ភ្នំពេញ៖ ដើម្បីពង្រីកនៅហេដ្ឋារចនាសម្ព័ន្ធប្រព័ន្ធឌីជីថលនិងសេវាស្វ័យប្រតិបត្តិការ(Banking Self-Service) ជូនអតិថិជន និងដើម្បីបំពេញនៅសេចក្តីត្រូវការដ៏ច្រើន លើសលប់ពីសំណាក់អតិថិជនដ៏ថ្លៃថ្លារបស់ខ្លួន ធនាគារ អេស៊ីលីដា ដែលជាធនាគារពាណិជ្ជក្នុងស្រុកដ៏ធំជាងគេនៅកម្ពុជាបានធ្វើការវិនិយោគបន្ថែម ក្នុងការដាកពង្រាយនូវម៉ាស៊ីនដាក់-ដកប្រាក់ ម៉ាស៊ីនដកប្រាក់ចំនួន ៤៧៨ គ្រឿងក្នុងឆ្នាំ ២០២២ នេះ ដែលធ្វើឱ្យម៉ាស៊ីនអេធីអឹមរបស់ខ្លួនកើនដល់ ១ ៣១៧គ្រឿងសំដៅធ្វើយ៉ាងណាផ្តល់ភាពងាយស្រួលដល់អតិថិជិនរបស់ខ្លូនកាន់តែទូលំទូលាយទូទាំងព្រះរាជាណាចក្រកម្ពុជា។

ជាមួយនឹងការនាំចូលនូវមាស៊ីនអេធីមអឹមច្រើនម៉ាស៊ីនដាក់-ដកប្រាក់ ម៉ាស៊ីនដកប្រាក់ចំនួន ៤៧៨ គ្រឿងនេះ ធនាគារអេស៊ីលីដាបានចំណាយពេលចំនួនបីថ្ងៃក្នុងការដឹកជញ្ជូននាំចូលមកតម្លើងនៅទីតាំងនានានៅទូទាំង២៤រាជធានីខេត្តនៃប្រទេសកម្ពុជាដើម្បីដាក់ឱ្យដំណើការជាផ្លូវការក្នុងឆ្នាំ២០២២ខាងមុខនេះ។

លោកស្រី សុខ សោភា នាយិកាប្រតិបត្តិជាន់ខ្ពស់ទីផ្សារ នៃធនាគារ អេស៊ីលីដា បានមានប្រសាសន៍ថា ធនាគារ អេស៊ីលីដាតែងតែគិតគូរក្នុងការបំពាក់បំពាក់ម៉ាស៊ីនទំនើបៗ ប្រកបដោយបច្ចេកវិទ្យាដោយបង្កើតនូវភាពលេចធ្លោនិងទាន់សម័យសម្រាប់អតិថិជន, សាធារណជន និងបណ្តាដៃគូពាណិជ្ជកម្មរបស់ខ្លួន ដែលធ្វើអោយខ្លួនបានង្កើននូវការវិនិយោគលើការដាក់ពង្រាងមាស៊ីនអេធីអឹមកាន់តែច្រើនបន្ថែមទៀត។

លោកស្រីនាយិកាបានបន្ថែមថា «អេស៊ីលីដាបានសម្រេចវិនិយោគក្នុងការបន្ថែមមាស៊ីនអេធីអឹមឱ្យបានកាន់តែច្រើ់នឡើងជារៀងរាល់ឆ្នាំគឺដើម្បីបង្ករលក្ខណៈងាយស្រួលជូនអតិថិជនដ៏ថ្លៃថ្លាទាំងអស់ក្នុងការប្រើប្រាស់នូវសាច់ប្រាក់របស់គាត់នៅទូទាំងប្រទេសរបស់យើងនិងបាន២៤ម៉ោងក្នុង៧ថ្ងៃ។ ដូច្នេះធនាគារអេស៊ីលីដានឹងដាក់ឱ្យដំណើការនូវមាស៊ីនអេធីអឹមចំនួន៤៧៨គ្រឿងនៅក្នុងឆ្នាំ២០២២ ដែលនឹងត្រូវដាក់ពង្រាយនៅទូទាំងប្រទេសដើម្បីឱ្យមានភាពងាយស្រួលដល់អតិថិជនរបស់យើង»។

ជាមួយទីតាំងនៃការផ្តល់សេវាម៉ាស៊ីនអេធីអឹម និងសេវាកម្មធនាគារស្វ័យប្រវត្តិ (Banking Self Service) របស់ធនាគារ អេស៊ីលីដា អនុញាតឱ្យលោកអ្នកធ្វើប្រតិបត្តិការសេវាធនាគារ បានគ្រប់ពេលវេលា (២៤ម៉ោងក្នុងមួយថ្ងៃ និង ៧ថ្ងៃក្នុងមួយសប្តាហ៍) ដោយខ្លួនឯងបាន ២៤ម៉ោងលើ២៤ម៉ោង តាមតម្រូវការ ដូចជា ការដាក់ប្រាក់ ផ្ទេរប្រាក់ ឬបើកគណនី ដោយមិនគិតកម្រៃសេវាឡើយ៕

ភ្នំពេញ៖ លោកឧកញ៉ា ទៀ វិចិត្រ សមាជិកក្រុមការងារ​ យុវជនគណបក្សប្រជាជនកម្ពុជា ខេត្តព្រះសីហនុ ធ្វើដំណើរតាមម៉ូតូទឹក ចុះសួរសុខទុក្ខ និងនាំយកស្បៀងអាហារ ទៅជូនប្រជានេសាទមួយគ្រួសារ មានជីវភាពក្រីក្រខ្វះខាត ដែលកំពុងនេសាទនៅសមុទ្រ ក្នុងភូមិសាស្ត្រ ស្រុកព្រៃនប់ ខេត្តព្រះសីហនុ។

លោកឧកញ៉ា ទៀ វិចិត្រ មានប្រសាសន៍ឲ្យដឹងថា ក្រោយទទួលដំណឹង ពីប្រជានេសាទមួយគ្រួសារនេះ ដែលប្រកបរបរនេសាទប្រចាំថ្ងៃ នៅក្នុងសមុទ្រ និងជាគ្រួសារមានជីវភាពក្រីក្រ ទើបកាលពីល្ងាចថ្ងៃទី២២ ខែធ្នូ ឆ្នាំ២០២១ លោកឧកញ៉ា ក៏បានធ្វើដំណើរតាមម៉ូតូទឹក ចុះទៅជួបសួរសុខទុក្ខផ្ទាល់ និងនាំយកស្បៀងអាហារ មានដូចជា អង្ករ ចំនួន ០១បាវ ស្មើ៥០គីឡូក្រាម មីចំនួន ០៥កេស ត្រីខចំនួន០៥យួរ ទឹកត្រីចំនួន ១យួរ ទឹកស៊ីអ៊ីវ ចំនួន០១យួរ ស្ករសចំនួន០១គីឡូក្រាម ប៊ីចេងចំនួន០១គីឡូក្រាម អំបិលចំនួន០២គីឡូក្រាម និងទឹកបរិសុទ្ធចំនួន០២កេស ជូនប្រជានេសាទក្រីក្រមួយគ្រួសារនេះ ដើម្បីជួយដោះស្រាយជីវភាពក្នុងគ្រួសារ និងលើកទឹកចិត្ត ចំពោះការប្រកបរបរដោយសុច្ចរិត តាមរយៈការធ្វើនេសាទ លក្ខណៈគ្រួសារក្នុងសមុទ្រ ។

លោកឧកញ៉ា ទៀ វិចិត្រ ក៏បានជម្រាបជូនពលរដ្ឋគ្រួសារ​ អ្នកនេសាទរូបនេះ ឲ្យប្រុងប្រយត្ន័ផងដែរ ពេលចេញនេសាទក្នុងសមុទ្រ ពិសេសពេលធាតុអាកាសមិនល្អ ដូចជាពេលមានខ្យល់ និងភ្លៀងខ្លាំងជាដើម៕

ភ្នំពេញ៖ ក្រុមហ៊ុន ប៊ី.អាយ.ស៊ី. ម៉ាឃីតឯ.ក ដែលជាក្រុមហ៊ុនឈ្មួញជើងសាឧបករណ៍និស្សន្ទ និងជាក្រុមហ៊ុនទទួលបានអាជ្ញាបណ្ណពីនិយ័តករមូលបត្រកម្ពុជា (ន.ម.ក) តាំងពីឆ្នាំ២០១៨ កាលពីរសៀលថ្ងៃទី ២១ ខែ ធ្នូ ឆ្នាំ២០២១ បានរៀបចំកម្មវិធីប្រកួតត្រេត Squid Game វគ្គផ្តាច់ព័្រត្រ ក្នុងនោះបានរកឃើញអ្នកឈ្នះចុងក្រោយចំនួន ៣ រូប ដោយអ្នកឈ្នះលេខ១ ទទួលបាន iPad Air Pro ចំនួន ១ គ្រឿង មានតម្លៃប្រហែល ១៤០០ ដុល្លារ ,លេខ២ ទទួលបានសាច់ប្រាក់ចំនួន ៣០០ ដុល្លារ ,លេខ៣ ទទួលបានសាច់ប្រាក់ចំនួន ២០០ ដុល្លារ។

ក្នុងកម្មវិធីប្រកួតត្រេត Squid Game នេះ មានការអញ្ជើញចូលរួមពីនាយកប្រតិបត្ដិក្រុមហ៊ុនប៊ី.អាយ.ស៊ី. ម៉ាឃីត ឯ.ក លោកស្រី ប៊ុន សុវ៉ាត់ឌី និងនាយកប្រតិបត្ដិនៃក្រុមហ៊ុន Global Liquidity Exchange Co., Ltd. ដែលជាក្រុមហ៊ុនសមភាគីកណ្ដាល លោក កែម សុភ័ក្រ្តា ដើម្បីជាកិច្ចស្វាគមន៍ និងលើកទឹកចិត្ដដល់ភ្ញៀវកត្ដិយសទាំងអស់ ដែលបានចំណាយពេលចូលរួមក្នុងកម្មវិធីប្រកួតរបស់ក្រុមហ៊ុន ដែលរៀបចំឡើងនៅក្នុងអគារ ធនាគារ B.I.C (Cambodia) Bank PLC. ជាន់ទី២ លើមហាវិថីព្រះមុនីវង្ស ខណ្ឌចំការមន រាជធានីភ្នំពេញ ចាប់ពីម៉ោង ១រហូតដល់ម៉ោង៥រសៀល។

សូមរំលឹកថា មុនកម្មវិធីផ្តាច់ព័្រត្រ ក្រុមហ៊ុនបានរៀបចំវគ្គជម្រុះតាំងពីថ្ងៃទី ០១ ខែ ធ្នូ ឆ្នាំ២០២១ មកម្ល៉េះ តាមប្រព័ន្ធអនឡាញ ដោយក្រុមហ៊ុនបានបង្កើតគណនីសាកល្បង (Demo Account) ជូនអតិថិជន នីមួយៗ ដែលបានចុះឈ្មោះ យកទៅធ្វើការជួញដូរ ជាមួយនិងការផ្ដល់ជូនសមតុល្យសាច់ប្រាក់ស្មើៗគ្នា ដើម្បីធ្វើការប្រកួត បន្ទាប់មកក្រុមហ៊ុនបានធ្វើការជម្រុះចេញទុកត្រឹមតែ ៣០ នាក់ដែលនៅសល់សមតុល្យសាច់ប្រាក់ខ្ពស់ជាងគេប៉ុណ្ណោះ ដើម្បីចូលរួមប្រកួតក្នុងវគ្គផ្ដាច់ព្រ័ត្រនេះ ។ ដោយឡែកសម្រាប់ការប្រកួតវគ្គផ្ដាច់ព្រ័ត្រ ត្រូវបានធ្វើឡើងជា ២ វគ្គផ្សេងគ្នា។

ក្នុងវគ្គទី១ បេក្ខជនទាំង ៣០ រូប ត្រូវប្រកួតប្រជែងត្រេតរយៈពេល ៣០ នាទីដើម្បីរកអ្នកឈ្នះចំនួន ១០ រូប ដែលត្រូវឡើងទៅប្រកួតបន្ដនៅវគ្គផ្តាច់ព្រ័ត្រ ដើម្បីស្វែងរកអ្នកឈ្នះចុងក្រោយចំនួន ៣ រូប ដើម្បីទទួលរង្វាន់ពីក្រុមហ៊ុន ដែលរង្វាន់រួមមាន ៖
•រង្វាន់អ្នកឈ្នះលេខ១ ទទួលបាន iPad Air Pro ចំនួន ១ គ្រឿង មានតម្លៃប្រហែល ១៤០០ ដុល្លារ
•រង្វាន់អ្នកឈ្នះលេខ២ ទទួលបានសាច់ប្រាក់ចំនួន ៣០០ ដុល្លារ
•រង្វាន់អ្នកឈ្នះលេខ៣ ទទួលបានសាច់ប្រាក់ចំនួន ២០០ ដុល្លារ

ក្រៅពីការប្រកួតប្រជែងត្រេតកំសាន្ដទទួលរង្វាន់ហើយ ក្រុមហ៊ុន ប៊ី.អាយ.ស៊ី ម៉ាឃីត.ឯក ក៏មានការធ្វើបទបង្ហាញខ្លីអំពី ការអភិវឌ្ឍ និងរីកចម្រើនរបស់ក្រុមហ៊ុនតាំងពីថ្ងៃកកើតដំបូង រហូតដល់បច្ចុប្បន្នពីសំណាក់នាយកប្រតិបត្ដិនៃក្រុមហ៊ុន ហើយក្នុងនោះក៏មានការបង្ហាញពីចំណាប់អារម្មណ៍របស់នាយកប្រតិបត្ដិនៃក្រុមហ៊ុនសមភាគីកណ្ដាល Global Liquidity Exchange Co., Ltd. ។ លើសពីនេះទៅទៀត នៅអំឡុងពេលប្រកួតវគ្គផ្ដាច់ព្រ័ត្រនោះ ក៏មានការចែករំលែកចំណេះដឹងសំខាន់ៗ អំពី ការគ្រប់គ្រងហានិភ័យនានា ទាក់ទងនឹងការជួញដូរឧបករណ៍និស្សន្ទ ទៅកាន់ភ្ញៀវកត្ដិយសទាំងអស់ដែលបានចូលរួមនៅក្នុងថ្ងៃនោះផងដែរ ។

សម្រាប់កម្មវិធីនេះ ក្រុមហ៊ុន ប៊ី.អាយ.ស៊ី ម៉ាឃីត.ឯក ធ្វើឡើងក្នុងគោលបំណងគាំទ្រ និងលើកកម្ពស់ចំពោះវិស័យជួញដូរឧបករណ៍និស្សន្ទនៅក្នុងប្រទេសកម្ពុជា ហើយក៏ចង់ចូលរួមចំណែក ធ្វើការផ្សព្វផ្សាយឱ្យកាន់តែទូលំទូលាយដល់ប្រជាពលរដ្ឋកម្ពុជា ក៏ដូចជាវិនិយោគិនក្នុងស្រុក និងក្រៅស្រុកទាំងអស់ ឱ្យបានយល់ជ្រាបបន្ថែម ដើម្បីជាទំនុកចិត្តក្នុងការវិនិយោគលើវិស័យមួយនេះក្នុងពេលបច្ចុប្បន្ន និងទៅថ្ងៃអនាគត។ ក្រុមហ៊ុន ប៊ី.អាយ.ស៊ី ម៉ាឃីត.ឯក សង្ឃឹមយ៉ាងមុតមាំថា វិស័យជួញដូរឧបករណ៍និស្សន្ទនៅក្នុងប្រទេសកម្ពុជា នឹងមានការរីកចម្រើនខ្លាំងនៅពេលដ៏ខ្លីខាងមុខនេះ៕

ភ្នំពេញ៖​ លោកឧកញ៉ា ទៀ វិចិត្រ សមាជិកយុវជនគណបក្ស ប្រជាជនកម្ពុជា ខេត្តព្រះសីហនុ កាលថ្ងៃទី២១ ខែធ្នូ ឆ្នាំ២០២១ បានបញ្ជូនអូប័រល្បឿនលឿន របស់ក្រុមហ៊ុន GTVC ទៅទទួលយក ភ្ញៀវទេសចរណ៍មួយរូប ជាជនបរទេស ដែលបានដួលសន្លប់ នៅមុខបន្ទប់ផ្ទះសំណាក់ ប៊ិច ហៅ ស្ថិតនៅភូមិកោះរ៉ុងសន្លឹម(23) សង្កាត់កោះរ៉ុងសន្លឹម ក្រុងកោះរ៉ុង ខេត្តព្រះសីហនុ បញ្ជូនយកមកខេត្តព្រះសីហនុ ដើម្បីសង្គ្រោះនៅមន្ទីរពេទ្យ។

បើតាមលោកឧកញ៉ា ទៀ វិចិត្រ មានប្រសាសន៍ថា ជនរងគ្រោះជាភ្ញៀវទេសចរណ៍នោះ មានឈ្មោះ មានឈ្មោះ Wayne Michael Meegan ភេទប្រុស អាយុ៣៨ឆ្នាំ ជនជាតិ អៀរឡង់។

ភ្ញៀវទេសចរណ៍រងគ្រោះខាងលើ ត្រូវបានក្រុមការងារសង្គ្រោះ​ របស់ក្រុមហ៊ុនលោកឧកញ៉ា សហការជាមួយសម្ថកិច្ចមូលដ្ឋាន បញ្ជូនតាមអូប័រល្បឿនលឿន របស់ ក្រុមហ៊ុន GTVC មកកាន់កំពង់ផែ នៅក្រុងព្រះសីហនុ នឹងបន្តដឹកតាមរថយន្តសង្គ្រោះ របស់ក្រុមហ៊ុនផ្ទាល់ ដើម្បីយកទៅសង្គ្រោះ នៅមន្ទីរពេទ្យក្នុងខេត្តព្រះសីហនុ។

ប្រភពព័ត៌មានចុងក្រោយ ពីគ្រូពេទ្យឲ្យដឹងថា ដោយស្ថានភាពអាការៈជំងឺជនរងគ្រោះ មានសភាពធ្ងន់ធ្ងរ គ្រូពេទ្យមិនអាចជួយបាន ជនរគ្រោះក៏បានទទួលមរណភាព នៅក្នុងមន្ទីរពេទ្យ ក្នុងនោះ លោកឧកញ៉ាទៀ វិចិត្រ ក៏បានសម្តែងការសោកស្តាយ និងចូលរួមរំលែកទុក្ខ ជាមួយក្រុមគ្រួសារ របស់ជនរងគ្រោះផងដែរ ៕

កណ្ដាល៖ កាលពីមុន វិទ្យាល័យ​ ហ៊ុន សែន សេរីភាព មិនធ្លាប់បាន​​ប្រើប្រាស់​បច្ចេកវិទ្យា ​ឌីជីថល​សោះឡើយ រហូតដល់ពេល​ផ្ទុះ​ឡើង ជំងឺរាតត្បាតកូវីដ-១៩ ដែល​នាំ​ឲ្យ​សាលារៀនបិទទ្វារ នៅឆ្នាំ​២០២០ ។

ក្នុងអំឡុងពេលជំងឺរាតត្បាតនេះ ការបង្រៀនត្រូវបានធ្វើតាមអនឡាញ ហើយ​សាលាបានចាប់ផ្ដើម​ ប្រើ​ប្រព័ន្ធ​គ្រប់គ្រង​ព័ត៌មាន​សាលារៀន (SIS) ដែល​បង្កើត​ឡើង​និង​ដាក់​ឲ្យ​ប្រើប្រាស់​ដោយ​ក្រុមហ៊ុន មិត្តហ្វូន សម្រាប់​សាលារៀន​នៅទូទាំងប្រទេស ដើម្បីបម្រើ​ដល់​សកម្មភាព​រៀន​ និង​បង្រៀន ​។

ក្នុងបរិបទ​ជំងឺរាតត្បាតកូវីដ-១៩ និង​ការបង្រៀនធ្វើឡើង​តាមអនឡាញ ប្រព័ន្ធ SIS បាន​ផ្ដល់​ប្រយោជន៍​ជាច្រើន ​ដល់​ការរៀនសូត្រ​របស់សិស្ស​ផង និងដល់​ការងារ​បង្រៀន​របស់​គ្រូផង ។ SIS គឺជា​កម្មវិធី​មួយ​សម្រាប់​រក្សាទុក​ ឯកសារ​នៅ​មួយកន្លែងដែល ងាយស្រួល​ក្នុងការស្រាវជ្រាវរក ដោយ​ចំណាយពេល​ តែ​ប៉ុន្មាន​វិនាទីប៉ុណ្ណោះ ព័ត៌មាន​ជាច្រើន​អាចរក​ឃើញ​ភ្លាម ។ ប្រព័ន្ធនេះក៏ជួយទប់ស្កាត់​មិន​ ឲ្យ​ឯកសារ​បាត់​ឬ​ខូចខាត ដោយសារសត្វល្អិត ឬទឹក ឬ​ពុកផុយ​នៃក្រដាស​ ផងដែរ ។ ជាមួយគ្នានេះដែរ ប្រព័ន្ធ​បណ្ណសារ​ឌីជីថល ជួយរក្សាទុកដាក់​ព័ត៌មាន​ របស់សាលារៀនឲ្យកាន់តែ មានសុវត្ថិភាពជាងមុនថែមទៀត ។

យោងតាម​លោក ម៉ម សុធានី នាយកវិទ្យាល័យ​ ហ៊ុន សែន សេរីភាព បាន​ឲ្យ​ដឹងថា អ្វីៗ​មានភាពងាយស្រួល​ជាងពីមុន នៅពេលដែល​សាលា បានងាកមក​ប្រើប្រាស់​ប្រព័ន្ធ SIS ។ ហើយ​ទាំងគ្រូ​បង្រៀន ទាំង​សិស្ស​ទទួលផល​ប្រយោជន៍ ជាច្រើនពីប្រព័ន្ធ​នេះ ។

លោកនាយក ម៉ម សុធានី បានមានប្រសាសន៍​យ៉ាង​ដូច្នេះ​ថា «ឥឡូវនេះ លោកគ្រូអ្នកគ្រូ​អាច​បញ្ចូល​ ពិន្ទុ​សិស្ស​នៅក្នុងប្រព័ន្ធ​បាន ។ សិស្ស​អាចតាមដាន​កាលវិភាគសិក្សា​ និងថ្នាក់រៀនរបស់ខ្លួនបាន ។» លោក​បាន​បន្ថែមទៀតថា «ប្រព័ន្ធនេះងាយស្រួល​ក្នុងការប្រើ នៅពេលយើងយល់ពីវា ។»

អ្នកគ្រប់គ្រងរដ្ឋបាល​របស់សាលា គឺលោក ឈិន គឹមហេង បាន​និយាយថា អ្វីៗ​កាន់តែស្រួលប្រើ​ជាងមុន ​ជាមួយនឹងប្រព័ន្ធ SIS «កាលពីមុន កិច្ចការខ្លះដែលចំណាយពេល ៣០នាទី ទៅមួយម៉ោង ដូចជា​ការបញ្ចូល​ពិន្ទុ​ប្រចាំឆ្នាំ ឥឡូវនេះ ស៊ីពេលត្រឹមតែ៥នាទីប៉ុណ្ណោះ ។»

យោងតាមក្រុមហ៊ុនមិត្តហ្វូន ដែលជាអ្នកបង្កើត​ប្រព័ន្ធ​នេះ​ឡើង ប្រព័ន្ធ SIS ត្រូវបានអភិវឌ្ឍ​ឡើង​សម្រាប់​ ដាក់ពង្រាយ​ទៅកាន់​គ្រប់ សាលារៀន​នៅតាមទីជនបទ ដែល​ត្រូវការប្រើប្រព័ន្ធ​នេះ​ចាំបាច់បំផុត ។

ប្រធាន​ផ្នែក​ដែលទទួលបន្ទុក​ប្រព័ន្ធ SIS នៅក្រុមហ៊ុន​មិត្តហ្វូន បាន​និយាយ​យ៉ាងដូច្នេះថា «យើង​នឹង​ដាក់​ពង្រាយ​ និងគាំទ្រ​ដល់​ប្រព័ន្ធ​អប់រំ​ ដោយប្រើប្រព័ន្ធ SIS នេះ ដោយ​ផ្ដល់​ស៊ីមកាត​ដែល​ប្រើ​អ៊ីនធឺណិត ​ដោយឥតគិតថ្លៃ ដើម្បី​ឲ្យ​សិស្សានុសិស្ស​អាចរៀនសូត្រ ដោយ​មិន​ចាំបាច់​បារម្ភ​អំពី​ស្ថានភាព ហិរញ្ញវត្ថុ​គ្រួសារ​ឡើយ ។»

មិត្តហ្វូន បាន​និងកំពុងនាំមុខគេ​ នៅក្នុង​ការជួយ​គាំទ្រ​ដល់ រាជរដ្ឋាភិបាលកម្ពុជា​ ដើម្បីអនុវត្ត​កម្មវិធី​អភិវឌ្ឍន៍ ឌីជីថល​ជាតិរបស់ខ្លួន ។ កន្លងមក ក្រុមហ៊ុន​បាន​ធ្វើការយ៉ាងជិតស្និទ្ធិ​ជាមួយ ​ក្រសួងស្ថាប័ន​រដ្ឋសំខាន់ៗ ដើម្បី​អនុវត្តគម្រោងឌីជីថលូបនីយកម្ម នៅក្នុងវិស័យជាច្រើន ដូចជា វិស័យអប់រ សុខាភិបាល និង​ដឹកជញ្ជូន ។

ជា​ក្រុមហ៊ុនឈានមុខគេមួយ​ នៅក្នុងវិស័យ​ទូរគមនាគមន៍ និង​បច្ចេកវិទ្យាឌីជីថល​ មិត្តហ្វូន មាន​ហេដ្ឋា​រចនាសម្ព័ន្ធ បណ្ដាញធំជាងគេបំផុត ដែល​បម្រើ​សេវាកម្ម​ដល់ ​ប្រជាជន​កម្ពុជាប្រមាណ ៩លាននាក់ នៅទូទាំងប្រទេស ៕