ភ្នំពេញ៖ ក្រុមហ៊ុនអង្គរឌែរីប្រូដាកខូអិលធីឌី (រោងចក្រផលិតទឹកដោះគោអង្គរមីល) បានរៀបចំអាហារសាមគ្គី នៅសណ្ឋាគារ សុខាភ្នំពេញ នៅរាត្រីថ្ងៃទី៧ ខែមករា ឆ្នាំ២០២៤ ជាមួយតំណាងចែកចាយទូទាំងប្រទេស ដើម្បីអបអសាទរចំពោះលទ្ធផលដ៏ល្អ ដែលសម្រេចបានក្នុងឆ្នាំ២០២៣កន្លងទៅ ។
នាយកដ្ឋានផ្នែកលក់ និងទីផ្សារ នៃក្រុមហ៊ុនអង្គរឌែរីប្រូដាកខូអិលធីឌី (រោងចក្រផលិតទឹកដោះគោអង្គរមីល) បានថ្លែងទៅកាន់តំណាងចែកចាយទូទាំង ថាឆ្នាំ២០២៣ជាឆ្នាំដ៏ប្រពៃដែលការសហការធុរកិច្ចរវាងក្រុមហ៊ុនអង្គរឌែរីប្រូដាកខូអិលធីឌី និងតំណាងចែកចាយទូទាំងប្រទេសហើយទទួលបានលទ្ធផលល្អប្រសើរ ។ ខ្ញុំសូមអបអសាទរចំពោះលទ្ធផលដ៏ល្អក្នុងឆ្នាំ២០២៣កន្លងទៅ ។
ក្នុងនាមនាយកដ្ឋានផ្នែកលក់ និងទីផ្សារ លោកថា នឹងខិតខំសិក្សាស្វែងយល់អំពីតម្រូវការ គោលបំណងរបស់អ្នកប្រើប្រាស់ចុងក្រោយ ដើម្បីអភិវឌ្ឍន៍នូវផលិតផលថ្មីៗជាច្រើនទៀត ដើម្បីផ្គត់ផ្គង់តម្រូវការទីផ្សារប្រកបដោយនិរន្តភាព និងដើម្បីពង្រីកទំហំទីផ្សាររបស់យើងអោយកាន់តែធំជាលំដាប់ជារៀងរាល់ឆ្នាំ។ ជាក់ស្តែងក្នុងឆ្នាំ២០២៣ថ្មីៗកន្លងទៅនេះ យើងបានផលិតផល១ប្រភេទ បន្ថែមទៀតគឺ៖ ទឹកដោះគោបេស៍ខៅ ប្រភេទប្រអប់ក្រដាសបរិស្ថាន ចំណុះ 1,284Kg ហើយរំពឹងទុកជាមុនថាផលិតផលនេះនឹងក្លាយជាផលិតផលលក់ដាច់ខ្លាំង និងមានការពេញនិយមគាំទ្រ ពីអតិថិជនទាំងអស់ ។ ដើម្បីឆ្លើយតបទៅនិងបរិបទនៃការប្រគួតប្រជែងដ៏ខ្លាំងនាពេលបច្ចុប្បន្ននេះ យើងខ្ញុំនឹងខិតខំបង្កើតនូវយុទ្ធសាស្រ្តទីផ្សារថ្មីៗដែលមានប្រសិទ្ធភាពខ្ពស់ ដើម្បីប្រគួតប្រជែងលើទីផ្សារប្រកបដោយយុទ្ធសាស្រ្ត ឈ្នះ-ឈ្នះ-ឈ្នះ-ឈ្នះ ។
ដោយមានភាពជឿជាក់ទៅលើសមត្ថភាព និងបទពិសោធន៍ក្នុងការចែកចាយលក់ផលិតផលយូរឆ្នាំព្រមទាំងការក្តាប់បាននូវព័ត៌មានទីផ្សារយ៉ាងជាក់លក្ខណ៍នៅក្នុងតំបន់រៀងៗខ្លួនរបស់តំណាងចែកចាយទាំងអស់ ក្រុមហ៊ុនមានការរំពឹងទុកជាមុនថាការសហការធុរកិច្ចក្នុងឆ្នាំ២០២៤នេះ នឹងបញ្ចប់ដោយទទួលបានលទ្ធផលល្អប្រសើរជាងឆ្នាំ២០២៣ ហើយនឹងមានកំណើនមិនតិចជាង១០-១៥%នោះឡើយ ដោយសារយើងមាន យុទ្ធសាស្រ្តល្អ ផលិតផលល្អ អ្នកចែកចាយពូកែ ការសហការល្អ នោះនឹងទទួលបានលទ្ធផលគាប់ប្រសើរជាមិនខាន ។
យុទ្ធសាស្រ្តគន្លឹះឆ្នាំ២០២៤គឺ៖
-ការកសាងម៉ាកយីហោ តាមគ្រប់ប្រព័ន្ធផ្សព្វផ្សាយជាពិសេសបណ្តាញសង្គម និង ឌីជីថល (Social and digital media)
-ការពង្រីកទីផ្សារតាមរយៈ កម្មវិធីលក់ជាពិសេសដល់ដៃគូលក់និងចែកចាយបន្ត
-ការបង្កើនបរិមាណនៃអតិថិជនប្រើប្រាស់ចុងក្រោយលើទូរទាំងប្រទេស។
សូមរំលឹកជូនផងដែរថាក្រុមហ៊ុនអង្គរឌែរីប្រូដាកខូអិលធីឌី (រោងចក្រផលិតទឹកដោះគោអង្គរមីល) ទទួលបានអាជ្ញាបណ្ណ័ពីរាជរដ្ឋាភិបាលនាខែវិច្ឆិកាឆ្នាំ២០១៣ លើផ្ទៃដី៣ហិកតា ហើយបានដំណើរផលិត នូវផលិតផលទឹកដោះគោដំបូងនៅខែកញ្ញាឆ្នាំ២០១៥ ជាមួយការដាក់បន្ថែមទន់វិនិយោគជាបន្តបន្ទាប់មកដល់ពេលនេះ ទន់វិនិយោគបានកើនឡើងដល់ប្រមាណជិត ៤១លានដុល្លារសហរដ្ឋអាមេរិកហើយផ្ទៃដីរោងចក្រផលិត បានកើនដល់ ៦ហិកតា (ទ្វេដង) នាពេលបច្ចុប្បន្ននេះ។ និងបានកំពុងផ្តល់ការងារជូនកម្មករនិយោជិត ប្រមាណជាជិត៦០០នាក់ ក្នុងនោះនាយកដ្ឋានផ្នែកលក់ និងទីផ្សារមានចំនួន១៥៨នាក់ ទូទាំងប្រទេស (ឆ្នាំ២០២៤មានកំណើនប្រមាណ១០%) និងបានចូលរួមចំណែកបង់ពន្ធជូនថវិកាជាតិប្រមាណ ៨ទៅ១០លានដុល្លារសហរដ្ឋអាមេរិក ក្នុងមួយឆ្នាំៗ។
អង្គរមីលមានមោទនភាពដែលបានផលិតនៅប្រទេសកម្ពុជា!
អង្គរមីលល្អសម្រាប់សុខភាពអ្នក!
ប្រភពអត្ថបទពីក្រុមហ៊ុន
