ភ្នំពេញ៖លោក ស៊ាង ថៃ រដ្ឋលេខាធិការក្រសួងពាណិជ្ជកម្ម លើកឡើងថា កម្ពុជានឹងទទួលធ្វើម្ចាស់ផ្ទះរៀបចំកិច្ចប្រជុំកំពូលអាស៊ី-អឺរ៉ុបលើកទី១៣ ដែលគ្រោងនឹងប្រព្រឹត្តទៅ នាដើមខែមិថុនា ឆ្នាំ២០២១ ខាងមុខ នៅរាជធានីភ្នំពេញ ខណៈក្រសួងពាណិជ្ជកម្ម ត្រូវទទួលភារកិច្ចរៀបចំវេទិកា សេដ្ឋកិច្ច និងធុរកិច្ចអាស៊ី-អឺរ៉ុបលើកទី១ ដែលគ្រោងនឹងរៀបចំ មួយថ្ងៃមុនពិធីបើកកិច្ចប្រជុំកំពូលអាស៊ី-អឺរ៉ុប ជាផ្លូវការ។
ក្នុងឱកាសដឹកនាំកិច្ចប្រជុំក្រុមការងារពិធីការ និងបដិសណ្ឋារកិច្ច សម្រាប់ត្រៀមរៀបចំវេទិកា “សេដ្ឋកិច្ច និងធុរកិច្ចអាស៊ី-អឺរ៉ុប លើកទី១” កាលពីថ្ងៃទី៣០ ខែធ្នូ ឆ្នាំ២០២០ កន្លងទៅ
លោក ស៊ាង ថៃ ថ្លែងថា វេទិកានេះ មានសារៈសំខាន់ណាស់ ព្រោះនឹងមានថ្នាក់ដឹកនាំធុរកិច្ចល្បីៗ ដឹកនាំប្រតិភូពាណិជ្ជកម្ម និងវិនិយោគធំៗ មកពីទ្វីបអាស៊ី និងអឺរ៉ុបមកចូលរួមដើម្បីស្វែងរកកាលានុវត្តន៍ភាពកសាងទំនាក់ទំនងសេដ្ឋកិច្ច និងវិនិយោគទៅវិញទៅមក។
លោកបញ្ជាក់ថា “ហេតុនេះដើម្បីត្រៀមលក្ខណៈទទួលរៀបចំវេទិកាសេដ្ឋកិច្ច និងធុរកិច្ចអាស៊ី-អឺរ៉ុបលើកទី១ ឲ្យទទួលបានជោគជ័យនិងលទ្ធផលល្អ ក្រសួងពាណិជ្ជកម្ម បានធ្វើការបែងចែកភារកិច្ចទទួលខុសត្រូវជូន ក្រុមការងារតូចៗ ដូចជា ក្រុមការងារកសាងឯកសារ ក្រុមការងារពិធីការ និងបដិសណ្ឋារកិច្ច ជាដើម ដោយក្នុងក្រុមនីមួយៗ នឹងមានរៀបចំក្រុមការងារតូចៗ ដើម្បីទទួលខុសត្រូវការងារលំអិតផ្សេងៗទៀតដូចជា ក្រុមការងារពិធីការ រៀបចំកន្លែងប្រជុំ ដឹកជញ្ជូន សិល្បៈ សន្តិសុខ និងក្រុមតាំងបង្ហាញផលិតផលសក្កានុពលរបស់កម្ពុជា ជាដើម”។
លោកក៏បានស្នើដល់ក្រុមតូចៗ ទាំងអស់យកចិត្តទុកដាក់រៀបចំផែនការការងារ របស់ខ្លួនឲ្យបានល្អិតល្អន់ ត្រូវតាមដាន និងរាយការណ៍ពីវឌ្ឍនភាពការងារ ដែលក្រុមការងារនីមួយៗ បានបំពេញ ធ្វើដូច្នេះ ទើបអាចគ្រប់គ្រងការរៀបចំព្រឹត្តិការណ៍ បានគ្រប់ជ្រុងជ្រោយ និងទទួលបានលទ្ធផលល្អប្រសើរ៕
