ភ្នំពេញ៖ លោកឧកញ៉ា ទៀ វិចិត្រ សមាជិកក្រុមការងារ​ យុវជនគណបក្សប្រជាជនកម្ពុជា ខេត្តព្រះសីហនុ នៅព្រឹកថ្ងៃ៥ ខែវិច្ឆិកា ឆ្នាំ២០២១នេះ បានចាត់តំណាងនាំយកថវិកា ចំនួន២លានរៀល ទៅឧបត្ថម្ភ ដល់គ្រួសារក្រីក្រមួយគ្រួសារ ដែលប្រពន្ធទើបសម្រាកូន ហើយកូនដែលសម្រាលមកភ្លាមនោះ មានបញ្ហារលាកសួត ធ្ងន់ធ្ងរ កំពុងបន្តសង្គ្រោះព្យាបាល នៅមន្ទីរពេទ្យបង្អែកខេត្តព្រះសីហនុ ហើយប្តីធ្វើការជា សន្តិសុខឯកជន ខ្វះខាតថវិកា សំរាប់សម្រាល និងព្យាបាលកូននោះ ដោយសារតែជីវភាពក្រីក្រលំបាក។

លោកឧកញ៉ា ទៀ វិចិត្រ មានប្រសាសន៍ថា គ្រួសារក្រីក្រនេះ មានប្តីឈ្មោះ សំ កុសល ធ្វើការជាសន្តិសុខឯកជន និងប្រពន្ធ ឈ្មោះ ប៉ែន វិសាល ជាមេផ្ទះ រស់នៅ ភូមិ១ សង្កាត់លេខ១ ក្រុងព្រះសីហនុ។ ទារកដែលសម្រាល​ មកមានបញ្ហារលាកសួតធ្ងន់ធ្ងរ នោះមានឈ្មោះ សំ ប៊ុនសុង។​​ ការផ្តល់ជំនួយថវិកាចំនួន ២លានរៀលនេះ គឺជាផ្នែកមួយជួយរំលែកការលំបាក ដល់គ្រួសារក្រីក្រខាងលើ សម្រាប់យកទៅចេញថ្លៃសម្រាលកូន និងយកមកព្យាបាលជំងឺទារក នោះផងដែរ ។

ក្នុងនោះក្រោយទទួលបាន ថវិកាឧបត្ថម្ភខាងលើ គ្រួសាររងគ្រោះ បានគោរពថ្លែងអំណរអរគុណ​ ​យ៉ាងជ្រាលជ្រៅបំផុត ចំពោះលោកឧកញ៉ា ទៀ វិចិត្រ សមាជិកក្រុមការងារ យុវជនគណបក្សប្រជាជនកម្ពុជា ខេត្តព្រះសីហនុ ដែលបានឧបត្ថម្ភថវិកា ចំនួន ២លានរៀល ដើម្បីឲ្យរូបលោកនិងភរិយា បានយកថវិកានេះ ទៅចេញថ្ងៃសម្រាល និងយកមកព្យាបាលជំងឺ ទារក ដែលសម្រាលមក ហើយមានបញ្ហារលាកសួត ធ្ងន់ធ្ងរ កំពុងសង្គ្រោះ នៅមន្ទីរពេទ្យពេលនេះ និងបានជូនពរលោកឧកញ៉ា និងលោកស្រី ព្រមទាំងក្រុមគ្រួសារ សូមមានសុខភាពល្អ​ និងប្រកបដោយពុទ្ធពរ គ្រប់ប្រការ៕

ខេត្តសៀមរាបរំពឹងថានឹងវិលត្រលប់ទៅរក “ភាពរស់រានមានជីវិត” ឡើងវិញនៅខែធ្នូ ឆ្នាំ២០២១ នេះ ជាមួយនឹងការរៀបចំមហោស្រពសិល្បៈអន្តរជាតិអង្គរ (Angkor International Festival of the Arts)។

ព្រឹត្តិការណ៍នេះនឺងប្រព្រឹត្តទៅចាប់ពីថ្ងៃទី ១០ ដល់ថ្ងៃទី ១២ ខែធ្នូ ឆ្នាំ ២០២១ ក្រោមការអនុញ្ញាតរបស់រាជរដ្ឋាភិបាលកម្ពុជា។ អ្នករៀបចំមហោស្រពតំណាងដោយក្រុមហ៊ុន Cambodian Arts and Festival Enterprise Co. Ltd. ដែលមានកិច្ចសហការផ្នែកសិល្បៈ បច្ចេកទេស និងរដ្ឋបាលជាមួយក្រសួងវប្បធម៌ និងវិចិត្រសិល្បៈ ដើម្បីអបអរសាទរការដាក់ខេត្តសៀមរាបជាទីក្រុងវប្បធម៌អាស៊ាន ២០២១-២០២២។

លោក Aaron Carpene ជាអគ្គនាយក និងជានាយកផ្នែកសិល្បៈនៃមហោស្រពសិល្បៈអន្តជាតិអង្គរ បានថ្លែងថា៖ «យើងបានធ្វើការងារនេះជាងមួយឆ្នាំមកហើយ។ ជាមួយនឹងការដែលកម្ពុជាក្លាយជាប្រធានអាស៊ាន និងការបើកចំហរប្រទេសឡើងវិញ យើងជឿជាក់ថានេះគឺជាការផ្តល់ជូនដ៏សាកសមមួយដល់មរតកវប្បធម៌ និងទិដ្ឋភាពសិល្បៈក្នុងស្រុករបស់កម្ពុជានាពេលមួយដែលកម្ពុជាមានសិល្បៈ និងវប្បធម៌ជាច្រើនទៀតដែលត្រូវផ្តល់ជូន»។

នៅថ្ងៃទី១០ ខែធ្នូ ក្រសួងវប្បធម៌ និងវិចិត្រសិល្បៈ នឹងរៀបចំពិធីបើកសម្ពោធមួយនៅរាជធានីភ្នំពេញ ជាមួយឯកអគ្គរាជទូត ឯកអគ្គរដ្ឋទូតអាស៊ាន ឥស្សរជន និងអាជ្ញាធរនានា។ អ្នករៀបចំមហោស្រពសិល្បៈអន្តរជាតិអង្គរ ក៏នឹងរៀបចំពិធីបើកសម្ពោធមួយនៅទីក្រុងសៀមរាបសម្រាប់ការចាប់ផ្តើមព្រឹត្តិការណ៍មហោស្រពនេះនៅថ្ងៃជាមួយគ្នាផងដែរ។

មហោស្រពសិល្បៈអន្តរជាតិអង្គរឆ្នាំ២០២១ នឹងមានការសម្តែងសិល្បៈ ដោយមានការចូលរួមពីសិល្បៈករ សិល្បៈការនីជាច្រើនដូចជា តន្ត្រីករ អ្នកគូរគំនូរ អ្នកនិពន្ធ និងអ្នករបាំជាដើម។ ក៏នឹងមានការចូលរួមផងដែរពីកវីតារាកម្ពុជាគឺលោក យ៉េង ឈាងលី និងអ្នកនិពន្ធដ៏ល្បីឈ្មោះគឺលោកស្រី Elisabeth Becker (តាមរយៈ Zoom) សម្រាប់ជាផ្នែកមួយនៃកម្មវិធី Writer&Readers Festival Hub ហើយក៏នឹងមានការបង្ហោះខ្លែងប្រពៃណីជាតិនៅមុខប្រាសាទអង្គរ ល្ខោនស្រមោល ការសម្ដែងការប្រកួតក្បាច់គុនល្បុក្កតោ ចាប៉ីដងវែង និងរបាំអប្សរាផងដែរ។

លោក Aaron Carpene បានបន្តថា៖ «មហោស្រពសិល្បៈអន្តរជាតិអង្គរឆ្នាំ២០២១នេះ នឹងក្លាយជាពិធីប្រារព្ធសិល្បៈទាំងបុរាណ និងសម័យ។ ជាមួយនឹងការធ្វើជាប្រធានអាស៊ាន នេះគឺជាឱកាសដ៏អស្ចារ្យមួយសម្រាប់កម្ពុជា ដើម្បីលើកកម្ពស់មរតកដែលមិនអាចកាត់ថ្លៃបានរបស់ប្រទេស ព្រមទាំងទេព្យកោសល្យដ៏មានសក្តានុពលចម្រុះរបស់ខ្លួនឯងផងដែរ»។
មហោស្រពសិល្បៈអន្តរជាតិអង្គរឆ្នាំ២០២១ នឹងប្រារព្ធធ្វើឡើងនៅទីកន្លែងផ្សេងៗគ្នាក្នុងទីក្រុងសៀមរាប និងរាជធានីភ្នំពេញចាប់ពីថ្ងៃទី១០ ដល់ថ្ងៃទី១២ ខែធ្នូ ឆ្នាំ២០២១។

អង្គការ UNESCO គណៈប្រតិភូរបស់សហភាពអឺរ៉ុប ការិយាល័យកិច្ចសហប្រតិបត្តិការស្វីស មជ្ឈមណ្ឌលខេមរៈសិក្សា និងសាកលវិទ្យាល័យអាមេរិកកាំងភ្នំពេញ (American University in Phnom Penh) គឺជាអ្នកឧបត្ថម្ភធំ និងជាអ្នកគាំទ្រដ៏សំខាន់ដល់មហោស្រពនេះ។
ឥឡូវនេះអ្នករៀបចំមហោស្រពសិល្បៈអន្តរជាតិអង្គរឆ្នាំ២០២១ កំពុងបើកទទួលការឧបត្ថម្ភពីវិស័យឯកជន។

លោក Aaron Carpene ថ្លែងបន្តថា៖ «ក្រោយបញ្ហាកូវីដ-១៩ ឧស្សាហកម្មទេសចរណ៍កម្ពុជា ជាពិសេសខេត្តសៀមរាប ដែលកំពុងត្រូវការជំនួយ តាមរយៈការគាំទ្រដល់ព្រឹត្តិការណ៍នេះ អ្នកមិនត្រឹមតែនឹងជួយគាំទ្រដល់សិល្បៈករនិងសិល្បៈការនី និងមរតករបស់កម្ពុជាប៉ុណ្ណោះទេ ប៉ុន្តែអ្នកក៏នឹងថែមទាំងកំពុងជួយដល់អ្នកដែលនៅក្នុងឧស្សហកម្មទេសចរណ៍ និងនៅក្នុងវិស័យសិល្បៈដែលបានរងផលប៉ះពាល់យ៉ាងខ្លាំងពីវិបត្តិមួយនេះផងដែរ»។

សម្រាប់អ្នកដែលចាប់អារម្មណ៍ពិភាក្សាអំពីឱកាសឧបត្ថម្ភ លោកអ្នកអាចទាក់ទងមកកាន់យើងខ្ញុំបានតាមរយៈអ៊ីមែល info@aifa-cambodia.com ៕

ដោយសារដំណើរវិវត្តដ៏ស្មុគស្មាញនៃជំងឺរាតត្បាតកូវីដ-១៩ កិច្ចប្រជុំកំពូល អាស៊ាន លើកទី ៣៨ និង ៣៩ និងកិច្ចប្រជុំពាក់ព័ន្ធនានា ត្រូវបានប្រព្រឹត្តទៅក្នុងពេលដំណាលគ្នាតាមប្រព័ន្ធវីដេអូ ចាប់ពីថ្ងៃទី ២៦ ដល់ថ្ងៃទី ២៨ ខែ តុលា ឆ្នាំ ២០២១ កន្លងទៅ។

បង្កើនកិច្ចការបង្ការទប់ស្កាត់ជំងឺរាតត្បាតនិងស្តារសេដ្ឋកិច្ចឡើងវិញ

ថ្នាក់ដឹកនាំប្រទេស អាស៊ាន ទាំងអស់សុទ្ធតែឯកភាពគ្នាលើវិធីភ្ជាប់ខ្លួនចំពោះបញ្ហាបង្ការទប់ស្កាត់ការរីករាលដាលនៃជំងឺកូវីដ-១៩ អាស្រ័យតាមលក្ខខណ្ឌស្ថានការណ៍នៃប្រទេសនីមួយៗ។ គំនិតផ្តួចផ្តើមទាំងឡាយក្នុងឆ្នាំប្រធាន អាស៊ាន ឆ្នាំ ២០២០ របស់ វៀតណាម ត្រូវបានវាយតម្លៃខ្ពស់និងផ្លាស់ប្ដូរទស្សនៈគ្នាទៅវិញទៅមកដើម្បីអនុវត្តជាបន្ត។ ជាពិសេស ចំពោះគំនិតផ្តួចផ្តើមរបស់ប្រទេស វៀតណាម អំពីការបង្កើតឃ្លាំងបម្រុងសម្ភារៈវេជ្ជសាស្ត្រ អាស៊ាន និងមូលនិធិ អាស៊ាន ឆ្លើយតបនឹងជំងឺកូវីដ-១៩ នោះ អាស៊ាន បានគាំទ្រស្វាគមន៍ចំពោះការចូលរួមចំណែករបស់ប្រទេសសមាជិកទាំងឡាយនិងដៃគូខាងក្រៅនានាសម្រាប់មូលនិធិ អាស៊ាន ដើម្បីឆ្លើយតបនឹងជំងឺកូវីដ-១៩ ដោយមានទឹកប្រាក់សន្យាសរុបរហូតដល់ ២៥,៨ លានដុល្លារ។ ក្នុងចំណោមនោះ មាន ១០,៥ លានដុល្លារអាម៉េរិក នឹងត្រូវដក់ចេញសម្រាប់ចំណាយអោយការទិញវ៉ាក់សាំងសម្រាប់ប្រជាជន អាស៊ាន យ៉ាងឆាប់បំផុតនៅដើមត្រីមាសទី ១ និងទី ២ ឆ្នាំ ២០២២។

អញ្ជើញថ្លែងសុន្ទរកថានៅក្នុងកិច្ចប្រជុំ នាយករដ្ឋមន្ត្រី វៀតណាម លោក ផាម មិញជិញ បានសង្កត់ធ្ងន់ថា៖ អាស៊ាន ត្រូវតែផ្លាស់ប្តូរទស្សនៈ ការយល់ដឹង ត្រូវតែសម្របខ្លួន បត់បែន សុវត្ថិភាពក្នុងស្ថានភាពធម្មតាតាមគន្លងថ្មី ហើយត្រូវរួមដៃសាមគ្គីជាមួយគ្នាក្នុងការប្រយុទ្ធប្រឆាំងនឹងជំងឺរាតត្បាត។ ក្នុងឱកាសនេះដែរ លោកនាយករដ្ឋមន្ត្រី ផាម មិញជិញ បានប្រកាសពីបញ្ជីរាយនាមសម្ភារៈវេជ្ជសាស្ត្រដោយមានតម្លៃរាប់លានដុល្លារ អាម៉េរិក ដែលប្រទេស វៀតណាម សន្យារួមវិភាគទានសាម្រាប់ឃ្លាំងបម្រុងសម្ភារៈវេជ្ជសាស្ត្រ អាស៊ាន។ ក្នុងនាមជាប្រទេសមួយក្នុងចំណោមប្រទេស អាស៊ាន ផ្សេងៗ ដែលកំពុងជំរុញការស្រាវជ្រាវនិងត្រៀមលក្ខណៈជាមុនក្នុងការផលិតវ៉ាក់សាំង វៀតណាម ស្នើអោយមានការផ្ទេរបច្ចេកវិជ្ជាផលិតវ៉ាក់សាំង  ថ្នាំព្យាបាលកូវីដ-១៩ អោយបានឆាប់ កកើតខ្សែសង្វាក់ផ្គត់ផ្គង់ដោយស្វ័យភាពសម្រាប់តំបន់។

ចំណុចស្នូលដ៏មានសារៈសំខានមួយទៀតសម្រាប់ក្រុមមេដឹកនាំ អាស៊ាន ក្នុងអំឡុងពេលកិច្ចប្រជុំទាំងនេះគឺការស្វែងរកវិធានការសម្រាប់ការស្តារសេដ្ឋកិច្ចឡើងវិញក្រោយសម័យជំងឺរាតត្បាតសកល។ អាទិភាពដំបូងបង្អស់ដែលថ្នាក់ដឹកនាំ អាស៊ាន ទាំងឡាយលើកឡើងនោះគឺការស្តារសកម្មភាពទេសចរណ៍ឡើងវិញ ធ្វើយ៉ាងណាធានាអោយវិស័យពាណិជ្ជកម្ម ការធ្វើដំណើរទៅកសម្រាប់ប្រជាជននិងសហគ្រាសអាចដំណើរការយ៉ាងរលូន ឆ្លងតាមរយៈការបើកដំណើរការច្រករបៀងបៃតងផ្សេងៗ ប្រកបដោយសុវត្ថិភាព។

លោកនាយករដ្ឋមន្ត្រី វៀតណាម  ផាម មិញជិញ បានលើកជាសំណើអោយ អាស៊ាន ចាំបាច់ត្រូវកំណត់ទីតាំងជំហរឈរជើងថ្មីរបស់ខ្លួនក្នុងបរិបទនៃចំណងទំនាក់ទំនងសេដ្ឋកិច្ច – នយោបាយផ្សេងៗ ដែលកំពុងកំណត់រូបរាងថ្មីរបស់ពិភពលោកឡើងវិញ កិច្ចសហប្រតិបត្តិការនិងការចងសម្ព័ន្ធគ្នាខាងសេដ្ឋកិច្ចដោយពហុភាគី គ្រប់ជាន់ថ្នាក់ក្នុងតំបន់។

ដើម្បីចូលរួមយ៉ាងស៊ីជម្រៅបន្ថែមទៀតក្នុងខ្សែសង្វាក់ផ្គត់ផ្គង់ក្នុងតំបន់និងសកលលោក លើកបង្កើនភាពទាក់ទាញនៃទីផ្សារ អាស៊ាន និងជំរុញដំណើរការងើបឡើងវិញនៃសេដ្ឋកិច្ចក្រោយសម័យជំងឺរាតត្បាតសកលនោះ អាស៊ាន ត្រូវពិចារណាទៅលើការឆ្លៀតប្រើប្រាស់កត្តាថ្មីៗ ដូចជាការធ្វើបរិវត្តកម្មឌីជីថល សេដ្ឋកិច្ចឌីជីថល សេដ្ឋកិច្ចវិលជុំ បច្ចេកវិទ្យាបៃតង ថាមពលកកើតឡើងវិញ ធនធានមនុស្សគុណភាពខ្ពស់។

ក្នុងពេលជាមួយគ្នានោះដែរ នាយករដ្ឋមន្ត្រីសិង្ហបុរី លោក លីសៀនឡុង បានអំពាវនាវប្រទេសនានាផ្តល់សច្ចាប័នលើកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) អោយបាបឆាប់ដើម្បីរួមចំណែកដល់ដំណើរការស្តារសេដ្ឋកិច្ចឡើងវិញក្រោយសម័យជំងឺរាតត្បាតសកលរបស់តំបន់។

កសាងសាមគ្គីភាពផ្ទៃក្នុងនៃតំបន់ បង្កើនកិច្ចសហប្រតិបត្តិការពហុភាគី

ក្នុងបរិបទស្ថានការណ៍អន្តរជាតិនិងក្នុងតំបន់មានការផ្លាស់ប្តូរជាច្រើន បញ្ហាត្រូវបានកិច្ចប្រជុំកំពូល អាស៊ាន ចាប់អារម្មណ៍យ៉ាងខ្លាំងគឺធ្វើយ៉ាងណារក្សាអោយបានរឹងមាំសាមគ្គីភាព ឯកភាពជាឯកឆន្ទៈ បង្រួបបង្រួមគ្នានិងតួនាទីមជ្ឈភាពនៃ អាស៊ាន។ នៅក្នុងកិច្ចប្រជុំលើកនេះ ប្រទេសនានាបានបញ្ជាក់សាជាថ្មីទៅលើការសន្យាថានឹងពង្រឹងបង្កើនតួនាទីមជ្ឈភាពនិងឯកភាពរបស់ អាស៊ាន សម្រាប់ដោះស្រាយបញ្ហាប្រឈមរួម។ អាស៊ាន ត្រូវតែសកម្ម ត្រៀមលក្ខណៈជាមុននិងមានការទទួលខុសត្រូវលើគ្រប់បញ្ហាដែលជះឥទ្ធិពលដល់តំបន់ ពង្រីកស្មារតីឯករាជ្យភាពក្នុងប្រតិបត្តិការ អព្យាក្រឹតភាពក្នុងចំណាត់ការនិងរក្សាតុល្យភាពក្នុងទំនាក់ទំនងជាមួយប្រទេសមហាអំណាចផ្សេងៗ។

ថ្នាក់ដឹកនាំ អាស៊ាន បានពិភាក្សាអំពីបញ្ហាជាច្រើនដែលបានចោទឡើងសម្រាប់តំបន់ដូចជាបញ្ហាសមុទ្រចិនខាងត្បូង ឬហៅថាសមុទ្រខាងកើត ស្ថានការណ៍នៅ មីយ៉ាន់ម៉ា បញ្ហាសន្តិសុខតាមបណ្ដាញអ៊ីនធឺណិត អំពី តួនាទីរបស់ អាស៊ាន ក្នុងការដោះស្រាយបញ្ហាទាំងឡាយក្នុងតំបន់និងជាមួយដៃគូផ្សេងៗ របស់ អាស៊ាន។

អំពីស្ថានការណ៍នៅសមុទ្រចិនខាងត្បូង ប្រទេសសមាជិក អាស៊ាន មួយចំនួនបានបង្ហាញការព្រួយបារម្ភអំពីសកម្មភាពកែប្រែដី ឧប្បត្តិហេតុធ្ងន់ធ្ងរផ្សេងៗ ក្នុងតំបន់ ធ្វើអោយរេចរឹលទំនុកទុកចិត្ត បង្កើនភាពតានតឹងនិងហានិភ័យការបំផ្លិចបំផ្លាញសន្តិភាព សន្តិសុខនិងស្ថិរភាពក្នុងតំបន់។

កិច្ចប្រជុំក៏សម្ដែងការគាំទ្រចំពោះទំនាក់ទំនងកិច្ចសហប្រតិបត្តិការ ដែលបានកែលម្អឡើងឥតឈប់ឈររវាង អាស៊ាន និង ប្រទេស ចិន វឌ្ឍនភាពនៃកិច្ចចរចាប្រកបដោយធាតុពិតជាក់ស្តែងក្នុងគោលបំណងកសាងអោយបានឆាប់ក្រមប្រតិបត្តិនៅសមុទ្រចិនខាងត្បូង (COC) មួយប្រកបដោយធាតុពិតជាក់ស្តែងនិងប្រសិទ្ធភាព ស្របតាមគោលការណ៍នៃច្បាប់អន្តរជាតិ ក្នុងនោះ មានអនុសញ្ញាអង្គការសហប្រជាជាតិឆ្នាំ ១៩៨២ ស្តីពីច្បាប់សមុទ្រ (UNCLOS) តាមពេលកំណត់ដែលបានឯកភាពជាឯកឆន្ទៈពីសំណាក់ភាគីទាំងពីរ។

នៅក្នុងកិច្ចប្រជុំទាំងនោះ ប្រធានាធិបតី ហ្វីលីពីន លោក រ៉ូ​ឌ្រី​ហ្គូ ឌើ​ទើ​តេ បានអំពាវនាវអោយមានសាមគ្គីភាព ថែរក្សាសន្តិភាពនិងស្ថិរភាពនៅសមុទ្រចិនខាងត្បូង។ ចាត់ទុកថា អាស៊ាន គួរតែបន្តដើរលើផ្លូវនេះស្របតាមច្បាប់អន្តរជាតិ រួមទាំងសាលក្រមរបស់តុលាការអាជ្ញាកណ្តាលឆ្នាំ ២០១៦ ពិធីសារដែលបាននិរាការណ៍ការទាមទារហួសហេតុរបស់ ចិន ចំពោះតំបន់សមុទ្រដែលមានជម្លោះ។

នៅក្នុងកិច្ចប្រជុំកំពូល អាស៊ាន ជាមួយដៃគូទាំងឡាយដូចជា សហរដ្ឋអាម៉េរិក ជប៉ុន អូស្ត្រាលី កូរ៉េខាងត្បូង។ល។ ថ្នាក់ដឹកនាំនៃប្រទេសទាំងអស់សុទ្ធតែបានថ្លែងសុន្ទរកថា សម្ដែងការគាំទ្រលើគោលជំហរជាគោលការណ៍របស់ អាស៊ាន ចំពោះសមុទ្រចិនខាងត្បូង គាំទ្រ អាស៊ាន ក្នុងការជំរុញកិច្ចសហប្រតិបត្តិការ ការសន្ទនា ការកសាងទំនុកទុកចិត្ត គោរពច្បាប់អន្តរជាតិនិងអនុសញ្ញា UNCLOS ឆ្នាំ ១៩៨២។

នៅក្នុងកិច្ចប្រជុំកំពូលអាស៊ីបូព៌ាលើកទី ១៦ (EAS) នាយករដ្ឋមន្ត្រី ម៉ាឡេស៊ី អ៊ីសាមីល សាប្រ៊ី យ៉ាកូប បានអះអាងបញ្ជាក់ពីគោលជំហរឥតងាករេរបស់ ម៉ាឡេស៊ី ដោយចាត់ទុកថា បញ្ហានានាដែលជាប់ពាក់ព័ន្ធដល់សមុទ្រចិនខាងត្បូងត្រូវដោះស្រាយដោយសន្តិវិធី និង សមហេតុផលឆ្លងតាមរយៈការសន្ទនានិងពិគ្រោះយោបល់ ប្រើវេទិកានិងវិធានការការទូតសមស្របផ្សេងៗ។

លោក យ៉ាកូប ក៏បានកូសបញ្ជាក់សាជាថ្មីទៅលើការសន្យាជំរុញក្រមប្រតិបត្តិនៅសមុទ្រចិនខាងត្បូង (COC) ក្នុងកិច្ចចរចានានាដែលជាប់ពាក់ព័ន្ធជាមួយនឹងការដោះស្រាយជម្លោះវិវាទទឹកដីនៅតំបន់សមុទ្រសម្បូរធនធានមួយនេះ ព្រទាំង អោយដឹងថា ម៉ាឡេស៊ី ទន្ទឹងរង់ចាំថា ដំណើរការចរចានេះបានបញ្ចប់ជាស្ថាពរក្នុងពេលឆាប់ៗ ដើម្បីសម្រេចបាន COC ប្រកបដោយប្រសិទ្ធភាពនិងធាតុពិតជាក់ស្តែង។

ក្រោមប្រធានបទ “យើងទាំងអស់គ្នាមានចំណាប់អារម្មណ៍ យើងទាំងអស់គ្នាត្រៀមរៀបចំ យើងទាំងអស់គ្នាមានវិបុលភាព” កិច្ចប្រជុំកំពូល អាស៊ាន លើកទី ៣៨ និងទី ៣៩ និងកិច្ចប្រជុំកំពូលពាក់ព័ន្ធផ្សេងៗ ទៀត បានបន្តរួមចំណែកក្នុងការរក្សាយ៉ាងខ្ជាប់ខ្ជួនចំណងសាមគ្គីភាព ឯកភាពរបស់ អាស៊ាន ពង្រីកសំឡេងរួមរបស់ អាស៊ាន លើបញ្ហានានាជាប់ពាក់ព័ន្ធដល់សន្តិភាព សន្តិសុខ​និង​ស្ថិរភាព​ក្នុង​តំបន់ ឆ្លើយតប​ដោយមាន​ប្រសិទ្ធភាព​ចំពោះ​បញ្ហា​ប្រឈមផ្សេងៗ ដែលកំពុងចោទឡើង ពង្រឹងឋានៈនិង​តួនាទីមជ្ឈភាពរបស់ អាស៊ាន ​អោយកាន់តែខ្លាំង​ឡើង​ពីមួយថ្ងៃទៅមួយថ្ងៃ។ ហើយក្នុងនាមជាសមាជិកដ៏សកម្មមួយក្នុង អាស៊ាន ប្រទេស វៀតណាម គូសបញ្ជាក់លើការបន្តចូលរួមយ៉ាងសកម្ម ប្រោបដោយបុរេសកម្ម  ចែករំលែកទំនួលខុសត្រូវក្នុងកិច្ចការរួមរបស់ អាស៊ាន៕

មាន សម្បត្តិ – សុខរិទ្ធិ