ភ្នំពេញ៖ភ្ញៀវទេសចរផ្ទៃក្នុងនាចុងសប្តាហ៍ថ្ងៃទី៤-៥ ខែធ្នូ ឆ្នាំ២០២១ នៅទូទាំងប្រទេសទទួលបានភ្ញៀវសរុបមានចំនួន ១៨១,០២៤ នាក់ ក្នុងនោះភ្ញៀវជាតិ ១៧៥,៧១៦ នាក់ និងភ្ញៀវបរទេសផ្ទៃក្នុង ៥,៣០៨ នាក់ ខណៈគោលដៅទេសចរណ៍សំខាន់ៗ មានខេត្តព្រះសីហនុ ទទួលបានភ្ញៀវទេសចរ ច្រើនជាងគេ ។
តាមរយៈហ្វេសប៊ុកក្រសួងទេសចរណ៍ ឲ្យដឹងនៅថ្ងៃទី៧ ខែធ្នូ ឆ្នាំ២០២១ ថា គោលដៅទេសចរណ៍សំខាន់ៗ រួមមាន៖ខេត្តព្រះសីហនុ ៣១,៤៦៤ នាក់រាជធានីភ្នំពេញ ២៩,៧៩២ នាក់ខេត្តពោធិ៍សាត់ ២៣,៨៣៤ នាក់ខេត្តកំពត ១៧,៧៩៦ នាក់ខេត្តសៀមរាប ១៦,១៦០ នាក់ខេត្តបាត់ដំបង ៨,៤១៣ នាក់ខេត្តកែប ៦,៥៦៧ នាក់ខេត្តមណ្ឌលគិរី ៦,៣៩៦ នាក់។ មានការកើនឡើងប្រមាណ ៤.៦៥% ធៀបនឹងចុងសប្តាហ៍កន្លងមក។
អាកាសធាតុចាប់ផ្តើមចុះត្រជាក់ ជាកត្តាមួយជំរុញចរន្តភ្ញៀវទេសចរផ្ទៃក្នុងទូទាំងប្រទេស បើទោះបីពុំមានថ្ងៃឈប់សម្រាកបុណ្យជាតិនានាក៏ដោយ។
សភាពការណ៍ជារួមពុំមានបញ្ហាធំដុំអ្វីកើតឡើងទេ ខណៈដែលរដ្ឋបាលរាជធានីខេត្ត មន្ទីរទេសចរណ៍ បានខិតខំបន្តជំរុញការអនុវត្តវិធានសុវត្ថិភាពទេសចរណ៍ និង SOP ពិសេសសម្រាប់សេវាកម្សាន្ត ដែលរាជរដ្ឋាភិបាលបានអនុញ្ញាតបើកឲ្យដំណើរការឡើងវិញក្រោយថ្ងៃទី៣០ ខែវិច្ឆិកា ឆ្នាំ២០២១កន្លងមក៕
