ភ្នំពេញ៖លោកស្រី គឹម ស្រីរ័ត្ន អនុប្រធានសហព័ន្ធស្រូវអង្ករកម្ពុជា (ស.អ.ក) និងជាប្រធានគណៈកម្មាធិការប្រតិបត្តិទទួលបន្ទុកផ្នែកទីផ្សារ និងជំរុញការនាំចេញ របស់ស.អ.ក «សហព័ន្ធស្រូវអង្ករកម្ពុជា និងសន្និសីទស្រូវអង្ករពិភពលោកលើកទី១២ ឆ្នាំ២០២០» បានលើកឡើងថា គិតមកត្រឹមខែវិច្ឆិកា ឆ្នាំ២០២០នេះ ការនាំចេញការនាំចេញអង្ករកម្ពុជា ទៅកាន់ទីផ្សារពិភពលោក ក្នុងរយៈពេល១១ខែ បានកើនឡើងជិត១៧% ដែលគិតជាបរិមាណសរុបមានចំនួន ៦០១ ០៤៥ តោន និងគិតជាទឹកប្រាក់ទទួលបាន ៤១៥លានដុល្លារ សហរដ្ឋអាមេរិក។
លោកស្រី គឹម ស្រីរ័ត្ន លើកឡើងបែបនេះ ក្នុងឱកាសចូលរួមផ្តល់បទបង្ហាញអំពី វិស័យស្រូវអង្ករកម្ពុជា នៅក្នុងសន្និសីទស្រូវអង្ករពិភពលោកលើកទី១២ ដែលធ្វើឡើងតាមរយៈអនឡាញ
ដែលសន្និសីទស្រូវអង្ករពិភពលោក ត្រូវបានរៀបចំឡើងជារៀងរាល់ឆ្នាំ ដែលជាព្រឹត្តិការណ៍ជួបជុំ និងការប្រមូលផ្តុំនូវអ្នកពាក់ព័ន្ធ នៅក្នុងការធ្វើពាណិជ្ជកម្មស្រូវអង្ករ កម្រិតពិភពលោក ហើយដោយឡែក នៅក្នុងឆ្នាំ២០២០នេះ ដោយសារតែមានការរីករាលដាលនូវវិបត្តិកូវីដ១៩ សន្និសីទស្រូវអង្ករពិភពលោកលើកទី១២ ក៏ត្រូវបានរៀបចំឡើងតាមរយៈវេទិកា អនឡាញដំបូងបំផុត។
ជាមួយគ្នានេះដែរលោកស្រី ក៏បានឆ្លៀតរំលេចអំពីលក្ខណៈពិសេសរបស់អង្ករក្រអូបប្រណីតរបស់កម្ពុជា “ម្លិះអង្គរ” និងធ្លាប់បានទទួលពានរង្វាន់អង្ករល្អបំផុត លើពិភពលោកចំនួន៤ដងរួចមកហើយ ពីសន្និសីទស្រូវអង្ករពិភពលោក កាលពីឆ្នាំ២០១២ ២០១៣ ២០១៤ និង ២០១៨។
លោកស្រីអនុប្រធាន ក៏បានលើកបង្ហាញអំពីការយកចិត្តទុករបស់រាជរដ្ឋាភិបាលកម្ពុជា ក្នុងការជួយពង្រឹង និងទ្រទ្រង់វិស័យនេះ តាមរយៈការផ្តល់ឥណទានដល់រោងម៉ាស៊ីនស្រូវ ក្នុងអត្រាពិសេស ដើម្បីជាទុនបង្វិលទិញស្រូវ និងទុនរយៈពេលមធ្យម និងវែង សម្រាប់សាងសង់ឡសម្ងួត និងឃ្លាំងស្តុកស្រូវ ដែលកម្មវិធីនេះ បានអនុវត្តដោយធនាគារអភិវឌ្ឍន៍ជនបទ និងកសិកម្ម។
លើសពីនេះទៀត លោកស្រីក៏បង្ហាញពីភាពប្រកួតប្រជែង និងការលើកទឹកចិត្តដល់ការវិនិយោគលើ វិស័យស្រូវអង្ករកម្ពុជា តាមរយៈការទទួលបានការលើកលែង ពីរាជរដ្ឋាភិបាលកម្ពុជា លើពន្ធដារ និងអាករគ្រប់ប្រភេទ ពន្ធនាំចូល ពន្ធនាំចេញ ដល់វិស័យស្រូវអង្ករ និងអ្នកវិនិយោគលើវិស័យនេះ។
គួរបញ្ជាក់ផងដែរថា សហព័ន្ធស្រូវអង្ករកម្ពុជា ក្រោមការគាំទ្រពីរដ្ឋាភិបាលអូស្រ្តាលី តាមរយៈកម្មវិធីខ្សែសង្វាក់តម្លៃកសិកម្មកម្ពុជា-អូស្រ្តាលី បានចូលរួមផ្សព្វផ្សាយអំពីម៉ាក “ម្លិះអង្គរ” របស់កម្ពុជា នៅលើទីផ្សារសកលលោក តាមរយៈការចូលរួមសហការឧបត្ថម្ភសន្និសីទស្រូវអង្ករ ពិភពលោកលើកទី១២។ គោលបំណងនៃការចូលរួមឧបត្ថម្ភនេះគឺ ដើម្បីលើកស្ទួយនិងផ្សព្វផ្សាយ អំពីវិស័យវឌ្ឍនភាព និងការអភិវឌ្ឍរបស់វិស័យស្រូវអង្ករកម្ពុជា ក្នុងយុគសម័យថ្មី៕
