ភ្នំពេញ៖ លោក ថោង ខុន រដ្ឋមន្ត្រីក្រសួងទេសចរណ៍ ឲ្យដឹងថា ក្នុងរយៈពេលពីរថ្ងៃនាឱកាសបុណ្យចូលឆ្នាំចិន (១២-១៣ កុម្ភៈ) កម្ពុជាទទួលបានភ្ញៀវទេសចរប្រមាណជាង ៦១៣,៥៩៦ ម៉ឺននាក់។នេះបើតាមហ្វេសប៊ុកក្រសួងទេសចរណ៍។
រដ្ឋមន្ត្រីក្រសួងទេសចរណ៍ បានឲ្យដឹងនៅថ្ងៃទី១៤ ខែកុម្ភៈ ឆ្នាំ២០២១នេះថា ភ្ញៀវបានចេញដើរកម្សាន្តនៅទូទាំងប្រទេសមានចំនួន ៤០៨,៥២១ នាក់ ក្នុងនោះភ្ញៀវជាតិមានចំនួន ៤០៣,៧៨៦ នាក់ និងភ្ញៀវបរទេសផ្ទៃក្នុងមានចំនួន ៤,៧៣៥ នាក់។
លោកបញ្ជាក់ថា ដូចការគ្រោងទុក ចលនាភ្ញៀវនាថ្ងៃទី២ មានសន្ទះខ្លាំងជាងថ្ងៃទី១ ប៉ុន្តែប្រជាពលរដ្ឋមួយចំនួនបានជ្រើសរើសដើរកម្សាន្តនៅតាមគោលដៅជិតៗ ឬវិលល្ងាច។ ជាក់ស្តែង តាមការបញ្ជាក់របស់អាជ្ញាធររាជធានីភ្នំពេញមានប្រជាពលរដ្ឋ និងភ្ញៀវទេសចរប្រមាណ ១០ ម៉ឺននាក់ បានដើរកម្សាន្តនៅតាមគោលដៅនានាក្នុងរាជធានីភ្នំពេញ។
លោកបន្ថែមថា ដោយឡែក ខេត្តដែលមានភ្ញៀវទេសចរទៅកម្សាន្តច្រើន ដូចជា រមណីយដ្ឋានមួយចំនួនក្នុងខេត្តកំពត មានការកកកុញភ្ញៀវច្រើន។ អាជ្ញាធរមូលដ្ឋាននៅតែខិតខំ ក្នុងការណែនាំឱ្យភ្ញៀវទេសចរ រក្សាគម្លាត និងទប់ស្កាត់មិនឲ្យមានការជួបជុំជាក្រុមធំ។ ចំពោះការគ្រប់គ្រងសន្តិសុខ សណ្ដាប់ធ្នាប់ជាទូទៅ មានភាពល្អប្រសើរ មិនមានបញ្ហា ឬការរំខានណាមួយកើតឡើង គួរកត់សម្គាល់ទេសម្រាប់រយៈពេល២ថ្ងៃនេះ៕
សូមជម្រាបថា គោលដៅទេសចរណ៍សំខាន់ៗមួយចំនួន រួមមាន៖
- រាជធានីភ្នំពេញ៖ ១០៧,២០០នាក់
- ខេត្តសៀមរាប៖ ៧៣,៤១៧ នាក់
- ខេត្តកែប៖ ៦៥,២៧៧ នាក់
- ខេត្តព្រះសីហនុ៖ ៦០,៦៤៦ នាក់
- ខេត្តកំពត៖ ៥៩,២៦២ នាក់
- ខេត្តបាត់ដំបង៖ ៤៩,៥០៥ នាក់
- ខេត្តកណ្តាល៖ ៤៣,៨៩៩ នាក់
- ខេត្តកោះកុង៖ ២២,៥៤១ នាក់
- ខេត្តពោធិ៍សាត់៖ ១៥,១៩៨ នាក់
- ខេត្តក្រចេះ៖ ១១,១៨៣ នាក់៕
