ភ្នំពេញ៖ ក្នុងកម្មវិធីប្រឡងប្រកួតប្រជែងគណិតវិទ្យាអង្គរជុំទី៣ដែលជាជុំផ្ដាច់ព្រ័ត លោកបណ្ឌិត ដេត សុខឧត្តម សាកលវិទ្យាធិការនៃសាកលវិទ្យាល័យផារ៉ាហ្គន បានប្រកាសផ្ដល់អាហារូបករណ៍១០ កន្លែងដល់សិស្សទី១២ ដែលទទួលបានជ័យលាភីចំនួន១០រូប ក្នុងការប្រឡងប្រកួតប្រជែងគណិតវិទ្យាអង្គរ ដែលរៀបចំឡើងដោយ Bright Consultant Education and Travel Co.,Ltd  ដែលជាក្រុមហ៊ុនផ្តល់សេវាកម្ម ប្រឹក្សាយោបល់ផ្សេងៗ ទាក់ទងនឹងការអភិវឌ្ឍការសិក្សា។

ក្នុងកម្មវិធីប្រឡងប្រកួតប្រជែងគណិតវិទ្យាអង្គរជុំទី៣ដែលជាជុំផ្ដាច់ព្រ័តនេះ មានការអញ្ជើញជាអធិបតីភាព ពីលោក ហែម ស៊ីណារ៉េត ប្រធានមន្ទីរអប់រំយុវជននិងកីឡារាជធានីភ្នំពេញ លោក Ismail Abdul Samat នាយកសាលា Singapore Cambodia International Academy (SCIA) លោកបណ្ឌិត ដេត សុខឧត្តម សាកលវិទ្យាធិការនៃសាកលវិទ្យាល័យផារ៉ាហ្គន ព្រមទាំងនាយកក្រុមហ៊ុន Dovlet Klychnyyazov Bright Consultant Education and Travel Co.,Ltd ផងដែរ ដែលបានប្រារព្ធធ្វើឡើង នៅសាលា Singapore Cambodia International Academy (SCIA) កាលពីថ្ងៃទី១៥ ខែមករា ឆ្នាំ២០២២។

ថ្លែងក្នុងពិធីប្រគល់រង្វាន់ លោក ហែម ស៊ីណារ៉េត បានអំពាវនាវដល់នាយកសាលាគ្រឹះស្ថានអប់រំទាំងអស់បន្តការផ្សព្វផ្សាយដល់សិស្សានុសិស្សឲ្យយល់ពីសារៈសំខាន់ នៃការប្រកួតប្រជែងគណិតវិទ្យា ដើម្បីឲ្យពួកគេអភិវឌ្ឍន៍សម្ថតភាព ការគិតតាមបែបគណិតវិទ្យាឲ្យកាន់តែមានការស្ទាត់ជំនាញ និងមានភាពត្រឹមត្រូវ និងជំរុញលើទឹកចិត្តឲ្យពួកគេបន្តចូលរួមឲ្យបានកាន់តែច្រើនថែមទៀត បើទោះបីពេលនេះ ពួកគេពុំទទួលបានជោគជ័យសម្រាប់ការប្រកួតប្រជែងនេះក៏ដោយ តែនេះជាបទពិសោធន៍សម្រាប់ការចូលរួមប្រឡងប្រកួតប្រជែងលើកក្រោយៗទៀត។

ជាមួយគ្នានេះលោកក៏បានគាំទ្រនិងលើកទឹកចិត្ត ចំពោះការវិនិយោគលើវិស័យអប់រំដែលគ្រឹះស្ថានឯកជន បានចូលរួមការគាំទ្រនិងបង្កើននូវធនធានមនុស្សនៅកម្ពុជា ហើយការវិនិយោគវិស័យឯកជនលើវិស័យអប់រំនេះ បានធ្វើឲ្យ រាជរដ្ឋាភិបាលមានការចំណេញច្រើន។  បន្ថែមលើនេះលោកក៏បានលើកទឹកចិត្តដល់ក្រុមហ៊ុន Bright Consultant Education and Travel Co.,Ltd ឲ្យបន្តសហការជាមួយគ្រឹះស្ថានសិក្សា ឲ្យបានកាន់តែល្អប្រសើរថែមទៀត សម្រាប់ការរៀបចំវគ្គប្រកួតប្រជែងលើកក្រោយៗទៀត។

ក្នុងឱកាសនោះដែរ លោកបណ្ឌិត ដេត សុខឧត្តម សាកលវិទ្យាធិការនៃសាកលវិទ្យាល័យផារ៉ាហ្គន លើកឡើងថា ការចូលរួមប្រឡងប្រកួតប្រជែងគណិតវិទ្យាអង្គរ ច្រើនពីសំណាក់សិស្សានុសិស្ស ក៏ដូចជាការគាំទ្រយ៉ាងពេញទំហឹង ពីសំណាក់អណាព្យាបាលរបស់សិស្សនេះ គឺជាសក្ខីកម្មវឌ្ឍនភាពក្នុងវិស័យអប់រំនៅក្នុងប្រទេសកម្ពុជា ហើយជាការបង្ហាញនូវការផ្លាស់ប្ដូរនៃផ្នត់គំណិតខ្លាំងដែលឲ្យតម្លៃលើវិស័យអប់រំ។

លោកបន្តថា ជាក់ស្ដែងនៅប៉ុន្មានឆ្នាំមុនបន្ទាប់ពីបានធ្វើកំណែទម្រង់ការប្រឡង សញ្ញាបត្រ មធ្យម សិក្សា ទុតិយ ភូមិ ឬ បាក់ ឌុប គឺសិស្សនិទ្ទេសអេ មានតែប៉ុន្មាននាក់ទេ តែដោយឡែកសម្រាប់ឆ្នាំនេះ សិស្សនិន្ទេសអេ មានរហូតដល់ ១៧០០នាក់ជាង។ ដូច្នេះក្នុងសង្គមយើងឥឡូវនេះ បានបង្ហាញឲ្យឃើញពីការផ្ដល់តម្លៃខ្លាំង ទៅវិស័យអប់រំ ជាពិសេសផ្នែកគណិតវិទ្យានេះទៀតសោធ ជាមុខវិជ្ជាក្នុងចំណោមមុខវិជ្ជាផ្សេងៗទៀត។ លោកថា ការបំផុសបំផុល ឲ្យមានការប្រឡងប្រកួតប្រជែងនេះឡើង ជាការបញ្ជាក់ស្មារតីឲ្យសិស្សនិស្សិតរបស់យើងផ្ដល់តម្លៃទៅលើការអប់រំ។

លោកបានបញ្ជាក់ថា ក្នុងនាមលោកជាសាកលវិទ្យាធិការនៃសាកលវិទ្យាល័យផារ៉ាហ្គន សូមគាំទ្រតាមរយៈការលើកទឹកចិត្តនឹងផ្ដល់ជាអាហារូបករណ៍ចំនួន១០កន្លែងដល់សិស្សថ្នាក់ទី១២ ដែលជាជ័យលាភីចំនួន១០រូប ក្នុងការប្រឡង ប្រកួតប្រជែងគណិតអង្គរនេះ។ លោកបន្ថែមថា លោកនឹងប្ដេជ្ញាបន្តផ្ដល់អារូបករណ៍នេះរាល់ឆ្នាំទៅមុខបន្តទៀត។

លោកបណ្ឌិត ដេត សុខឧត្តម ក៏បានលើកទឹកចិត្តដល់ក្រុមហ៊ុន Bright Consultant Education and Travel Co.,Ltd  ឲ្យបន្តរៀបចំកម្មវិធីនេះឡើង ហើយបើសិនជាអាចមិនត្រឹមនៅរាជធានីភ្នំពេញទេ គឺទូទាំងប្រទេស ឬអាចឈានរហូតដល់ជួយបញ្ជូនសិស្សរបស់យើង ទៅប្រកួតនៅថ្នាក់អន្តរជាតិ ដើម្បីផ្ដល់ឱកាសដល់សិស្សរបស់យើង មានឱកាសក្នុងការបញ្ចេញសម្ថតភាព ក្នុងការប្រកួតនៅលើឆាកអន្តរជាតិ នឹងនាំមកវិញ នូវមុខមាត់ជូនដល់ប្រទេសជាតិយើង។

គោលបំណងនៃការប្រកួតប្រជែងគណិតវិទ្យាអង្គរនេះឡើងគីដើម្បីលើកទឹកចិត្តសិស្សថ្នាក់ទី ៥-១២ ឱ្យខិតខំសិក្សាមុខវិជ្ជាគណិតវិទ្យាឱ្យបានពូកែ ,អភិវឌ្ឍជំនាញដោះស្រាយបញ្ហាតាមបែបគណិតវិទ្យា តួយ៉ាងសម្រាប់សិស្សដែលមានទេពកោសល្យ ,អភិវឌ្ឍជំនាញគិតបែបច្នៃប្រឌិត ការសម្រេចចិត្ត និងវិភាគស្ថានការណ៍ ,គាំទ្រការខិតខំអភិវឌ្ឍវិជ្ជាជីវៈ ដើម្បីធ្វើឱ្យប្រសើរឡើងនូវកម្រិតជំនាញរបស់គ្រូបង្រៀនផ្នែកគណិតវិទ្យាបច្ចុប្បន្ន។

សូមរំលឹកផងដែរថា ការប្រកួតប្រជែងគណិតវិទ្យាអង្គរទាំងអស់មាន ៣ជុំ ដំណាក់កាលពីរដំបូងនៃការប្រកួតប្រជែងគណិតវិទ្យាអង្គរនេះ ដោយជុំទី១ ធ្វើឡើងតាមប្រព័ន្ធអនឡាញ នៅថ្ងៃទី០២ ខែតុលា ឆ្នាំ២០២១ ,ជុំទី២ ធ្វើឡើងតាមប្រព័ន្ធអនឡាញ នៅថ្ងៃទី០៦ ខែវិច្ឆិកា ឆ្នាំ២០២១ និងជុំទី៣ ដែលជាវគ្គផ្តាច់ព្រ័ត្រគឺរៀបចំឡើងនាសាលា Singapore Cambodia International Academy (SCIA) នៅថ្ងៃទី១៥ ខែមករា ឆ្នាំ២០២២។ ចំពោះតម្លៃចូលរួមប្រកួតសម្រាប់សិស្សគ្រប់ៗរូប ជុំទី១តម្លៃ ៖ $២.៥, ជុំទី២ ៖ $២.៥, និងតម្លៃវគ្គផ្តាច់ព្រ័ត្រ ៖ $២.៥។ សម្រាប់ជុំទី១ ជំរុះយកបេក្ខជនចំនួន ៥០% ដើម្បីទៅប្រកួតនៅជុំទី២ ចំណែកឯជុំទី២ ក៏ជំរុះយកបេក្ខជនចំនួន ៥០% ដើម្បីទៅប្រកួតវគ្គផ្តាច់ព្រ័ត្រ។ ក្នុងវគ្គផ្តាច់ព្រ័ត្រនេះផងដែរមាន១៥២សាលាចូលរួមដោយមកពីបណ្ដាខេត្តផ្សេងៗគ្នា ចំពោះអ្នកបានចូលរួមប្រកួត៥៥០នាក់ ក្នុងនោះ២២៥នាក់នឹងទទួលបានមេដាយសំរឹត ,១៧៥នាក់ ទទួលបានមេដាយប្រាក់ ,១០០នាក់ទទួលបានមេដាយមាសចំនួន១០០។

រង្វាន់ជ័យលាភីលំដាប់កំពូលទាំង ១០ ពីវិញ្ញាសានីមួយៗនឹងទទួលបានរង្វាន់ជាច្រើនដូចជា៖ កុំព្យូទ័រយួរដៃ ថេបប្រូត កង់ កុំព្យូទ័រ Chrome Books ឧបករណ៍អានសៀវភៅ (ebook reader) នាឡិកាឆ្លាតវៃ -ល-៕

ភ្នំពេញ ៖ សុវណ្ណារី វីឡាគម្រោងទី៥ សព្វថ្ងៃជាគម្រោង មួយដែលទទួលបានការគាំទ្រ ពីអតិថិជន និងសាងភាពលេចធ្លោ ជាងគេនៅក្នុងតំបន់ សក្ដានុពល ទីតាំងភូមិផ្លាំង សង្កាត់ស្នោរ ខណ្ឌកំបូល រាជធានីភ្នំពេញ ដែល ត្រូវសម្ភោធគម្រោងថ្មី ជាផ្លូវការ នៅថ្ងៃទី១៥ ខែមករា ឆ្នាំ២០២២ ដើម្បីផ្តល់ជូនអតិថិជននូវ ផ្ទះបែបប្រណិតប្រភេទថ្មី តម្លៃសមរម្យ ។

លោកស្រី ហេង សុវណ្ណារី អគ្គនាយិការនៃ ក្រុមហ៊ុន សុវណ្ណារី វីឡា បានមានប្រសាសន៍ថា សន្ទុះនៃការគាំទ្ររបស់អតិថជនបែបនេះហើយ ទើបធ្វើឱ្យក្រុមហ៊ុន សុវណ្ណារី វីឡា ប្រឹងប្រែងកាន់តែខ្លាំងបន្ថែម បន្តរក្សា គុណភាព សោភ័ណ្ឌ ផាសុខភាព ស្តង់ដារសំណង់ឱ្យកាន់​ តែល្អប្រសើរឡើងជាលំដាប់ ។

លោកស្រីបានបន្តថា គម្រោងទី៥ របស់សុវណ្ណារី វីឡា មានប្រភេទវីឡា Sakura Villa , Luxury Villa និងជា ប្រភេទShop House ស្ថិតនៅក្នុងតំបន់សក្តានុពល សម្រាប់ការរស់នៅ និងប្រកបអាជីវកម្មបាន។ ក្នុងនោះ ក្រុមហ៊ុនមានថែមជូននូវកាដូរជាច្រើនដល់អតិថជន ដូចជា ការកាត់ប្លង់រឹងផ្ទេរសិទ្ធជូន១០០% ថែមទូដាក់ចានលើកក្រោម១ ឈុត ម៉ាស៊ីន ត្រជាក់៤គ្រឿង ម៉ាស៊ីនបឺតក្លិន ម៉ាស៊ីនទឹកក្តៅទឹកត្រជាក់ និងរបងផ្ទះ៣ជ្រុងផងដែរ ។

លោក ហែម ដារិទ្ធ អភិបាលនៃ គណៈអភិបាលខណ្ឌពោធិ៍សែនជ័យ បានមានប្រសាសន៍ កោតសរសើរដល់ក្រុមហ៊ុន សុវណ្ណារី វីឡា ដែលបានបង្កើត គម្រោងជាច្រើន ក្នុងទឹកដីខណ្ឌពោធិ៍សែនជ័យ ដែលជាការទាក់ទាញការវិនិយោគ ក៏ដូចជាលើកស្ទួយជីវភាពប្រជាពលរដ្ឋ ក្នុងនៅមូលដ្ឋាន ក្រោយបានចូលរួមកសាងហេដ្ឋារចនាសម្ព័ន្ធ បានយ៉ាងល្អ ក៏ដូចជាលំនៅដ្ឋានពលរដ្ឋមានស្តង់ដារ ដែលជួយសម្រួល ដល់ការរស់នៅរបស់ពួកគាត់កាន់ តែល្អប្រសើរជាងមុន។ លោកអភិបាលខណ្ឌក៏មិនភ្លេច អំពាវនាវឱ្យប្រជាពលរដ្ឋ ក៏ដូចជាភ្ញៀវដែលបានចូលរួម បង្កើនការប្រុងប្រយ័ត្ននូវជំងឺកូវីដ១៩ ដោយអនុវត្តវិធានការសុខភិបាល៣ការពារ ៣កុំ ឱ្យបានខ្ជាប់ខ្ជួន៕

ភ្នំពេញ៖ លោកឧកញ៉ា ទៀ វិចិត្រ និងលោកស្រី ហេង គីមជី កាលពីថ្ងៃទី១២ ខែមករា ឆ្នាំ២០២២ បានចាត់តំណាង នាំយកអំណោយជា កង់ ស្បៀងអាហារ និងថវិកា បានឧបត្ថម្ភជូនដល់បុរសពិការមួយរូប មានជីវភាពក្រីក្រខ្វះខាត ចិញ្ចឹមកូន២នាក់នៅក្នុងបន្ទុក បច្ចុប្បន្នរស់នៅខេត្តព្រៃវែង។

ជំនួយទាំងនេះ ត្រូវបានលោកឧកញ៉ា ទៀ វិចិត្រ ចាត់ក្រុមការងារ នាំយកទៅជូនដល់លំនៅដ្ឋានគ្រួសារ​ បុរសពិការរូបនេះ នៅភូមិស្វាយ៣០ ឃុំជើងភ្នំ ស្រុកបាភ្នំ ខេត្តព្រៃវែង។ លោកឧកញ៉ា ឲ្យដឹងបន្ថែមថា បុរសពិការរូបនេះមានឈ្មោះ ឡឹក សារ៉ាវន់ អាយុ៤១ឆ្នាំ សព្វថ្ងៃរស់នៅចិញ្ចឹមកូន ២នាក់តែឯង ដោយប្រពន្ធចេញទៅធ្វើការ នៅប្រទេសជិតខាង ហើយក៏បាត់ដំណឹងដល់សព្វថ្ងៃ។

ដោយជីវភាពក្រីក្រលំបាកខ្លាំងពេក និងកូនៗរបស់រូបលោកត្រូវធ្វើដំណើរ ទៅរៀនឆ្ងាយជារៀងរាល់ថ្ងៃ ទើបបុរសពិការខាងលើ បានស្នើសុំជំនួយពីលោកឧកញ៉ា ទៀ វិចិត្រ និងលោកជំទាវ ហេង គីមជី។ បន្ទាប់ពីទទួលបានព័ត៌មានភ្លាម លោកឧកញ៉ា ទៀ វិចិត្រ និងលោកជំទាវ បានចាត់ក្រុមការងារ នាំយកអំណោយទៅឧបត្ថម្ភ ដល់គ្រួសារបុរសពិការខាងលើ មានដូចជា៖-កង់ចំនួន២គ្រឿង សំរាប់ផ្តល់ជូនកូនទាំង២ នាក់ជិះធ្វើដំណើរទៅសាលារៀន-អង្ករ ចំនួន ៣បាវ ស្មើ១៥០គីឡូក្រាម-មី ចំនួន ៣កេស-ទឹកសុីអុីវ ចំនួន ៣យួរ -ស្ករស ចំនួន ៤គីឡូក្រាម -បីចេង ចំនួន ២គីឡូក្រាម -ត្រីខ ចំនួន ១កេសធំនិង ថវិកា ចំនួន ៥លានរៀល។

ក្រោយទទួលបានអំណោយមនុស្សធម៌ពីលោកឧកញ៉ា ហើយនោះ បុរសពិការរូបនេះ បានគោរពថ្លែងអំណរគុណ លោកឧកញ៉ា ទៀ វិចិត្រ និងលោកស្រី ហេង គីមជី ដែលបានឧបត្ថម្ភដល់គ្រួសាររបស់គាត់ និងបានគោរពជូនពរលោកឧកញ៉ា និងលោកស្រី ព្រមទាំងក្រុមគ្រួសារ​ ជួបតែសេចក្តីសុខចំរើនផងដែរ៕

អស់រយៈពេលជាច្រើន​ សតវត្សរ៍មកហើយ ការអប់រំ​ផ្ដោតសំខាន់​ទៅលើ ​មធ្យោបាយ​បំពាក់បំប៉ន​មនុស្ស​ ជំនាន់ក្រោយ​ឲ្យមានជំនាញ ​និង​ចំណេះដឹងជាមូលដ្ឋាន​សម្រាប់​ការប្រកប​របរ​ចិញ្ចឹម​ជីវិត ។ ប៉ុន្តែ នៅពេល​ដែល​ឧស្សាហកម្ម​ មាន​ការវិវត្ត​ឥតឈប់​ឈរ ការអប់រំបែប​ប្រពៃណី ​គឺលែងគ្រប់គ្រាន់ទៀតហើយ ។

មនុស្ស​ក្មេងៗគឺជា​កម្លាំងពលកម្ម​ នាពេល​អនាគត​របស់​ប្រទេស​នីមួយៗ ហើយ​ការវិនិយោគបរទេស​ពឹងផ្អែក​ ទៅលើ​ធនធានមនុស្ស​ដែល​អាចរកបាន ។ កម្ពុជា​គឺជាប្រទេស​កំពុងអភិវឌ្ឍន៍​ដែលត្រូវការចាំបាច់​បំផុត​ នូវ​ធនធានមនុស្ស​កាន់តែច្រើនថែមទៀត ។ ជាមួយនឹងវិនិយោគបរទេស អនាគតរបស់ប្រទេសនេះ ​មាន​សក្ដានុពលខ្លាំង ប្រសិនបើ​ខ្លួន​អាច​សម្រប​ទៅតាម​បដិវត្តន៍ ឧស្សាហកម្ម​ទាំងឡាយ ។

ក្នុងពេល​កន្លង​មក ពិភព​លោក​បាន​ឆ្លងកាត់​នូវ​ ដំណាក់កាល​បដិវត្តន៍ឧស្សាហកម្ម​ ដូចខាងក្រោមនេះ ៖

-បដិវត្តន៍ឧស្សាហកម្មលើកទី១ បានចាប់ផ្ដើម​ឡើង​ជាមួយ នឹងការ​បង្កើត​នូវ​ម៉ាស៊ីន​ប្រើ​ចំហាយ​ទឹក ដែល​គេ​ប្រើប្រាស់ទៅ​លើ​ការផលិត​ ផលិតផល​ជាច្រើន​នៅតាម​រោងចក្រ ។

-បដិវត្តន៍ឧស្សាហកម្ម​លើកទី២ គឺជារបក​គំហើញ​ថ្មី​ផ្នែក​ឧស្សាហកម្ម នៅក្នុង​ផលិតកម្ម​ដែល​មាន​បរិមាណធំៗ ជាមួយនឹងការ​ប្រើប្រាស់​អគ្គិសនី ឥន្ធនៈ និង​ការផលិតដែកថែប​កម្រិត​ខ្ពស់ ។

-បដិវត្តន៍ឧស្សាហកម្ម​លើក​ទី៣ គឺជាការចាប់ផ្ដើម​នៃយុគសម័យ​ឌីជីថល​​ ដែល​ជា​សម័យកាល​មួយ​ដែល​គេ ចាប់ផ្ដើម​ប្រើប្រាស់​កុំព្យូទ័រ អ៊ីនធឺណិត និង​បណ្ដាញ​ទូរសព្ទ​ចល័ត ។

-បដិវត្តន៍ឧស្សាហកម្ម​លើកទី៤ គឺជា​អនុផល​នៃ​បច្ចេកវិទ្យាជំនាន់ទី៣​ ដែល​ជា​ការធ្វើ​ស្វ័យប្រវត្តិកម្ម​ ដោយ​ប្រព័ន្ធ​កុំព្យូទ័រ​ និង​មនុស្ស​យន្ត​ដើម្បីបំពេញទៅតាម​សេចក្ដីត្រូវការជាបុគ្គល ។

ប្រព័ន្ធអប់រំ​ជាប្រពៃណី​ ផលិត​នូវ​ជំនាញ​ និងចំណេះដឹង​ដែល​ប្រព័ន្ធនោះ ​រំពឹងចង់​ឲ្យអ្នក​សម្រេច​ឲ្យ​បាន ។ ការអប់រំប្រភេទនេះ​បង្កើត បាននូវ​ធនធានមនុស្ស​ទូទៅធម្មតា ដែលមិន​មាន​សមត្ថភាព​សម្របខ្លួន ​ទៅតាម​បដិវត្តន៍ឧស្សាហកម្ម​ បន្ទាប់នាពេល​ខាងមុខ​នោះឡើយ ៖ មនុស្ស​យន្តដែលគេ​បញ្ជា​ ដោយ​កម្មវិធីកុំព្យូទ័រ និង​ការប្រើប្រាស់ AI នៅក្នុង​វិស័យ​ធ្វើដំណើរ ផលិតកម្មនិង​ការដឹកជញ្ជូន​ទំនិញ ។

ចំណេះ​ធ្វើ​ផ្នែក​ឌីជីថល​ នឹងសំខាន់​កាន់តែខ្លាំង ​ពីព្រោះពិភព​លោក​នឹង​ប្រែប្រួល ។ បច្ចេកវិទ្យាគឺជា​សសរ​ស្ដម្ភ ​នៅក្នុងការកំណត់​អនាគត​ ។ ភាពប្រឈម គឺ​ការអភិវឌ្ឍ​ជំនាញ​ឌីជីថល​របស់​សិស្សនិស្សិត​ ដើម្បី​ឲ្យ​ពួកគេ​អាច​ប្រើប្រាស់​ ជំនាញ​ឌីជីថលទាំងនេះបាន នៅពេលដែលពួកគេ​ ចូលក្នុង​កម្លាំង​ពលកម្ម ។

SIS Cambodia ជាប្រព័ន្ធដែល​ធ្វើ​ឌីជីថលូបកម្ម​ ការអប់រំ​សម្រាប់​សាលារៀនទាំងអស់​ នៅ​កម្ពុជា ។ កម្មវិធី​នេះ​មានបំណង​ប្រែក្លាយ ​សាលារៀនបែបប្រពៃណី​ឲ្យ​ទៅជា​កម្មវិធីអនឡាញដ៏ទំនើប​ទាន់​សម័យ ។ នៅ​ក្នុង​ដំណាក់កាលដំបូងៗ កម្មវិធីនេះ​ផ្ដោត​ទៅលើ ​វិស័យ​បច្ចេកវិទ្យាចំនួន ៥ រួមមាន៖ ១.ព័ត៌មាន​និង​ទិន្នន័យ, ២.ទំនាក់ទំនង​ និងកិច្ច​សហប្រតិបត្តិការ, ៣.ការបង្កើត​មាតិកា, ៤.ការការពារ និងសន្តិសុខ និង៥.បរិយាកាស​ឌីជីថល ។

ជាមួយនឹងអំណះអំណាង​ ដូចបានរៀបរាប់ខាងលើ​នេះ ឥឡូវនេះជាពេលវេលា​ដ៏សំខាន់​ ក្នុងការ​ងាក​មក​ណែនាំ​ បច្ចេកវិទ្យាឌីជីថល​ដល់​សិស្សានុសិស្ស​ ក្នុងលក្ខណៈមួយដែលងាយស្រួល ប្រើ​ជាទីបំផុត​និង​មិនធ្វើ​ឲ្យសិស្ស​ភ័យខ្លាច ។ ជាមួយនឹង​ការអប់រំ​បែប​ឌីជីថល និង SIS Cambodia សិស្សានុសិស្សគ្រប់រូប​អាច​សម្រេចក្ដីសុបិន​របស់ ពួកគេ​តាមអនឡាញ​បាន ។

ក្រសួងអប់រំ យុវជន និងកីឡា បាន​ចាប់ដៃគូ​សហការជាមួយ​ក្រុមហ៊ុន មិត្តហ្វូន ដើម្បី​ធ្វើ​ឌីជីថលុបនីយ​កម្ម​ការអប់រំ និង​ជំរុញ​សាលារៀនទាំងអស់ ​ឲ្យ​ងាកមក​រក​ប្រព័ន្ធ​អនឡាញ ។ មិត្តហ្វូន បាន​ចែកចាយ​ស៊ីមកាត​ដែល​អាច ប្រើអ៊ីនធឺណិត​ដោយ​មិនគិតថ្លៃ ហើយ​កម្មវិធី SIS Cambodia អាចដោនឡូត​ចូលទូរសព្ទដៃ​ បាន​យ៉ាង​ងាយស្រួលជាទីបំផុត បន្ទាប់មក កម្មវិធីសិក្សារបស់សាលា នឹងត្រូវ​ដាក់បញ្ចូល​នៅក្នុង​កម្មវិធីនេះ ដើម្បី​ជួយ​សម្រាលបន្ទុក​ចំណាយ ​របស់​សិស្សានុសិស្ស​មកពីគ្រួសារ ដែលមានជីវភាព​មិន​សូវធូរធារ ៕