ៉ាងផុសផុលនូវទស្សនវិស័យស៊ីជម្រៅលើវិស័យទេសចរណ៍នៃប្រទេស CLMV និងបានប្តេជ្ញាអនុវត្តអនុសាសន៍ណែនាំដែលបានបញ្ចូលក្នុងផែនការសកម្មភាពទេសចរណ៍ CLMV ឆ្នាំ២០២៣-២០២៥។
រដ្ឋមន្ត្រីទេសចរណ៍ CLMV បានពិនិត្យឡើងវិញលើកិច្ចសហប្រតិបត្តិការទេសចរណ៍ CLMV ដោយយោងទៅតាមផែនការសកម្មភាពស្តីពីកិច្ចសហប្រតិបត្តិការទេសចរណ៍ CLMV ឆ្នាំ២០១៩-២០២១ ដែលត្រូវបានអនុម័តនាកិច្ចប្រជុំរដ្ឋមន្រ្តីទេសចរណ៍ CLMV លើកទី៥ នៅខេត្តឈៀងរ៉ាយ ប្រទេសថៃ ដោយយោងតាមកិច្ចប្រជុំកំពូល CLMV លើកទី១០ ក្នុងឆ្នាំ២០២០។ កិច្ចប្រជុំបានគូសបញ្ជាក់ពីលទ្ធផលនៃកិច្ចសហប្រតិបត្តិការក្នុងផ្នែកនៃការសម្រួលការធ្វើដំណើរការកសាងសមត្ថភាព ការចូលរួមពីផ្នែកឯកជន និងសហគមន៍មូលដ្ឋាន ក៏ដូចជាកិច្ចសហប្រតិបត្តិការជាមួយប្រទេសដទៃ ដែគូអភិវឌ្ឍន៍ និងស្ថាប័នហិរញ្ញវត្ថុអន្តរជាតិ។
រដ្ឋមន្ត្រីទេសចរណ៍ CLMV បានកត់សម្គាល់ដោយពេញចិត្តពីការងើបឡើងវិញនៃការទទួលទេសចរអន្តរជាតិ ដោយក្នុងរយៈពេល៩ខែ ឆ្នាំ២០២២ ប្រទេស CLMV បានទទួលភ្ញៀវទេសចរអន្តរជាតិចំនួន៣,៩៣៣,៤៧៨នាក់។ ចំនួនទេសចរផ្ទៃក្នុងតំបន់មានចំនួន៦០៤,៨៦៨នាក់ ស្មើនឹង១៥.៧៧%នៃចំនួនភ្ញៀវទេសចរអន្តជាតិសរុប។
កិច្ចប្រជុំកោតសរសើរអាជ្ញាធរពាក់ព័ន្ធ និងភ្នាក់ងារទេសចរណ៍ និងក្រសួងទេសចរណ៍ CLMV សម្រាប់កិច្ចខិតខំប្រឹងប្រែងក្នុងការបង្កើតផែនការអភិវឌ្ឍន៍ទេសចរណ៍ CLV-DTA សម្រាប់ឆ្នាំ២០២០-២០២៥ និងចក្ខុវិស័យឆ្ពោះទៅឆ្នាំ២០៣០ ដែលត្រូវបានអនុម័តនាកិច្ចប្រជុំកំពូល CLV លើកទី១១ ស្តីពីការអភិវឌ្ឍន៍តំបន់ត្រីកោណ កាលពីថ្ងៃទី៩ ខែធ្នូ ឆ្នាំ២០២២ តាមរយៈប្រព័ន្ធវីឌីអូ។
រដ្ឋមន្ត្រីទេសចរណ៍ CLMV បានអនុម័តផែនការសកម្មភាពស្តីពីកិច្ចសហប្រតិបត្តិការទេសចរណ៍ CLMV ឆ្នាំ២០២៣-២០២៥ ដោយបន្តផ្តោតលើការជំរុញ «ប្រទេសបួន គោលដៅតែមួយ» ដោយគ្របដណ្តប់លើ ១.ការសម្រួលការធ្វើដំណើរ ២.ការកសាងសមត្ថភាព ៣.ការចូលរួមពីផ្នែកឯកជន និងសហគមន៍មូលដ្ឋាន ៤.កិច្ចសហប្រតិបត្តិការជាមួយភាគីទី៣ និង៥.ការធានានូវទេសចរណ៍ប្រកបដោយនិរន្តភាព និងទទួលខុសត្រូវ។
កិច្ចប្រជុំក៏បានអនុម័តនូវសេចក្តីប្រកាសរួមនៃកិច្ចប្រជុំរដ្ឋមន្រ្តីទេសចរណ៍កម្ពុជា-ឡាវ-មីយ៉ាន់ម៉ា-វៀតណាមលើកទី៦។
រដ្ឋមន្ត្រីទេសចរណ៍ CLMV បានកោតសរសើរ និងថ្លែងអំណរគុណដល់កម្ពុជាដែលបានធ្វើជាម្ចាស់ផ្ទះរៀបចំកិច្ចប្រជុំរដ្ឋមន្រ្តីទេសចរណ៍ CLMV លើកទី៦ និងកិច្ចប្រជុំរដ្ឋមន្រ្តីទេសចរណ៍អេកម៉ិកលើកទី៥។
គួរជម្រាបថា កិច្ចប្រជុំឧត្តមមន្ត្រី និងរដ្ឋមន្ត្រីទេសចរណ៍ CLMV លើកទី៧ នឹងប្រព្រឹត្តទៅនៅប្រទេសមីយ៉ាន់ម៉ានៅឆ្នាំ២០២៤៕
