ក្រុមហ៊ុន eMoney បានប្រារព្ធពិធីខួបលើកទី ៨ របស់ខ្លួនក្រោមប្រធានបទ «eMoney ចាប់ផ្តើមទំព័រថ្មី ឬ eMoney New Chapter Begins» ដែលជាការគូសបញ្ជាក់ពីសមិទ្ធផលសំខាន់ៗ ក្នុងកំណើននៃគ្រឹះស្ថានហិរញ្ញវត្ថុឌីជីថល ឈានមុខគេមួយនៅកម្ពុជា ព្រមទាំងបញ្ជាក់ឡើងវិញនូវការប្តេជ្ញាចិត្ត របស់ខ្លួនចំពោះការច្នៃប្រឌិត ការពង្រីកប្រព័ន្ធអេកូឡូស៊ីសេវាកម្ម និងការគាំទ្រដល់ដំណើរការបរិវត្តកម្មឌីជីថលរបស់ប្រទេសជាតិ។
បង្កើតឡើងក្នុងឆ្នាំ ២០១៨ eMoney បានក្លាយជាក្រុមហ៊ុនជាផ្លូវការ ដោយមានបេសកកម្មក្នុងការនាំយកសេវាកម្មហិរញ្ញវត្ថុឌីជីថល ឱ្យកាន់តែខិតជិតប្រជាជននៅទូទាំងប្រទេសកម្ពុជា និងកែលម្អការទទួលបានដំណោះស្រាយហិរញ្ញវត្ថុទំនើប។ ក្នុងរយៈពេល ៨ ឆ្នាំកន្លងមកនេះ គ្រឹះស្ថាននេះបានពង្រីកប្រតិបត្តិការរបស់ខ្លួនជាលំដាប់ អភិវឌ្ឍបណ្តាញដៃគូនៅទូទាំងប្រទេស និងធ្វើឱ្យសេវាកម្មរបស់ខ្លួនកាន់តែសម្បូរបែប រួមមាន៖ ការទូទាត់ឌីជីថល ការផ្ទេរប្រាក់ ការបញ្ចូលប្រាក់ទូរសព្ទ ការទូទាត់វិក្កយបត្រ និងដំណោះស្រាយហិរញ្ញវត្ថុឌីជីថលផ្សេងៗទៀតយ៉ាងច្រើនសន្ធឹកសន្ធាប់។
កាលពីឆ្នាំ ២០២០ eMoney មានទីតាំងភ្នាក់ងារផ្តល់សេវាកម្មប្រមាណ ៨,០០០ កន្លែង និងមានកាបូបប្រាក់អេឡិចត្រូនិក (e-wallet) ចុះឈ្មោះចំនួន ១,២ លាននាក់។ លុះមកដល់ឆ្នាំ ២០២៦ បណ្តាញរបស់ខ្លួនបានកើនឡើងរហូតដល់ជាង ១៥,០០០ ទីតាំងភ្នាក់ងារ ដោយបម្រើអតិថិជនប្រើប្រាស់កាបូបប្រាក់អេឡិចត្រូនិកសកម្មជាង ១ លាននាក់។
ទន្ទឹមនឹងការពង្រីកបណ្តាញរបស់ខ្លួន eMoney បានបន្តលើកកម្ពស់គុណភាពសេវាកម្មដោយការ ភ្ជាប់ទំនាក់ទំនងជាមួយប្រព័ន្ធទូទាត់បាគង (Bakong) ការពង្រីកសេវាទូទាត់តាមកូដ QR និងការរឹតចំណងដៃគូជាមួយធនាគារ អាជីវកម្ម និងអង្គភាពក្នុងស្រុកផ្សេងៗ។ គំនិតផ្តួចផ្តើមទាំងនេះបានរួមចំណែក ក្នុងការជម្រុញការទូទាត់មិនប្រើប្រាស់សាច់ប្រាក់ បង្កើនបរិយាបន្នហិរញ្ញវត្ថុ និងឆ្លើយតបទៅនឹងតម្រូវការហិរញ្ញវត្ថុឌីជីថលដ៏សម្បូរបែបរបស់អតិថិជនកម្ពុជា។
ក្នុងនាមជាសមាជិកនៃប្រព័ន្ធអេកូឡូស៊ីឌីជីថលរបស់ Metfone ក្រុមហ៊ុន eMoney ចែករំលែកនូវការប្តេជ្ញាចិត្តរបស់ក្រុមហ៊ុនមេ ចំពោះការអភិវឌ្ឍប្រកបដោយចីរភាព ការច្នៃប្រឌិតដោយផ្អែកលើអតិថិជនជាកណ្តាល និងការផ្តល់ជូនតម្លៃប្រកបដោយអត្ថន័យដល់សហគមន៍។ ក្រៅពីប្រតិបត្តិការអាជីវកម្មរបស់ខ្លួន ក្រុមហ៊ុន Metfone បានបង់ថវិកាភាគទានជាង ១ ប៊ីលានដុល្លារអាមេរិកជូនរាជរដ្ឋាភិបាលកម្ពុជា ក្នុងរយៈពេលជិតពីរទសវត្សរ៍នៃប្រតិបត្តិការ និងបានវិនិយោគជាង ១២០ លានដុល្លារអាមេរិកលើវិស័យអប់រំ សុខាភិបាល សុខុមាលភាពសង្គម និងគំនិតផ្តួចផ្តើមអភិវឌ្ឍន៍សហគមន៍។ ការរួមចំណែករយៈពេលវែងទាំងនេះបានផ្តល់នូវ គ្រឹះយ៉ាងរឹងមាំសម្រាប់សមាជិកប្រព័ន្ធអេកូឡូស៊ី រួមទាំង eMoney ក្នុងការបន្តគាំទ្រដល់ការអភិវឌ្ឍសេដ្ឋកិច្ច និងសង្គមរបស់កម្ពុជា។
ថ្លែងនៅក្នុងពិធីអបអរសាទរខួប ៨ ឆ្នាំនេះ តំណាងក្រុមហ៊ុន eMoney បានថ្លែងថា ស្នាដៃបោះជំហានក្នុងរយៈពេល ៨ ឆ្នាំនេះ មិនត្រឹមតែជាឱកាសមួយក្នុងការឆ្លុះបញ្ចាំងពីសមិទ្ធផលរបស់ក្រុមហ៊ុនប៉ុណ្ណោះទេ ប៉ុន្តែវាក៏ជាការចាប់ផ្តើមនៃដំណាក់កាលថ្មីនៃកំណើនផងដែរ។ សម្លឹងទៅមុខ eMoney នឹងបន្តវិនិយោគលើបច្ចេកវិទ្យា លើកកម្ពស់បទពិសោធន៍អតិថិជន ពង្រីកប្រព័ន្ធអេកូឡូស៊ីសេវាកម្មហិរញ្ញវត្ថុឌីជីថល និងពង្រឹងកិច្ចសហការដៃគូ ដើម្បីផ្តល់ជូនដំណោះស្រាយឌីជីថលកាន់តែងាយស្រួល សុវត្ថិភាព និងមានប្រសិទ្ធភាពសម្រាប់ទាំងបុគ្គល និងអាជីវកម្ម។
ដោយផ្អែកលើការច្នៃប្រឌិត វិធីសាស្ត្រយកអតិថិជនជាចម្បង និងការប្តេជ្ញាចិត្តចំពោះការអភិវឌ្ឍប្រកបដោយចីរភាព eMoney រំពឹងថានឹងបន្តរួមចំណែកដល់បរិវត្តកម្មឌីជីថលរបស់កម្ពុជា ជម្រុញសេដ្ឋកិច្ចឌីជីថល និងគាំទ្រដល់ការអភិវឌ្ឍរយៈពេលវែងរបស់ប្រទេសជាតិក្នុងឆ្នាំខាងមុខ៕
