(ភ្នំពេញ)÷ ថ្ងៃទី 29 ខែតុលា ឆ្នាំ២០២១ ភោជនីយដ្ឋាន និងកាហ្វេ អ៊ីអ៊ែនអឹម (E&M) បានរៀបចំកម្មវិធីសប្បុរសធម៌ក្រោមយុទ្ធនាការបេសកកម្មតែមួយ(One Mission Campaign) បន្តចែកអាហារចំនួន១០០០កញ្ចប់ ដោយការជិះស៊ីក្លូចែកអាហារ ដល់ប្រជាពលរដ្ឋដែលមានជីវភាពខ្វះខាតនៅតាមដងវិថីឆ្ពោះទៅកាន់វត្តភ្នំ ដើម្បីជាការចូលរួមចំណែកជួយគ្នាក្នុងគ្រាដ៏លំបាកនៃជម្ងឺរាតត្បាតសកលCovid-19។

យោងតាមប្រភពពត៌មានបានឲ្យដឹងថាភោជនីយដ្ឋាន និងកាហ្វេ អ៊ីអ៊ែនអឹមមានគោលបំណងបន្តចែកអាហារដល់ប្រជាពលរដ្ឋក្នុងរយៈពេល៤ខែជាប់ៗគ្នា រហូតដល់ ១០០០ កញ្ចប់ ដើម្បីចូលរួមជួយសម្រាលការលំបាករបស់បងប្អូនកម្ពុជាបានខ្លះៗ ទៅតាមលទ្ធភាពដែលខ្លួនអាចធ្វើបាន។

បន្ថែមលើសពីនេះទៅទៀត ពួកយើងក៏ត្រូវតែបន្តអនុវត្តនូវគោលការណ៍៣កុំ៣ការពាររបស់រាជរដ្ឋាភិបាលដើម្បីចូលរួមប្រយុទ្ធប្រឆាំងនិងជម្ងឺដ៏កាចសាហាវនេះ។

រួមជាមួយគ្នានេះដែរ​​​​​​ ភោជនីយដ្ឋាន និងកាហ្វេ អ៊ីអ៊ែនអឹម(E&M) ក៏សូមថ្លែងអំណរគុណដល់ម្ចាស់ Gold Sponsor គឺ ក្រុមហ៊ុនMega Catering និង​ ក្រុមហ៊ុនBreeze Creative Solution ដែលបានចូលរួមចំណែកឧបត្ថម្ភក្នុងយុទ្ធនាការបេសកកម្មតែមួយ (One mission Campaign) នេះ និងសូមថ្លែងអំណរគុណដល់ ក្រុមហ៊ុន Chip Mong Retail ដែលបានចូលរួមចំណែកឧបត្ថម្ភជាភេសជ្ជៈក្នុងកម្មវិធីចែកអាហារ១០០០កញ្ចប់នេះផងដែរ។​

គួរឲ្យដឹងផងដែរថា ភោជនីយដ្ឋាន និងកាហ្វេ អ៊ីអ៊ែនអឹម(E&M)បានបង្កើតឡើងនៅក្នុងឆ្នាំ២០១៤ ដោយមានការគាំទ្រពីសំណាក់អតិថិជន រហូតមកដល់បច្ចុប្បន្នភោជនីយដ្ឋាន និងកាហ្វេ អ៊ីអ៊ែនអឹម (E&M)មានសាខាចំនួន២ សាខាទី១នៅបឹងកេងកង និង ទី២នៅផ្សារទំនើបជីបម៉ុងបាក់ទូក។

​លក្ខណៈពិសេសរបស់ ភោជនីយដ្ឋាន និងកាហ្វេ អ៊ីអ៊ែនអឹម(E&M) គឺការផ្តល់ជូនអតិថិជននូវបរិយាកាសមួយដ៏សម្បូរបែប ម្ហូបអាហារឈ្ងុយឆ្ងាញ់ជាច្រើនមុខ ភេសជ្ជៈជាច្រើនជម្រើស និងស្វាគម៍ដោយភាពកក់ក្តៅ៕

ភ្នំពេញ៖ លោកឧកញ៉ា ទៀ វិចិត្រ សមាជិកក្រុមការងារយុវជន​ គណបក្សប្រជាជនកម្ពុជា ខេត្តព្រះសីហនុ និងលោកស្រី ហេង គឹមជី នៅថ្ងៃទី២៨ ខែតុលា ឆ្នាំ២០២១ បានចាត់ក្រុមការងារ នាំយកថវិការ ចំនួន ៥០០ដុល្លារ ទៅឧបត្ថម្ភដល់ លោក អ៊ុ ពិសិទ្ធ ជាអ្នកចម្រៀងច្រៀងតាមរោងការ កំពុងមានជំងឺស្វិតសរសៃជើង និងពុកឆ្អឹងត្រកៀកធ្ងន់ធ្ងរដើរមិនរួច រស់នៅ ក្រុម១៧ ភូមិ១ សង្កាត់១ ក្រុងព្រះសីហនុ។

លោក អ៊ុ ពិសិទ្ធ បានគោរពថ្លែងអំណរគុណ​ យ៉ាងជ្រាលជ្រៅបំផុតចំពោះ លោកឧកញ៉ា ទៀ វិចិត្រ និងលោកជំទាវ ហេង គឹមជី ដែលបានឧបត្ថម្ភថវិកាចំនួន ៥០០ដុល្លារ ដើម្បីឲ្យរូបលោកបានយកថវិកានេះ ទៅព្យាបាលជំងឺ រួមទាំង ដោះស្រាយជីវភាពបន្ត និងបានជូនពរលោកឧកញ៉ា និងលោកជំទាវ ព្រមទាំងក្រុមគ្រួសារ សូមមានសុខភាពល្អបរិបូណ៌ អាយុយឺនយូរ ជៀសផុតពីជំងឺដង្កាត់ផងទាំងពួង និងបានប្រកបដោយពុទ្ធពរទាំងឡាយ បួនប្រការគឺ អាយុ វណ្ណៈ សុខ: ពលៈ គប្បីភ្លៀងឃ្លាតឡើយ ៕

ភ្នំពេញ៖ ថ្ងៃទី២៨ ខែតុលា ឆ្នាំ២០២១ ក្រុមហ៊ុន ហនុមាន ប៊ែវើរីជីស ឯ.ក បានរៀបចំប្រារព្ធពិធីជួបជុំដៃគូ អាជីវកម្មរបស់ខ្លួនជាលើកដំបូង នៅរោងចក្រផលិតស្រាបៀរហនុមាន ដែលមានទីតាំងស្ថិតនៅ ផ្លូវជាតិលេខ ៤ ភូមិត្រពាំងវែង ឃុំឆក់ឈើនាង ស្រុកអង្គស្នួល ខេត្តកណ្តាល ដើម្បីចុះហត្ថលេខា លើកិច្ចសហការជាផ្លូវការ ព្រមទាំងបើកបង្ហាញនូវខ្សែសង្វាក់ផលិតកម្ម របស់ខ្លួនជាលើកដំបូង ដល់ដៃគូចែកចាយស្រាបៀរហនុមានទូទាំងប្រទេស។

កម្មវិធីនេះ ក៏មានការសំណេះសំណាលជំនួបពិសេសក្នុងន័យផ្សារភ្ជាប់ និងបង្កើនទំនាក់ទំនង ភាពជា ដៃគូដ៏រឹងមាំ ក្នុងដំណើរការចែកចាយបន្តទៅដល់អតិថិជនទូទាំងប្រទេស ដើម្បីជំរុញបន្ថែមលើទំនុកចិត្តក៏ដូចជាប្រសិទ្ធិភាព នៃកិច្ចសហការឆ្ពោះទៅភាពជោគជ័យប្រកបដោយបរិយាប័ន និងនិរន្តរភាពរួមគ្នា។

បន្ទាប់ពីបញ្ចប់ទស្សនកិច្ចខ្សែសង្វាក់ផលិតកម្មស្រាបៀរហនុមានរួចមក បណ្តាដៃគូអាជីវកម្មទាំងអស់ បានកោត សរសើរចំពោះទំនើបកម្ម និងភាពសម្រិតសម្រាំងយ៉ាងហ្មត់ចត់ដ៏ល្អឥតខ្ចោះ នៃការផលិតស្រាបៀរហនុមាន ដែលរាប់ចាប់តាំងពីការជ្រើសរើសគ្រឿងផ្សំ រហូតដល់ការវេចខ្ចប់ផលិតផលសម្រេច ដោយបានឆ្លងកាត់នូវដំណាក់កាលផលិត ក៏ដូចជាការពិសោធន៍ត្រឹមត្រូវតាមបទដ្ឋានស្តង់ដារមុននឹងចែកចាយនៅលើទីផ្សារ។

ក្រុមហ៊ុនហនុមាន ប៊ែវើរីជីស ឯ.ក ត្រូវបានបង្កើតឡើងដោយកូនខ្មែរ ជាមួយទុនវិនិយោគប្រមាណ ១៦០ លានដុល្លារ ដែលបំពាក់ដោយបច្ចេកវិទ្យាទំនើបចុងក្រោយបង្អស់ពីអឺរ៉ុប ស្របទៅតាមបទដ្ឋានស្តង់ដារលំដាប់ពិភពលោក ដោយមានសមត្ថភាពផលិតរហូតដល់ប្រមាណ ៣០លានកេស ក្នុងមួយឆ្នាំ ពោលគឺនឹងផ្តល់ឱកាសការងារប្រមាណជាង ១,៦០០កន្លែង ព្រមជាមួយការប្តេជ្ញាចិត្តដ៏មោះមុត ក្នុងការរួមចំណែកអភិវឌ្ឍសេដ្ឋកិច្ច នៃព្រះរាជាណាចក្រកម្ពុជា ស្របជាមួយទិសដៅរបស់រាជរដ្ឋាភិបាលដែលបាន នឹងកំពុងជំរុញដល់ការបង្កើនវិស័យឧស្សាហកម្មផលិតក្នុងស្រុក។

លោក Chas GESCHKE នាយកប្រតិបត្តិក្រុមហ៊ុនហនុមានប៊ែវើរីជីស បានមានប្រសាសន៍ថា “បន្ទាប់ពីការសាងសង់អស់រយៈពេលជាងពីរឆ្នាំ យើងបានឆ្លងកាត់នូវឧបសគ្គជាច្រើន ក្នុងស្ថានភាពការរីករាលដាលនៃជំងឺ កូវីដ-១៩ ដែលបានជះឥទ្ធិពលដល់ល្បឿននៃការសាងសង់របស់យើង។ យ៉ាងណាមិញក្រុមហ៊ុនបានខិតខំស្វែងរក ដំណោះស្រាយក្នុងការជំរុញដំណាក់កាលនីមួយៗបន្តទៅមុខជានិច្ច។ ទីបំផុតយើងសម្រេច បាននូវគោលដៅដំបូងរបស់ក្រុមហ៊ុន។ យើងពិតជាមោទកភាពក្នុងការទទួលបានជោគជ័យ នៃការផលិតនូវផលិតផលដំបូងរបស់យើង គឺស្រាបៀរហនុមាន-Hanuman Premium Lager ព្រមទាំងបានចែកចាយលើទីផ្សារកាលពីថ្មីៗនេះ ។

លោកក៏បានបន្តទៀតថា “នេះទើបតែជាការចាប់ផ្តើមប៉ុណ្ណោះ យើងនឹងមានផលិតផលសក្តានុពលជាច្រើនទៀត នាពេលដ៏ខ្លីខាងមុខនេះ ដើម្បីបំពេញនូវតម្រូវការ របស់អតិថិជន ដែលតែងតែទន្ទឹងរង់ចាំនូវផលិតផលថ្មីប្លែក ហើយមានគុណភាពពិតប្រាកដ”។

លោកជំទាវ ខៀវ សស៊ីលៀប ស្ថាបនិកា និងអគ្គនាយិកាក្រុមប្រឹក្សាភិបាលក្រុមហ៊ុន ហនុមាន ប៊ែវើរីជីស ក៏បានមានប្រសាសន៍ដែរថា៖ ផលិតផលដំបូងរបស់យើង ទទួលបានការគាំទ្រពេញចិត្ត និងកោតសរសើរមិនដាច់ពីមាត់ ពីសំណាក់បងប្អូនប្រជាជនកម្ពុជា និងភ្ញៀវអន្តរជាតិ អំពីរសជាតិដ៏ឆ្ងាញ់ គុណភាពល្អ និងមានរូបរាងគួរឲ្យទាក់ទាញ ដែលនេះជាសមិទ្ធផលផ្លែផ្កាដ៏វិសេសវិសាលដំបូងសម្រាប់ក្រុមហ៊ុន។

លោកជំទាវក៏បានបន្ថែមថា ក្រុមហ៊ុនមានចក្ខុវិស័យវែងឆ្ងាយប្រកបដោយវិសាលភាព។ យើងផ្តោតសំខាន់លើ ឧត្តមភាព នៃគុណតម្លៃ ក្នុងការផ្តល់បរិយាកាសការងារល្អដល់បុគ្គលិក ស្ថិរភាពលើគុណភាពផលិតផល ក៏ដូចជាការគាំទ្រលើយុទ្ធសាស្រ្តល្អៗ ដើម្បីនិរន្តរភាពដល់ការពង្រីកអាជីវកម្មជាចម្បង ជាពិសេសគឺជំរុញបន្ថែមលើការកសាងគុណភាពម៉ាកសញ្ញាកូនខ្មែរទៅកាន់សកលលោក៕

ឆ្ពោះទៅរកចង្កោមសកម្មភាពនៃកិច្ចប្រជុំកំពូល អាស៊ាន គ្រោងនឹងប្រព្រឹត្តឡើងពីថ្ងៃទី ២៦ ដល់ថ្ងៃទី ២៨ ខែ តុលា ឆ្នាំ ២០២១ ខាងមុខ សមាគមប្រជាជាតិ អាស៊ីអាគ្នេយ៍ បានរៀបចំកិច្ចប្រជុំជាច្រើនតាមប្រព័ន្ធវីដេអូសម្រាប់ពិនិត្យមើលឡើងវិញអំពីការងារត្រៀមរៀបចំ កម្មវិធីសកម្មភាព របៀបវារៈ ក៏ដូចជាសេចក្តីព្រាងពិធីសារទាំងឡាយដែលនឹងត្រូវបានដាក់ជូនក្រុមថ្នាក់ដឹកនាំកំពូលតំបន់។ ក្នុងចំណោមនោះ មានកិច្ចប្រជុំមន្រ្តីជាន់ខ្ពស់ (SOM) អាស៊ាន (ថ្ងៃទី ៣០ ខែ កញ្ញា) កិច្ចប្រជុំរដ្ឋមន្ត្រីការបរទេស អាស៊ាន កិច្ចប្រជុំក្រុមប្រឹក្សាសហគមន៍នយោបាយ – សន្តិសុខ អាស៊ាន លើកទី ២៤  (APSC-24) ប្រព្រឹត្តឡើងកាលពីថ្ងៃទី ០៤ ខែ តុលា កន្លងទៅ …

នៅក្នុងកិច្ចប្រជុំទាំងនោះ តំណាងប្រទេសទាំងឡាយបានផ្លាស់ប្ដូរទស្សនៈគ្នាទៅវិញទៅមកលើអាទិភាពនានារបស់ អាស៊ាន ក្នុងឆ្នាំ ២០២១ អះអាងបញ្ជាក់ពីការគាំទ្រចំពោះគំនិតផ្តួចផ្តើមរបស់ប្រធាន ប្រ៊ុយណេ អំពីការបង្កើនកម្លាំងចម្រុះរបស់ អាស៊ាន ក្នុងការឆ្លើយតបជាមួយនឹងគ្រោះមហន្តរាយធម្មជាតិ (ខែលការពារ អាស៊ាន) ជំរុញលទ្ធិពហុភាគីនិយម កិច្ចសហប្រតិបត្តិការក្នុងវិស័យសេដ្ឋកិច្ចដែលពឹងផ្អែកលើសមុទ្រ។ ថ្នាក់ដឹកនាំនៃប្រទេសនានាក៏បានផ្លាស់ប្តូរទស្សនៈគ្នាទៅវិញទៅមកនិងកត់សម្គាល់ពីវឌ្ឍនភាពនៃការអនុវត្តលទ្ធផលរបស់ អាស៊ាន ២០២០។ ក្នុងចំណោមនោះ មានការពិនិត្យមើលឡើងវិញអំពីការងារអនុវត្តធម្មនុញ្ញ អាស៊ាន កសាងចក្ខុវិស័យសហគមន៍ អាស៊ាន ក្រោយឆ្នាំ ២០២៥ និងកិច្ចសហប្រតិបត្តិការអនុតំបន់។ល។

គំនិតផ្តួចផ្តើមទាំងឡាយដែលបានស្នើឡើងក្នុងឆ្នាំ ២០២០ ឆ្នាំដែលប្រទេស វៀតណាម ជាប្រធាន អាស៊ាន ត្រូវបានវាយតម្លៃខ្ពស់និងផ្លាស់ប្ដូរទស្សនៈគ្នាទៅវិញទៅមកដើម្បីអនុវត្តបន្ត។ ជាពិសេស ចំពោះគំនិតផ្តួចផ្តើម របស់ វៀតណាម អំពីការបង្កើតឃ្លាំងបម្រុងសម្ភារៈវេជ្ជសាស្ត្រ អាស៊ាន និងមូលនិធិ អាស៊ាន សម្រាប់ឆ្លើយតបនឹងការរីករាលដាលនៃជំងឺកូវីដ-១៩ អង្គប្រជុំអបអរសាទរចំពោះការណ៍ដែល អាស៊ាន បានផ្ទេរទឹកប្រាក់ជំនួយមនុស្សធម៌លើកដំបូង រួមទាំងគ្រឿងបរិក្ខារពេទ្យដែលមានតម្លៃចំនួន ១,១ លានដុល្លារ អាម៉េរិក អោយសមាគមកាកបាទក្រហម មីយ៉ាន់ម៉ា (ថ្ងៃទី ១៥ ខែ កញ្ញា ឆ្នាំ ២០២១)។ ក្នុងពេលជាមួយគ្នានេះដែរ អាស៊ាន នឹងប្រើថវិកាចំនួន ១០,៥ លានដុល្លារ អាម៉េរិក ពីមូលនិធិកូវីដ -១៩ សម្រាប់កិច្ចខិតខំប្រឹងប្រែងផ្តល់ឡូវ៉ាក់សាំងដំបូងក្នុងត្រីមាសទី ៤ ឆ្នាំ ២០២១ ឬត្រីមាសទី ១ ឆ្នាំ ២០២២។ ក្នុងស្មារតីស្រឡាញ់រាប់អាន ជួយគ្នាទៅវិញទៅមក អាស៊ាន នឹងចែករំលែកវ៉ាក់សាំងរវាងប្រទេសជាសមាជិក អរគុណប្រទេស សិង្ហបុរី ចែករំលែកចំណែកវ៉ាក់សាំងដែលខ្លួនត្រូវបានបែងចែកអោយបណ្ដាប្រទេសជាសមាជិកវិញ។ ប្រទេសទាំងឡាយសន្យាបន្តចូលរួមវិភាគទានអោយឃ្លាំងបម្រុងសម្ភារៈវេជ្ជសាស្ត្រ អាស៊ាន ហើយឆាប់ចេញសេចក្តីសម្រេចអំពីការបង្កើត ដាក់អោយដំណើរការមជ្ឈមណ្ឌល អាស៊ាន សម្រាប់ភាពបន្ទាន់ផ្នែកសុខភាពសាធារណៈនិងជំងឺដែលកំពុងកើតឡើង (ACPHEED)។

ជាប្រទេសមួយក្នុងចំណោមប្រទេសទាំងបីក្នុងតំបន់ អាស៊ាន កំពុងខិតខំប្រឹងប្រែងម្ចាស់ការក្នុងការសិក្សាស្រាវជ្រាវនិងផលិតវ៉ាក់សាំង ប្រទេសវៀតណាម ស្នើអោយ អាស៊ាន លើកបង្កើនសមត្ថភាពឈានឡើងអភិវឌ្ឍន៍វ៉ាក់សាំង ដោយពឹងផ្អែកលើខ្លួនឯងឆ្លងតាមរយៈការកសាងខ្សែចង្វាក់ផ្គត់ផ្គង់វ៉ាក់សាំងក្នុងតំបន់។ ទន្ទឹមនឹងនោះ ប្រទេសនានាបានផ្ដល់សច្ចាប័នសម្រាប់ដាក់ជូនថ្នាក់ដឹកនាំជាន់ខ្ពស់ អាស៊ាន អនុម័តឆ្លងផែនការច្រករបៀងធ្វើដំណើរទៅមកក្នុង អាស៊ាន ដើម្បីបង្កលក្ខណៈងាយស្រួលដល់ការដឹកជញ្ជូនទំនិញដ៏ចាំបាច់ ក៏ដូចជាការធ្វើដំណើរទៅមកធម្មតាក្នុងតំបន់ អាស៊ាន។

អង្គប្រជុំបានគាំទ្រផែនការរៀបចំវេទិកា អាស៊ាន កំពូលអំពីកិច្ចសហប្រតិបត្តិការអនុតំបន់ ឆ្ពោះទៅរកការអភិវឌ្ឍប្រកបដោយចីរភាពនិងកំណើនបរិយាប័ន្ននៅក្នុងតំបន់ដែលបានស្នើដោយប្រទេស វៀតណាម កាលពីថ្ងៃទី ៣០ ខែ វិច្ឆិកា ឆ្នាំ ២០២១ ដោយបានបញ្ជាក់ថា កិច្ចសហប្រតិបត្តិការអនុតំបន់រួមចំណែកយ៉ាងសំខាន់ដល់កិច្ចខិតខំប្រឹងប្រែងបង្រួមគម្លាតអភិវឌ្ឍន៍ អភិវឌ្ឍប្រកបដោយចីរភាពនិងដំណើរការកសាងសហគមន៍ អាស៊ាន។

ប្រទេសទាំងឡាយក៏បានពិភាក្សាអំពីស្ថានការណ៍នៅសមុទ្រចិនខាងត្បូង ឬហៅថាសមុទ្រខាងកើត ស្ថានការណ៍នៅ មីយ៉ាន់ម៉ា និងបញ្ហានានាដែលជាចំណាប់អារម្មណ៍និងកង្វល់រួម។ ចំពោះបញ្ហាសមុទ្រចិនខាងត្បូង ក្រុមមេដឹកនាំបានសង្កត់ធ្ងន់លើគោលជំហរជាគោលការណ៍របស់ អាស៊ាន តម្រូវការពង្រីកស្មារតីទទួលខុសត្រូវនិងសំឡេងរួមក្នុងបញ្ហាទាំងឡាយទាក់ទងនឹងសន្តិភាពសន្តិសុខ ស្ថិរភាពក្នុងតំបន់ ដោះស្រាយវិវាទដោយសន្តិវិធី គោរពតាមច្បាប់អន្តរជាតិ រួមទាំងអនុសញ្ញាអង្គការសហប្រជាជាតិអំពីច្បាប់សមុទ្រឆ្នាំ ១៩៨២ ការចរចាកសាងក្រមប្រតិបត្តិនៅសមុទ្រចិនខាងត្បូង (COC) ប្រកបដោយប្រសិទ្ធភាព ធាតុពិតជាក់ស្តែង សមស្របជាមួយច្បាប់អន្តរជាតិ។

ក្នុង​ការ​កសាង​សហគមន៍ ប្រទេស​ទាំងឡាយក្នុង អាស៊ាន លើកស្ទួយជាពិសេស​ពីលើការប្រកាន់ខ្ជាប់​សាមគ្គីភាព និង​ឯកភាព។ ប្រទេសសមាជិកទាំងអស់សុទ្ធតែចាត់ទុកថា នេះជាកត្តាកន្លឹះ ធានានូវភាពជោគជ័យនៃដំណើរការកសាងសហគមន៍និងពង្រីកតួនាទីមជ្ឈភាពរបស់ អាស៊ាន នៅក្នុងតំបន់។

ពិភាក្សាអំពីទំនាក់ទំនងការបរទេស ប្រទេសនានាបានបង្ហាញឯកច្ឆ័ន្ទថា ត្រូវបន្តលើកទឹកចិត្តដៃគូទាំង ឡាយអោយចូលរួមកសាងសម្រាប់គោលដៅរួមគឺសន្តិភាព សន្តិសុខនិងស្ថិរភាពនៅក្នុងតំបន់ គាំទ្រតួនាទីមជ្ឈភាពរបស់ អាស៊ាន​ ចូលរួមកិច្ចសហប្រតិបត្តិការតំបន់ឆ្លងតាមរយៈយន្តការផ្សេងៗ ដែលដឹកនាំដោយអាស៊ាន រួមចំណែកក្នុងការកសាងនិម្មាបនកម្មតំបន់ដែលបើកចំហ បរិយាប័ន្ន តម្លាភាព និងពឹងផ្អែកលើច្បាប់អន្តរជាតិ។

ចែករំលែកអំពីបញ្ហាប្រឈមផ្សេងៗ ដែលកំពុងដាក់ចេញអោយ អាស៊ាន និងតំបន់ លោក ប៊ូយ ថាញ់សឺន រដ្ឋមន្ត្រីការបរទេស វៀតណាម យល់ឃើញថា ការប្រកួតប្រជែងកាន់តែខ្លាំងក្លានិងស៊ីជម្រៅរវាងបណ្ដាប្រទេសមហាអំណាចកំពុងជះផលរំខានយ៉ាងធំធេងចំពោះតំបន់ ហើយសង្កត់ធ្ងន់ថា ​អាស៊ាន គួរតែតាមដានយ៉ាងដិតដល់នូវដំណើរវិវត្ត ប្រកាន់ខ្ជាប់សាមគ្គីភាព រឹងមាំនិងឈានឡើងអភិវឌ្ឍន៍ដោយពឹងផ្អែកលើខ្លួនឯង ហើយរក្សាយ៉ាងរឹងមាំតួនាទីមជ្ឈភាពនិងភាពឯករាជ្យរបស់ អាស៊ាន។

វៀតណាម ក៏លើកជាសំណើអោយ អាស៊ាន ប្រកាន់ខ្ជាប់វិធីភ្ជាប់ខ្លួនសមហេតុផល មានផលប្រយោជន៍ទៅវិញទៅមក ដើម្បីរក្សាយ៉ាងមាំគោលជំហរជាគោលការណ៍ចំពោះបញ្ហានានាដែលប៉ះពាល់ដល់សន្តិភាព សន្តិសុខតំបន់ផង លើកទឹកចិត្តដៃគូទាំងឡាយអោយចូលរួមយ៉ាងសកម្មក្នុងយន្តការផ្សេងៗ ដែលដឹកនាំដោយ អាស៊ាន ដើម្បីជំរុញកិច្ចសន្ទនានិងទំនុកទុកចិត្ត ដោះស្រាយបញ្ហាជាចំណាប់អារម្មណ៍និងកង្វល់រួមទៀតផង។

កិច្ចប្រជុំកំពូល អាស៊ាន និងកិច្ចប្រជុំកំពូលពាក់ព័ន្ធនឹងប្រព្រឹត្តឡើងនាពេលខាងមុខគឺជាជំហានអភិវឌ្ឍថ្មីដ៏មានសារសំខាន់មួយសម្រាប់ការកសាងសហគមន៍ ឆ្លើយតបជាមួយនឹងជំងឺរាតត្បាត ជាការបោះជំហានទៅមុខរបស់ អាស៊ាន ក្នុងដំណើរការស្តារឡើងវិញក្រោយសម័យកាលជំងឺរាតត្បាតសកល។ ទន្ទឹមនឹងនោះ កិច្ចប្រជុំទាំងនោះក៏ជាការបញ្ជាក់អំពីស្មារតីសាមគ្គីភាពរបស់ អាស៊ាន ឆ្ពោះទៅការកសាងនិម្មាបនកម្មតំបន់មួយដែលបើកចំហ តម្លាភាព ដំណើរការដោយពឹងផ្អែកលើច្បាប់ទម្លាប់និងយកការផ្លាស់ប្តូរយោបល់ ការសន្ទនានិងកិច្ចសហប្រតិបត្តិការធ្វើជាឧបករណ៍ចម្បងក្នុងទំនាក់ទំនងរវាងប្រទេសជាតិនីមួយៗ។

ដោយមានការត្រៀមរៀបចំយ៉ាងមធ្យ័ត ហ្មត់ចត់ ខ្លឹមសារទាំងឡាយនៃកិច្ចប្រជុំកំពូល អាស៊ាន នាពេលខាងមុខ ត្រូវបានរំពឹងថានឹងប្រកាន់ខ្ជាប់សាមគ្គីភាព ឯកភាព និងតួនាទីមជ្ឈភាពរបស់ អាស៊ាន ពង្រីកសំឡេងរួមរបស់ អាស៊ាន ក្នុងបញ្ហានានាដែលជាប់ពាក់ព័ន្ធដល់សន្តិភាព សន្តិសុខនិងស្ថិរភាពក្នុងតំបន់ ដូចប្រធានបទដែលបាន​ស្នើ​ឡើង​ដោយប្រទេសប្រធាន ​ប្រ៊ុយណេ “យើងទាំងអស់គ្នាមានចំណាប់អារម្មណ៍ យើងទាំងអស់គ្នា​បានត្រៀម​ខ្លួន​ជាស្រេចហើយ យើងទាំងអស់គ្នា​នឹងមានវិបុលភាព” ៕

មានសម្បត្តិ – សោយសុខ

ភ្នំពេញ៖ ដើម្បីជួយសម្រួល ដល់ការសាងសង់អគាររដ្ឋបាល មូលដ្ឋានកងរាជអាវុធហត្ថក្រុងកោះរ៉ុង ខេត្តព្រះសីហនុ នៅព្រឹកថ្ងៃទី២៣ ខែតុលា ឆ្នាំ២០២១ លោកឧកញ៉ា ទៀ វិចិត្រ សមាជិកក្រុមការងារ​ យុវជនគណបក្សប្រជាជនកម្ពុជា ខេត្តព្រះសីហនុ និងលោកស្រី ហេង គីមជី បានឧបត្ថម្ភ ក្បឿងក្បាច់លេខ ១ មិនកាន់ស្លែ(ដុងណាយ) ស្មើរទឹកប្រាក់ ៣,១០០ដុល្លារអាមេរិក ។

គ្រឿងក្បាច់លេខ១ នេះសម្រាប់មកប្រកដំបូលអគារ រដ្ឋបាលមូលដ្ឋានកងរាជអាវុធហត្ថ ក្រុងកោះរ៉ុង មួយខ្នង ដែលកំពុងនឹងសាងសង់មានទំហំ ទទឹង ៧ម៉ែត្រ បណ្តោយ ៣២ម៉ែត្រ និងយ៉ងលយទៅមុខ ទំហំ ៤គុណ៥ម៉ែត្រ ដើម្បីធ្វើជាទីចាត់ការបម្រើការងារ ក្នុងវិស័យ អាវុធហត្ថប្រចាំក្រុងកោះរ៉ុង នៃខេត្តព្រះសីហនុ។

លោកអនុសេនីយ៍ឯក ពិន ធារ៉ា មេបញ្ជាការស្តីទី មូលដ្ឋានកងរាជអាវុធហត្ថក្រុងកោះរ៉ុង និងនាយទាហាន នាយទាហានរង នៃកងរាជអាវុធហត្ថប្រចាំការ ក្រុងកោះរ៉ុងទាំងអស់ បានថ្លែងអំណរអរគុណ ចំពោះទឹកចិត្តរបស់ លោកឧកញ៉ា ទៀ វិចិត្រ សមាជិកក្រុមការងារ យុវជនគណបក្សប្រជាជនកម្ពុជា ខេត្តព្រះសីហនុ និងលោកស្រី ហេង គីមជី ដែលលោកទាំងពីរតែងតែ​ មានទឹកចិត្តសប្បុរស គិតគូរយកចិត្តទុកដាក់ និងបានជួយឧបត្ថម្ភ ជូនដល់មូលដ្ឋានកងរាជអាវុធហត្ថ ក្រុងកោះរ៉ុង ខេត្តព្រះសីហនុ នាពេលនេះ៕