ភ្នំពេញ៖ធនាគារពិភពលោក ឲ្យដឹងថា សេដ្ឋកិច្ចរបស់កម្ពុជាកំពុងរើបឡើងវិញបន្តិចម្តងៗហើយ​ ជាមួយ​ការ​ព្យាករណ៍ទុកថា វា​​នឹង​ទទួល​បាន​កំណើន​ជិត​ ៤ភាគរយ ក្នុង​ឆ្នាំ​២០២១ បន្ទាប់​ពី​រួញទំហំអស់​ ៣,១ភាគរយ ក្នុង​ឆ្នាំ២០២០។ យ៉ាងណាក្តី ការ​រើបឡើងវិញនេះ​មានលក្ខណៈមិនដូចគ្នាទេនៅតាមផ្នែកនានានៃ​សេដ្ឋកិច្ច ហើយ​វាក៏ស្ថិតនៅក្នុងសភាពផុយស្រួយនៅឡើយដែរ មួយផ្នែកដោយសារតែវិធានការបិទខ្ទប់ត្រូវ​បាន​ដាក់​អនុវត្ត​ម្តងទៀត ដើម្បីទប់ស្កាត់ការរាលដាលនៃការឆ្លងវីរុសកូវីដ១៩។ ធនាគារពិភពលោក​បាន​និយាយដូច្នេះនៅក្នុង​របាយការណ៍បច្ចុប្បន្នភាពសេដ្ឋកិច្ច​របស់​កម្ពុជា ក្រោមចំណងជើងថា ដំណើរឆ្ពោះ​ទៅការ​រើបឡើងវិញ។

តាមសេចក្ដីប្រកាសព័ត៌មាន របស់ធនាគារពិភពលោក នៅថ្ងៃទី១៧ ខែមិថុនា ឆ្នាំ២០២១ បានបញ្ជាក់ថា ខណៈដែលវិស័យមួយចំនួន​មាន​ការរីកចម្រើន ផ្នែកដទៃទៀតនៅគាំងទ្រឹង ដោយសារតែការរាតត្បាតនៃជំងឺ។ វិស័យ​កសិកម្ម​នៅរក្សា​ភាពធន់​បាន​គួរសមដោយសារតែមានតម្រូវការខ្លាំង អមដោយ​ការ​នាំចេញក្រោមកិច្ចព្រម​ព្រៀង​ពាណិជ្ជកម្មសេរីដែលកម្ពុជានិងចិនបានចុះហត្ថលេខាជាមួយគ្នា។ ផ្នែកឧស្សាហកម្មផលិត​ក៏​បាន​រើបឡើងវិញជាបណ្តើរៗដែរ ដោយត្រូវ​សម្របខ្លួន​ទៅតាម​លក្ខខណ្ឌប្រែប្រួលនៅខាងក្រៅ។ អាជីវកម្ម​បោះដុំ​និង​លក់រាយ​បាន​ប្រឹងរើបឡើងវិញ​យឺតៗដែរ នៅពេលដែលសកម្មភាព​សេដ្ឋកិច្ច​ក្នុង​ស្រុកងើបឡើងវិញបន្តិចម្តងៗ។ ផ្ទុយទៅវិញ ផ្នែកនានានៃវិស័យសេវា ដូចជា​ផ្នែក​ស្នាក់នៅ, ភោជនីយដ្ឋាន និង​ផ្នែកដឹកជញ្ជូន នៅតែបន្តរងការ​ប៉ះទង្គិចខ្លាំងពីការធ្លាក់ចុះនៃទេសចរណ៍ក្នុងស្រុក​និង​អន្តរជាតិ។ ការវិនិយោគផ្ទាល់​ពីបរទេសនៅតែហូរចូល​ឥតដាច់ ព្រម​ទាំង​ជួយ​ទ្រ​ទ្រង់​ដល់​វិស័យ​ក្រៅប្រទេស​ផង​ដែរ។

ទៅមុខទៀត ចក្ខុវិស័យ​សម្រាប់​កំណើនរបស់កម្ពុជានៅតែប្រឈមនឹង​ភាពមិនប្រាកដប្រជាខ្លាំង ក្នុងនោះទ្រង់ទ្រាយ និង​ ល្បឿន​នៃ​ដំណើររើបឡើងវិញនេះអាស្រ័យស្ទើរតែទាំងស្រុងទៅលើសភាព​​របស់​វីរុស និងទៅលើ​ល្បឿន​នៃ​ការ​ចាក់​វ៉ាក់សាំង​ការ​ពារ។ របាយការណ៍ក៏បានពិនិត្យមើលសេណារីយោអវិជ្ជមានដែរ ដែលក្នុងនោះអាចថា​កម្មវិធីចាក់វ៉ាក់សាំងមានភាពយឺតយ៉ាវ ហើយវិធានការបិទខ្ទប់ទូទាំងប្រទេសនៅតែមានញឹកញាប់និងអូសបន្លាយយូរ។ ក្រោមលក្ខខណ្ឌបែបនេះ សេដ្ឋកិច្ច​ តាមការព្យាករណ៍ នឹងមានកំណើន​តែ​ ១ភាគរយ ប៉ុណ្ណោះ ក្នុង​ឆ្នាំ​២០២១។

របាយការណ៍បច្ចុប្បន្នភាពនេះផ្តល់​អនុសាសន៍ថា កម្ពុជា​គួរ​តែ​ចាត់វិធានការភ្លាមៗដើម្បីលើកកម្ពស់ភាពជឿជាក់​របស់​ទី​ផ្សារ តាម​រយៈការ​ពន្លឿនកម្ម​វិធីចាក់វ៉ាក់សាំង ទន្ទឹម​គ្នា​នឹង​ការ​ប្រឹងប្រែង​ទប់ស្កាត់​ការ​ឆ្លងវីរុស និង ការស្លាប់ ឱ្យ​មាន​ប្រសិទ្ធភាព​បន្ត​ទៀត។ ដោយសារតែកម្ពុជា​នៅមានសមត្ថភាពហិរញ្ញវត្ថុល្មមដែរ រដ្ឋា​ភិបាល​អាច​បន្ត​​ការ​គាំទ្រ​ដល់​កម្មវិធី​សង្គ្រោះ, ស្តារឡើងវិញ និង​កំណើន ដោយធ្វើការកែលម្អ​បរិយាកាស​ធុរកិច្ច​និង​វិនិយោគ, ផ្តល់​កម្មវិធីគាំពារសង្គម និង​ជំរុញការវិនិយោគ​សាធារណៈ និង​កំណើនសេដ្ឋកិច្ច​ដែលគិតគូរដល់អ្នកក្រីក្រ។ ដើម្បី​រក្សា​បាន​ស្ថិរភាពនៃវិស័យ​ហិរញ្ញវត្ថុ ជារឿងសំខាន់មួយដែរដែលអាជ្ញាធររដ្ឋា​ភិបាល​ត្រូវ​បន្ត​តាម​ដាន​ឱ្យ​បាន​ដិតដល់​លើ​ភាព​ងាយ​រង​គ្រោះ ​ដែល​អាច​បណ្តាល​មកពី​ការពុះកញ្ជ្រោល​យូរពេករបស់​វិស័យអចលនទ្រព្យ និង ការ​ផ្តល់​ឥណទាន​កាន់​តែ​ច្រើនឡើង​ចំពោះ​វិស័យសំណង។ ​

លោកស្រី អ៊ិនហ្គូណា ដូប្រាចា ប្រធានគ្រប់គ្រងការិយាល័យធនាគាពិភពលោកប្រចាំកម្ពុជា មាន​ប្រសាសន៍ថាៈ “ដូចប្រទេសជាច្រើនទៀតនៅក្នុងតំបន់ដែរ កម្ពុជា​បាន​រងការប៉ះទង្គិច​ខ្លាំង​ពីការធ្លាក់ចុះនៃតម្រូវការ​លើសកលលោកដោយ​សារ​តែ​កូវីដ១៩។ ប៉ុន្តែដំណឹងល្អនៅត្រង់ថា កម្ពុជា​បាន​ចាក់​វ៉ាក់សាំងឱ្យមនុស្ស​ក្នុង​ប្រទេស​បាន​ជាង ៣លាននាក់ រួច​ហើយ ដែល​ជា​អត្រា​ខ្ពស់មួយនៅក្នុងតំបន់។” លោកស្រីបានបន្ថែមទៀតថា៖ “​ធនាគារពិភពលោកនៅតែបន្តធ្វើ​ការជាមួយកម្ពុជា​ដើម្បីជួយ​ប្រទេស​នេះបន្ថែមទៀត​ក្នុង​ការ​ប្រយុទ្ធ​នឹង​ការ​ឆ្លងរាតត្បាតនៃវីរុសកូវីដ១៩ និងជួយ​ស្តារសេដ្ឋកិច្ច​​ និងសង្គមឱ្យមានភាពធន់រឹងមាំឡើងវិញ។”

របាយការណ៍នេះមាន​ជំពូកពិសេសមួយពិនិត្យមើលទៅលើ​មេរៀនដែលគួររៀនសូត្រ​​បាន​ពីកម្មវិធីអន្តរាគមន៍ផ្នែកសង្គម ដែល​កម្ពុជាមិន​ត្រឹម​តែ​​ដាក់​ចេញ​យ៉ាង​រហ័សប៉ុណ្ណោះទេ តែថែម​ទាំង​ពង្រីកនិងធ្វើ​ឱ្យ​កាន់​តែស៊ីជម្រៅ​ទៀត​ផង ជា​ពិសេស​កម្មវិធី​ផ្ទេរសាច់ប្រាក់ទៅឱ្យគ្រួសារក្រីក្រ។ កម្មវិធីផ្ទេរសាច់ប្រាក់នេះត្រូវ​បាន​បង្កើតឡើងនៅខែមិថុនា ឆ្នាំ​២០២០ ហើយ​គិតត្រឹមខែកុម្ភៈ​ ឆ្នាំ​២០២១ មាន​គ្រួសារ​ក្រីក្រ​ជាង ៦៨៨ ០០០ គ្រួសារ ឬ ស្មើនឹង ១៩,៥ភាគរយ នៃ​ចំនួនផ្ទះគ្រួសារសរុបទូទាំងប្រទេស​ ទទួល​បាន​សាច់​ប្រាក់ផ្ទេរពីរដ្ឋាភិបាល។

របាយការណ៍នេះបានរំលេចផងដែរនូវអនុសាសន៍គោលនយោបាយសំខាន់ៗមួយចំនួន សម្រាប់​ទ្រទ្រង់​ដល់​ការ​រើប​ឡើង​វិញ​របស់​សេដ្ឋកិច្ច មាន​ដូច​ជា​ការ​ដាក់ចេញ​វិធានការ​ជំនួយផ្នែកសង្គមនៅក្រោយ​ដំណាក់​កាល​រាតត្បាតជំងឺដើម្បី​ឆ្លើយ​តប​ទៅ​នឹង​ស្ថានការណ៍កន្ត្រាក់​ណាមួយ តាមរយៈការ​ពង្រីក​វិសាល​ភាពគ្របដណ្តប់​របស់​កម្មវិធី IDPoor, ការ​រៀបចំបង្កើតមូលដ្ឋាន​ទិន្នន័យមួយសម្រាប់​ជនដែលគួរ​ទទួល​បាន​ការ​គាំទ្រ​ពីកម្មវិធីសង្គម, និង​ការ​ធ្វើ​យ៉ាង​ណា​ឱ្យ​មាន​តួ​អង្គ​ច្រើន​សម្រាប់​ធ្វើ​ការ​ចែក​ចាយ​ប្រាក់​ឧបត្ថម្ភសង្គមដល់​ជនក្រីក្រ៕

ភ្នំពេញ៖ លោកឧត្តមសេនីយ៍ត្រី នូវ សំអុល មេបញ្ជាការ តំបន់ប្រតិបត្តិការសឹករង​ ព្រះសីហនុ កាលពីថ្ងៃទី១៦ ខែមិថុនា ឆ្នាំ២០២១ បានថ្លែងអំណរគុណ ដ៏ជ្រាលជ្រៅជាទីបំផុត ចំពោះលោកឧកញ៉ា ទៀ វិចិត្រ ដោយបានចូលរួម សហការយ៉ាងល្អ លើការឧបត្ថម្ភផ្តល់ការដឹកជញ្ជូន ក្រុមការងារកងទ័ព នៃអង្គភាពតំបន់ប្រតិបត្តិការ សឹករងព្រះសីហនុ ដឹកនាំដោយ លោកស្រីវរសេនីយ៏ឯក សំ ចាន់ម៉ាឡា មេបញ្ជាការរង ធ្វើដំណើរទៅចាក់វ៉ាក់សាំង ការពារជំងឺកូវីដ-១៩ ជូនប្រជាពលរដ្ឋ នៅក្រុងកោះរ៉ុង ដល់គោលដៅដោយសុវត្ថិភាព​។

ភ្នំពេញ៖របាយការណ៍ អគ្គនាយកដ្ឋានកសិកម្ម (១៦/៦/២០២១) បានបញ្ជាក់ថា នៅឆ្នាំ២០២០ កម្ពុជាមានផ្ទៃដីដាំដុះដំឡូងមីសរុបចំនួន ៦៦៣ ៩២៩ ហិកតា បរិមាណផលសរុបចំនួន ១២ ៦៨០ ៩៨៧តោន និងទទួលបានទិន្នផលជាមធ្យមចំនួន ២០,៥៥ត/ហត។ ក្រៅពីការ ប្រើប្រាស់ក្នុងស្រុក កម្ពុជាបាននាំចេញដំឡូងមីស្រស់ ម្សៅដំឡូងមី ចំណិតដំឡូងមីស្ងួតគិតជាទឹកប្រាក់ប្រមាណពី ៣,៥០ ទៅ ៤ លានដុល្លារ/ឆ្នាំ។

តាមរយៈហ្វេសប៊ុកលោក វេង សាខុន បានឲ្យដឹងនៅថ្ងៃទី១៧ ខែមិថុនា ឆ្នាំ២០២១ ថា បច្ចុប្បន្ន កម្ពុជាបានចាត់ទុកដំឡូងមី គឺជាដំណាំសំខាន់ទី២ បន្ទាប់ពីដំណាំស្រូវសម្រាប់ផ្គត់ផ្គង់ ឲ្យទីផ្សារក្នុងស្រុក (ផលិតអាហារមនុស្ស និងសត្វ) និងនាំចេញ(ស្រស់ ចំណិតក្រៀម និងជាម្សៅ) ។

លោកបន្ថែមថា ដើម្បីឆ្លើយតបទៅនឹងតម្រូវការទីផ្សារ ផលិតកម្មដំឡូងមីមានការកើនឡើងយ៉ាងឆាប់រហ័សនៅក្នុងតំបន់ ធ្វើឲ្យផ្ទៃដីដំាដុះនៅក្នុងប្រទេសកម្ពុជា ឡាវ និងមីយ៉ាន់ម៉ា ក៏មានការកើនឡើងគួរឲ្យកាត់សម្គាល់ផងដែរ៕

ភ្នំពេញ៖ តាមរយៈក្រសួងពាណិជ្ជកម្ម ភាគីកម្ពុជា បានស្នើឱ្យបន្តជួយសម្របសម្រួលជំរុញធុរជន និងវិនិយោគិនស៊ុយអែតសំខាន់ៗ ដូចជា៖ ក្រុមហ៊ុនគ្រឿងសង្ហារឹម IKEA និងក្រុមហ៊ុនផលិតរថយន្ត Volvo មកស្វែងរកឱកាសធុរកិច្ច ខណៈដែលការកែច្នៃគ្រឿងសង្ហារឹម និងការផលិតគ្រឿងបង្គំនិងបន្លាស់យានយន្តកំពុងមានកំណើនខ្លាំងនៅកម្ពុជា និងការវិនិយោគលើវិស័យដទៃរួមមាន៖ ការកែច្នៃចំណីអាហារ និងផ្លែឈើតំបន់ត្រូពិច។ នេះបើតាមហ្វេសប៊ុក “ក្រសួងពាណិជ្ជកម្ម”។

ក្នុងឱកាសទទួលជួប លោក BJÖRN HÄGGMARK ឯកអគ្គរាជទូតនៃព្រះរាជាណាចក្រស៊ុយអែតប្រចាំព្រះរាជាណាចក្រកម្ពុជា ដើម្បីពិភាក្សាការងារ និងជម្រាបលា ខណៈដែលឯកឧត្តមបានបញ្ចប់អាណត្តិបេសកកម្មការទូតនៅកម្ពុជា នៅថ្ងៃទី១៥ ខែមិថុនា ឆ្នាំ២០២១ នាទីស្តីការក្រសួងពាណិជ្ជកម្ម លោក ប៉ាន សូរស័ក្ដិ រដ្ឋមន្រ្ដីក្រសួងពាណិជ្ជកម្ម បានសម្តែងការស្វាគមន៍យ៉ាងកក់ក្តៅ និងអបអរសាទរជូនឯកឧត្តមឯកអគ្គរាជទូត ចំពោះបេសកកម្មដ៏មានសារៈសំខាន់នៅកម្ពុជា និងបានឆ្លៀតឱកាសថ្លែងអំណរគុណដល់រាជរដ្ឋាភិបាលស៊ុយអែត ដែលបានចូលរួមយ៉ាងសកម្មក្នុងកិច្ចសហប្រតិបតិ្តការលើវិស័យសំខាន់ៗ រួមមាន៖ ពាណិជ្ជកម្ម អប់រំ ការកសាងសមត្ថភាពមន្រ្តីរាជការ និងការគាំទ្រភាពជាដៃគូរវាងរដ្ឋនិងឯកជន (PPP) នៅកម្ពុជា។

ភាគីទាំងពីរក៏បានពិភាក្សានិងផ្លាស់ប្តូរយោបល់ អំពីការលើកកម្ពស់ប្រព័ន្ធពាណិជ្ជកម្មពហុភាគី ដែលក្នុងនោះ លោករដ្ឋមន្រ្ដី បានជម្រាបជូន លោកឯកអគ្គរាជទូត អំពីគោលជំហររបស់កម្ពុជា ក្នុងការប្រកាន់ខ្ជាប់នូវក្របខណ្ឌពហុភាគីនិយម ក្នុងការដោះស្រាយបញ្ហាក្នុងគ្រប់វិស័យដោយអនុលោមតាមបទដ្ឋានអន្តរជាតិ និងមានការគិតគូរដល់ប្រទេសកំពុងអភិវឌ្ឍន៍ និងអភិវឌ្ឍន៍តិចតួច។

ជាមួយគ្នានេះដែរ លោករដ្ឋមន្រ្តី បានសំណូមពរលោកឯកអគ្គរាជទូត ឱ្យជម្រាបជូនថា្នក់ដឹកនាំរាជរដ្ឋាភិបាលស៊ុយអែត និងសហភាពអឺរ៉ុប អំពីកិច្ចខំប្រឹងប្រែងរបស់កម្ពុជា ក្នុងខឿនអភិវឌ្ឍន៍ប្រកបដោយនិរន្តរភាព និងសមធម៌ ទាំងក្នុងវិស័យសេដ្ឋកិច្ច សង្គមកិច្ច និងបរិស្ថាន។ ភាគីកម្ពុជា ក៏បានស្នើឱ្យបន្តជួយសម្របសម្រួលជំរុញធុរជន និងវិនិយោគិនស៊ុយអែតសំខាន់ៗ ដូចជា៖ ក្រុមហ៊ុនគ្រឿងសង្ហារឹម IKEA និងក្រុមហ៊ុនផលិតរថយន្ត Volvo មកស្វែងរកឱកាសធុរកិច្ច ខណៈដែលការកែច្នៃគ្រឿងសង្ហារឹម និងការផលិតគ្រឿងបង្គំនិងបន្លាស់យានយន្តកំពុងមានកំណើនខ្លាំងនៅកម្ពុជា និងការវិនិយោគលើវិស័យដទៃរួមមាន៖ ការកែច្នៃចំណីអាហារ និងផ្លែឈើតំបន់ត្រូពិច។

ជាកិច្ចឆ្លើយតប លោកឯកអគ្គរាជទូត បានកត់សម្គាល់ពីកំណើនសេដ្ឋកិច្ចកម្ពុជានាពេលកន្លងមក និងការធ្វើសមាហរណកម្មសេដ្ឋកិច្ច ដោយប្រកាន់ខ្ជាប់នូវប្រព័ន្ធពហុភាគីនិយម ព្រមទាំងវឌ្ឍនភាពនៃការបង្កើតបទបញ្ញត្តិ ដែលបម្រើដល់វិស័យឯកជន និងវិនិយោគិនបរទេសនៅកម្ពុជា។ លោក ក៏បានគូសបញ្ជាក់ផងដែរ នូវសារៈសំខាន់នៃការចូលរួមអភិវឌ្ឍន៍សេដ្ឋកិច្ចប្រកបដោយបរិយាប័ន្ន តម្លាភាព និងការគិតគូអំពីបញ្ហាបរិស្ថាន តាមរយៈការប្រើបា្រស់ថាមពលដែលអាចកកើតឡើងវិញ។

លោក ជឿជាក់ថា ស្ថានទូតស៊ុយអែតប្រចាំកម្ពុជាដែលមាននិវេសនដ្ឋាននៅទីក្រុងបាងកក នឹងបន្តកិច្ចសហប្រតិបត្តិការល្អជាមួយក្រសួងពាណិជ្ជកម្ម ក្នុងគោលបំណងលើកកម្ពស់កិច្ចសន្ទនា និងទំនាក់ទំនងពាណិជ្ជកម្មកម្ពុជា-ស៊ុយអែត។

គួរបញ្ជាក់ផងដែរថា ទំហំពាណិជ្ជកម្មកម្ពុជា-ស៊ុយអែត នៅឆ្នាំ២០២០ មានចំនួន ៦៤ លានដុល្លារអាមេរិក ខណៈដែលរយៈពេល៥ខែ នៅឆ្នាំ២០២១ មានចំនួន ២៣ លានដុល្លារអាមេរិក៕