ភ្នំពេញ៖ តាមរយៈការប៉ាន់ស្មានតម្លៃក្នុងរយៈពេល៧ខែឆ្នាំ២០២១ កម្ពុជាទទួលបានចំណូលពីការនាំចេញកសិផល (ឯកតាតម្លៃផ្អែកតាមវិក្កយបត្ររបស់អ្នកនាំចេញ) មានចំនួន ២ ៩៦៤ ៩៧៤ ៧១៤,៤៣ដុល្លារអាមេរិក ដែលក្នុងនោះ ការនាំចេញអង្ករមានចំនួន ២៦១ ៨៣៥ ៩២៥ដុល្លារអាមេរិក ,ការនាំចេញស្រូវមានចំនួន ៣២៩ ៣៥១ ៥២៤ដុល្លារអាមេរិក ,ការនាំចេញកសិផលក្រៅពីស្រូវ-អង្ករមានចំនួន ២ ៣៧៣ ៧៨៧ ២៦៥,៤៣ដុល្លារអាមេរិក។ នេះបើយោងតាមហ្វេសប៊ុក លោក វេង សាខុន រដ្ឋមន្រ្តីក្រសួងកសិកម្មរុក្ខាប្រមាញ់និងនេសាទ ឲ្យដឹងនៅថ្ងៃទី៣១ ខែកក្កដា ឆ្នាំ២០២១នេះ។

ការនាំចេញកសិផលសរុបក្នុងរយៈពេល៧ខែឆ្នាំ២០២១ មានកំណើនចំនួន ៨៧,១០% ក្នុងនោះកសិផល ក្រៅពីអង្ករមានការកើនឡើងចំនួន ១០៨,៦៣% ខណៈការនាំចេញអង្ករមានការថយចុះចំនួន -២៧,២៧% ដោយសារកង្វះទូរកុងតេន័រសម្រាប់ផ្ទុក និងតម្លៃដឹកជញ្ជូនកើនឡើង។

យោងតាម អគ្គនាយកដ្ឋានកសិកម្មនៃក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ក្នុងរយៈពេល៧ខែឆ្នាំ២០២១នេះ កម្ពុជាបាននាំចេញកសិផលទៅក្រៅប្រទេស បរិមាណសរុប ៥ ០៣២ ៩៦៨,៦០តោន ទៅកាន់ទិសដៅ ៦៤ប្រទេស គឺមានការកើនឡើងចំនួន ២ ៣៤២ ៩៨១,៣៩តោន ស្មើនឹង ៨៧,១០%  ហើយបើធៀបនឹងរយៈពេលដូចគ្នាក្នុងឆ្នាំ២០២០ គឺទទួលបានត្រឹមតែ ២ ៦៨៩ ៩៨៧,២២តោន ៕

ភ្នំពេញ៖ លោក ហួត ពុំ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានថ្លែងថា ទោះបីជាស្ថានភាពសង្គម-សេដ្ឋកិច្ចកម្ពុជា រងគ្រោះពីវិបត្តិនៃជំងឺកូវីដ-១៩ ក៏ពិតមែន ប៉ុន្តែវិបត្តិនេះ លាតត្រដាងនូវកាលានុវត្តភាពជាច្រើន ដែលរាជរដ្ឋាភិបាលកម្ពុជា កំពុងចាប់យក។

ក្នុងវេទិកាកម្រិតខ្ពស់នៃ ធនាគារខួរក្បាលកម្ពុជា-ចិន លើកទី២ «ដំណើរឆ្ពោះទៅកាន់ដំណាក់កាល នៃការវិវឌ្ឍថ្មី នៃទំនាក់ទំនងទ្វេភាគីកម្ពុជា-ចិន នាថ្ងៃទី២៨ ខែកក្កដា ឆ្នាំ២០២១ តាមប្រព័ន្ធវិដេអូ លោក ហួត ពុំ បានថ្លែងឲ្យដឹងថា ដង្ហើមជីវិតមានសារៈសំខាន់ ជាងដង្ហើមសេដ្ឋកិច្ច ប៉ុន្តែវិបត្តិនៃជំងឺកូវីដ-១៩ គឺជាការធ្វើតេស្ត ដែលមិនធ្លាប់មានកន្លងមក ទៅលើសមត្ថភាពប្រព័ន្ធសុខភាព សាធារណៈរបស់ប្រទេសនីមួយៗ ក៏ដូចជាប្រទេសកម្ពុជា ។

លោកបញ្ជាក់ថា «នៅគ្រប់វិបត្តិដែលកើតមានឡើង តែងតែបង្កប់មាននូវកាលានុវត្តភាព ដែលយើងមិនត្រូវមើលរំលងនោះទេ ។ ទោះបីជាស្ថានភាពសង្គម-សេដ្ឋកិច្ច របស់កម្ពុជាបានរងគ្រោះ ពីវិបត្តិនៃជំងឺកូវីដ-១៩ នេះក៏ពិតមែន ប៉ុន្តែវិបត្តិនេះបានលាតត្រដាង នូវកាលានុវត្តភាពជាច្រើន ដែលរាជរដ្ឋាភិបាលកម្ពុជា បាននិងកំពុងចាប់យក»។

លោកបន្ដថា ជាក់ស្តែង នៅក្នុងគោលបំណងកាត់បន្ថយ នូវសម្ពាធមកលើស្ថានភាពសេដ្ឋកិច្ច និងរក្សាឲ្យបាន នូវស្ថិរភាពជីវភាព របស់ប្រជាជន រាជរដ្ឋាភិបាលកម្ពុជា បានដាក់ចេញ នូវវិធានការអន្តរាគមន៍ ចំនួន៩ ជុំ ។ តាមរយៈការដាក់ចេញ នូវវិធានការទាំងនេះ បានសង្កេតឃើញច្បាស់ អំពីតម្រូវការចាំបាច់ ក្នុងការកែទម្រង់មុតស្រួចជាច្រើន ដែលមានសារៈសំខាន់ ក្នុងការស្តារ និងកសាងភាពធន់នៃ ស្ថានភាពសង្គម-សេដ្ឋកិច្ចកម្ពុជា សម្រាប់ពេលនេះ និងអនាគតកាល ។

លោកបញ្ជាក់ទៀតថា ក្នុងន័យនេះ រាជរដ្ឋាភិបាលកម្ពុជា នឹងប្រកាន់យកអភិក្រម ចំនួន៣ គឺ៖ ការរក្សាលំនឹង និងការស្តារឡើងវិញ (Recovery), ការកែទម្រង់ (Reform) និងការកសាងភាពធន់ (Resiliency) ដើម្បីរៀបចំស្ថានភាពសេដ្ឋកិច្ច ឲ្យត្រឡប់មកវិថីនៃកំណើនឡើងវិញ ប្រកបដោយចីរភាព និងបរិយាប័ន្ន តាមគន្លងប្រក្រតីភាពថ្មី ។

ជាងនេះទៅទៀត លោកអនុរដ្ឋលេខាធិការ មានជំនឿចិត្តយ៉ាងមុតមាំ ទៅលើវិវឌ្ឍនភាពដ៏រឹងមាំ និងភាពជិតស្និទ្ធនៃទំនាក់-ទំនងទ្វេភាគីកម្ពុជា-ចិន ទោះបីជាស្ថិតក្នុងបរិការណ៍ ដ៏លំបាកនេះក៏ដោយ ៕