­­­­­

រាជធានីភ្នំពេញ – ក្រុមហ៊ុន ហាវ៉ាស់ ខេមបូឌា (Havas Cambodia) បានប្រកាសពីការតែងតាំង និងដំឡើងឋានៈជាន់ខ្ពស់ដល់បុគ្គលិករបស់ខ្លួនជាបន្តបន្ទាប់ក្នុងគោលបំណងដើម្បីពង្រឹងសមត្ថភាព និងជំរុញកំណើនថ្មីៗបន្ថែមទៀតសម្រាប់ទីភ្នាក់ងារផ្សព្វផ្សាយពាណិជ្ជកម្ម (Agency) មួយនេះ។

ការផ្លាស់ប្តូរជាវិជ្ជមានដែលមានលក្ខណៈជាយុទ្ធសាស្ត្រច្បាស់លាស់ទាំងនេះ ធ្វើឡើងបន្ទាប់ពីមានការតែងតាំងលោក Rastislav Kanuch ជានាយកប្រតិបត្តិនៃក្រុមហ៊ុន Havas Cambodia កាលពីពេលថ្មីៗកន្លងទៅនេះ ដែលជាការឆ្លុះបញ្ចាំងឲ្យឃើញយ៉ាងច្បាស់ពីការប្តេជ្ញាចិត្តដ៏ឥតរួញរាប្រកបដោយថាមភាពខ្ពស់របស់ Agency ក្នុងការពង្រឹង និងពង្រីកវត្តមានរបស់ខ្លួននៅក្នុងទីផ្សារដែលកំពុងរីកចម្រើនឥតឈប់ឈរមួយនេះ។

លោក Peter Holán ទទួលតួនាទីជាប្រធានផ្នែកអន្តរកម្ម (Head of Interactions) ដើម្បីដឹកនាំលើកិច្ចការឌីជីថលសម្រាប់ក្រុមហ៊ុន Havas Cambodia ។ លោក Peter មានបទពិសោធន៍​ច្រើនរាប់មិនអស់លើជំនាញឌីជីថលដ៏សម្បូរបែប ជំនាញផ្នែកបច្ចេកវិទ្យាផ្សាយពាណិជ្ជកម្ម (AdTech) វេទិកាគ្រប់គ្រងទិន្នន័យ និងឧបករណ៍ប្រព័ន្ធផ្សព្វផ្សាយ ​( media tools)។ ក្នុងនាមជាប្រធានផ្នែកអន្តរកម្ម លោកមានភារកិច្ចក្នុងការបង្កើននូវការបម្រើសេវាកម្ម និងការផ្តល់ជូនប្រកបដោយភាពច្នៃប្រឌិត បង្កើតទំនាក់ទំនងល្អជាមួយអតិថិជន និងសហការយ៉ាងជិតស្និទ្ធជាមួយក្រុមការងារផ្នែកច្នៃប្រឌិត និងប្រព័ន្ធផ្សព្វផ្សាយ (creative and media teams) ដើម្បីរួមបញ្ចូលបច្ចេកវិទ្យា AdTech ស្តង់ដាសកលចូលទៅក្នុងយុទ្ធនាការផ្សព្វផ្សាយនានារបស់អតិថិជនឲ្យមានប្រសិទ្ធភាព។ លើសពីនេះទៀត កញ្ញា Junnette Hasco ត្រូវបានដំឡើងឋានៈជាប្រធានក្រុមការងារផ្នែកប្រព័ន្ធផ្សព្វផ្សាយ (Media Group) ដោយទទួលបន្ទុកលើការផ្តល់ជូនសេវាផ្នែកប្រព័ន្ធផ្សព្វផ្សាយ។

ក្នុងពេលជាមួយគ្នានេះដែរ កញ្ញា Sarah Louzioui ត្រូវបានតែងតាំងជាប្រធានគ្រប់គ្រងទូទៅនៅក្រុមហ៊ុន ហាវ៉ាស់ សាំប៉ាញ (Havas Champagne) ជាបុត្រសម្ព័ន្ធរបស់ក្រុមហ៊ុន Havas Cambodia ដែលផ្តល់ជូនសេវាកម្ម 360 ដឺក្រេ ប្រកបដោយភាពច្នៃប្រឌិត និងទំនុកចិត្តខ្ពស់។ កញ្ញា Sarah ជាមនុស្សម្នាក់ដែលពោរពេញទៅដោយចំណេះដឹងក្នុងវិស័យឧស្សាហកម្មនេះ និងមានជំនាញភាពជាអ្នកដឹកនាំយ៉ាងទូលំទូលាយ ដែលបានឆ្លងកាត់ការបំពេញការងារក្នុងបណ្តាស្ថាប័នផ្សេងៗជាច្រើន។ ដោយមាន សមត្ថភាពខ្ពស់ក្នុងការកាន់មុខងារជាប្រធានគ្រប់គ្រងទូទៅ គោលដៅចម្បងរបស់កញ្ញា គឺធានាផ្តល់ជូនអតិថិជននូវដំណោះស្រាយអភិវឌ្ឍន៍អាជីវកម្មដែលគ្របដណ្តប់លើគ្រប់ជ្រុងជ្រោយដោយរួមបញ្ចូលគ្នានូវការយល់ដឹងជាលក្ខណៈយុទ្ធសាស្រ្ត (strategic insights) ភាពច្នៃប្រឌិតខ្ពស់ និងការអនុវត្តដោយភាពវៃឆ្លាតប្រកបដោយការច្នៃប្រឌិត ស្របពេលចូលរួមចំណែកយ៉ាងសកម្មក្នុងការលើកកម្ពស់បទពិសោធន៍នៃប្រព័ន្ធផ្សព្វផ្សាយដ៏មានសារសំខាន់។

ទន្ទឹមនឹងការផ្តល់តម្លៃ និងលើកកិត្តិយសទាំងនេះស្របទៅនឹងសភាពការណ៍វិវត្តន៍ជាក់ស្តែងនៃឧស្សាហកម្មឌីជីថល និងបច្ចេកវិទ្យាផង កញ្ញា Constance Dayot ក៏ត្រូវបានដំឡើងឋានៈជានាយករងផ្នែកធនធានមនុស្ស (HR Associate Director) ផងដែរ។ ក្នុងតួនាទីដែលត្រូវបានដំឡើងនេះ កញ្ញា នឹងមើលការខុសត្រូវលើគំនិតផ្តួចផ្តើមផ្នែកធនធានមនុស្សនៅក្នុងប្រទេសកម្ពុជា និងប្រទេសថៃ ដោយធានាថា Agency នឹងនៅតែបន្តទាក់ទាញ និងរក្សាបាននូវបុគ្គលិកជំនាញ និងអ្នកដែលមានទេពកោសល្យកំពូលៗដើម្បីបំពេញការងារឲ្យបានកាន់តែប្រសើរប្រកបដោយប្រសិទ្ធភាពខ្ពស់នៅក្នុងអង្គភាព។

កាន់មុខតំណែងជានាយកផ្នែកគំនិតច្នៃប្រឌិត (Creative Director) លោក គង់ គីណាល់ ជាធនធានមនុស្សដ៏សំខាន់ មានជំនាញវិជ្ជាជីវៈច្បាស់លាស់មួយរូបទៀត ដែលត្រូវបានគេទទួលស្គាល់ជាទូទៅថាជាមនុស្សពូកែខាងការគិតប្រកបដោយទស្សនទាន​ ភាពច្នៃប្រឌិត និងយកចិត្តទុក​ដាក់ខ្ពស់ចំពោះយុទ្ធសាស្ត្រច្នៃប្រឌិតដែលមានមូលដ្ឋានគ្រឹះចាក់ឫសយ៉ាងរឹងមាំគួបផ្សំនឹងភាពប៉ិនប្រសប់របស់លោកក្នុងដឹកនាំការងារសិល្បៈ (art direction) ការរចនាក្រាហ្វិក (graphic design) និងផលិតកម្ម(production) ថែមទៀតផង។

ការបំពេញបន្ថែមលើការតែងតាំងមុខដំណែងថ្មីទាំងនេះ គឺជាការដំឡើងឋានៈ និងការផ្តល់តម្លៃដ៏ប្រសើរចំពោះការខិតខំប្រឹងប្រែងដែលក្រុមការងារសមនឹងទទួលបានបំផុត។ ក្នុងតួនាទីជួយគាំទ្រក្រុមការងារផ្នែកគំនិតច្នៃប្រឌិត កញ្ញា Freddie Bernal និង លោក សៅ បញ្ញារិទ្ធ ក៏ត្រូវបានដំឡើងឋានៈជានាយករងផ្នែកគំនិតច្នៃប្រឌិត (Associate Creative Directors) ផងដែរ។ ស្របពេលជាមួយគ្នានេះលោក​ ជិន ចន្ទពិសាល ត្រូវ​បាន​​ដំឡើង​ឋានៈ​ជា ប្រធានក្រុមគំនិតច្នៃប្រឌិតជាន់ខ្ពស់ (Senior Creative Group Head) ខណៈ លោក ខុន​ សុខមាស ហៅ “ស៊ូជីន” បាន​កាន់​តួនាទី​ជា​ប្រធាន​ក្រុមគំនិតច្នៃប្រឌិត (Creative Group Head) ។ បន្ថែម​ពី​លើ​នេះ លោក អ៊ុយ ច័ន្ទរក្សា ត្រូវ​បាន​គេ​ប្រគល់​ភារកិច្ច​ឲ្យ​មើល​ការ​ខុស​ត្រូវ​លើ​ផ្នែក​ផលិត​កម្ម​ មានតួនាទីជា​ប្រធានផ្នែក​ផលិតកម្ម (Head of Production)។

ទន្ទឹមនឹងនោះ ផ្នែកស្រាវជ្រាវរបស់ Havas Cambodia គឺ Barefoot ក៏បានដំឡើងឋានៈផងដែរជូនដល់អ្នកជំនាញផ្នែកស្រាវជ្រាវដែលមានបទពិសោធន៍យូរឆ្នាំ កញ្ញា ថ្លែន សុគ្គណ្ណារ៉ា ឲ្យទៅកាន់តួនាទីជានាយកផ្នែកស្រាវជ្រាវ (Research Director) ដែលទទួលខុសត្រូវលើការដឹកនាំគំនិតផ្តួចផ្តើមអភិវឌ្ឍន៍ការស្រាវជ្រាវថ្មីៗ ក៏ដូចជាជំរុញការអនុវត្តយុទ្ធសាស្ត្រទិន្នន័យអំពីប្រជាជន (people-centric data strategies)។

មានប្រសាសន៍ពាក់ព័ន្ធនឹងស្ថានការណ៍វិវឌ្ឍន៍នាពេលថ្មីៗនេះ  លោក Rastislav Kanuch នាយកប្រតិបត្តិក្រុមហ៊ុន Havas Cambodia បានសម្តែងសុទិដ្ឋិនិយមយ៉ាងដូច្នេះថា «នៅ Havas Cambodia យើងមិនគ្រាន់តែសម្របខ្លួនទៅនឹងការផ្លាស់ប្តូរនោះទេ យើងក៏ទទួលយកវាដោយក្តីពេញចិត្តផងដែរ​។ ការប្តេជ្ញាចិត្តប្រកប​ដោយឆន្ទៈមនសិការខ្ពស់របស់យើងចំពោះអតិថិជន ដៃគូ និងបុគ្គលិករបស់​យើង​នៅតែមានភាពរឹងមាំជាងពេលណាៗទាំងអស់។ យើងពិតជាមានក្តីរំភើបណាស់ចំពោះថាមពល និងជំនាញថ្មីៗដែលសមាជិកក្រុមរបស់យើងនាំយកមក។ យើងទន្ទឹងរង់ចាំអនា​គតប្រកបដោយឧត្តមភាពច្នៃប្រឌិត និងវឌ្ឍនភាពជាបន្តបន្ទាប់ជាមួយនឹងចីរភាពសម្រាប់ទាំងអស់គ្នា៕

******

អំពី Havas Group

Havas គឺជាក្រុមហ៊ុនទំនាក់ទំនងសកលដ៏ធំបំផុតមួយក្នុងពិភពលោក (global communications groups)។ បង្កើតឡើងក្នុងឆ្នាំ 1835 នៅទីក្រុងប៉ារីស គ្រុប មានបុគ្គលិកចំនួន 20 000 នាក់ ក្នុងបណ្តាប្រទេសជាង 100 ហើយដំណើរការតាមរយៈអង្គភាពអាជីវកម្មចំនួនបីរបស់ខ្លួនដែលគ្របដណ្តប់លើសកម្មភាពទំនាក់ទំនងទាំងអស់ (all communication)។ បេសកកម្មរបស់ក្រុមហ៊ុន Havas Group គឺធ្វើឱ្យមានភាពខុសប្លែកគ្នាយ៉ាងមានអត្ថន័យចំពោះម៉ាក អាជីវកម្ម និងមនុស្ស។ ដើម្បីបំពេញតម្រូវការរបស់អតិថិជនឲ្យបានកាន់តែប្រសើរ Havas បានទទួលយកគំរូអាជីវកម្មរួមបញ្ចូលគ្នាយ៉ាងពេញលេញតាមរយៈ បណ្តុំ Havas 60+ (60+ Havas Villages) នៅជុំវិញពិភពលោក។ នៅក្នុងបណ្តុំទាំងនេះ ក្រុមគំនិតច្នៃប្រឌិត ប្រព័ន្ធផ្សព្វផ្សាយ និងការថែទាំសុខភាព សហការធ្វើការងាររួមគ្នាយ៉ាងល្អ ដើម្បីធានាបាននូវភាពបត់បែន និងផ្តល់នូវបទពិសោធន៍ដ៏អស្ចារ្យគ្មានគូប្រៀបជូនដល់អតិថិជនគ្រប់ស្រទាប់វណ្ណៈទាំងអស់។ យើងប្ដេជ្ញាចិត្តក្នុងការកសាងវប្បធម៌ចម្រុះ ដែលមនុស្សគ្រប់គ្នាយល់ថាពួកគេជាម្ចាស់កម្មសិទ្ធិលើខ្លួនឯងចំពោះភាពជោគជ័យ និងភាពរីកចម្រើនរួមគ្នា។ Havas Group បានបញ្ចូល Vivendi ក្នុងខែធ្នូ ឆ្នាំ 2017។ ព័ត៌មានបន្ថែមអំពី Havas Group មាននៅលើគេហទំព័ររបស់ក្រុមហ៊ុន៖ havasgroup.com

#MeaningfulDifference

[រាជធានីភ្នំពេញ ថ្ងៃទី27 ខែកញ្ញា ឆ្នាំ2023] ធនាគារ ព្រីនស៍ ជាគ្រឹះស្ថានហិរញ្ញវត្ថុឈានមុខគេក្នុងប្រទេសកម្ពុជា ត្រូវបានទទួលស្គាល់ដោយពានរង្វាន់អន្តរជាតិដ៏មានកិត្យានុភាពចំនួនបីសម្រាប់អភិបាលកិច្ចសាជីវកម្មដ៏តឹងរឹងរបស់ខ្លួន ដែលត្រូវបានប្រសិទ្ធនាមជា ធនាគារអភិបាលកិច្ចសាជីវកម្មល្អបំផុតនៅកម្ពុជាប្រចាំឆ្នាំ2023 ដោយទស្សនាវដ្តីGlobal Finance & Banking ទស្សនាវដ្តីInternational Finance និងទស្សនាវដ្តីWorld Economic។

ពានរង្វាន់ទាំងបីនេះ គឺជាសក្ខីភាពមួយចំពោះការប្តេជ្ញាចិត្តរបស់ធនាគារ ព្រីនស៍ ក្នុងការប្រកាន់ខ្ជាប់នូវគោលការណ៍គ្រឹះនៃអភិបាលកិច្ចសាជីវកម្មក្នុងគណនេយ្យភាព តម្លាភាព យុត្តិធម៌ ការទទួលខុសត្រូវ និងការគ្រប់គ្រងហានិភ័យ។ ក្រុមប្រឹក្សាភិបាលមានតួនាទីយ៉ាងសំខាន់ក្នុងរក្សា និងធានានូវស្តង់ដារខ្ពស់នៃអភិបាលកិច្ចសាជីវកម្ម ដើម្បីសម្រេចបាននូវការគ្រប់គ្រងហានិភ័យ និងការសម្រេចចិត្តប្រកបដោយការទទួលខុសត្រូវ និងមានតម្លាភាព ដែលសម្របសម្រួលដោយក្រុមប្រឹក្សាភិបាល និងគណៈកម្មាធិការក្រុមប្រឹក្សាភិបាលដែលមានសមត្ថភាពខ្លាំង និងមានតុល្យភាព។ រួមជាមួយនឹងគណៈគ្រប់គ្រងដែលខ្លាំងក្នុងការអនុវត្ត រួមទាំងគោលការណ៍ប្រកបដោយការទទួលខុសត្រូវ និងយុទ្ធសាស្ត្រជាក់ស្តែង បានផ្តល់ឱ្យធនាគារ ព្រីនស៍ នូវការបោះជំហានទៅមុខដ៏មុតមាំសម្រាប់ការរីកចម្រើនរបស់ខ្លួន។

ថ្លែងអំពីពានរង្វាន់នេះ លោក ហ៊ន់ សុរចនា អភិបាលគ្រប់គ្រង និងជាប្រធាននាយកប្រតិបត្តិនៃធនាគារ ព្រីនស៍ បានមានប្រសាសន៍ថា “យើងមានកិត្តិយសជាអនេក ដែលបានទទួលពានរង្វាន់ទាំងបីនេះ ដែលជាសក្ខីភាពសបញ្ជាក់ពីការយកចិត្តទុកដាក់របស់យើងចំពោះឧត្តមភាពលើគ្រប់វិស័យនៃអាជីវកម្មរបស់យើង។ ក្រុមការងារគណៈគ្រប់គ្រងរបស់យើងបានធ្វើការដោយមិនគិតពីការនឿយហត់ ដើម្បីសម្រេចបាននូវការអនុវត្តដ៏ល្អបំផុតនៅក្នុងអភិបាលកិច្ចសាជីវកម្មដែលដឹកនាំដោយគណៈកម្មាធិការក្រុមប្រឹក្សាឯករាជ្យ ដើម្បីធានាថា ប្រតិបត្តិការរបស់ធនាគារ ប្រកបដោយការទទួលខុសត្រូវ និងនិរន្តរភាព។ នៅធនាគារ ព្រីនស៍ យើងខិតខំប្រឹងប្រែងរក្សានូវស្តង់ដារខ្ពស់បំផុតនៃអភិបាលកិច្ចសាជីវកម្ម ហើយពានរង្វាន់ទាំងនេះគឺជាការទទួលស្គាល់នូវការខិតខំប្រឹងប្រែងរបស់យើងក្នុងការក្លាយខ្លួនជាគ្រឹះស្ថានហិរញ្ញវត្ថុប្រកបដោយការទទួលខុសត្រូវ និងជាពលរដ្ឋសាជីវកម្មដ៏ល្អមួយ»។

គោលការណ៍អភិបាលកិច្ចសាជីវកម្មដ៏ល្អសម្រាប់ធនាគារ គឺសង្កត់ធ្ងន់លើសារៈសំខាន់នៃយន្តការត្រួតពិនិត្យ និងតុល្យភាពប្រកបដោយប្រសិទ្ធភាព ដើម្បីធានាបាននូវតម្លាភាព និងគណនេយ្យភាព។ ទាំងនេះត្រូវបានឆ្លុះបញ្ចាំងយ៉ាងច្បាស់ល្អនៅក្នុងគណៈកម្មាធិការគោលរបស់ធនាគារ ព្រីនស៍ ដូចជាគណៈកម្មាធិការសវនកម្ម និងគណៈកម្មធិការគ្រប់គ្រងហានិភ័យ ដែលគណៈកម្មាធិការសវនកម្មត្រួតពិនិត្យដំណើរការរបាយការណ៍ហិរញ្ញវត្ថុ និងធានានូវភាពសុក្រិត និងភាពជឿជាក់នៃរបាយការណ៍ហិរញ្ញវត្ថុរបស់ធនាគារ ខណៈដែលគណៈកម្មាធិការគ្រប់គ្រងហានិភ័យគ្រប់គ្រងហានិភ័យផ្សេងៗរបស់ធនាគារ។ គណៈកម្មាធិការទាំងនេះមានតួនាទីជាស្ថាប័នត្រួតពិនិត្យដ៏សំខាន់ ដើម្បីធានាថា ធនាគារ ព្រីនស៍ ធ្វើប្រតិបត្តិការប្របកដោយសុចរិតភាព និងគណនេយ្យភាពបំផុត ដោយផ្តល់នូវប្រព័ន្ធត្រួតពិនិត្យ និងតុល្យភាពដ៏រឹងមាំ ដែលធានាបាននូវការអនុលោមតាមតម្រូវការបទប្បញ្ញត្តិ និងការអនុវត្តល្អបំផុត។ ជាលទ្ធផលនៃការប្តេជ្ញាចិត្តដែលមិនផ្លាស់ប្តូរចំពោះការអនុវត្តដ៏ល្អបំផុត ធនាគារ ព្រីនស៍ ទទួលបានភាពល្បីល្បាញសម្រាប់ការប្តេជ្ញាចិត្តរបស់ខ្លួនចំពោះគោលការណ៍ទាំងនេះ។

លោក Tan Sri Muhammad Bin Ibrahim អតីតទេសាភិបាលធនាគារកណ្តាលនៃប្រទេសម៉ាឡេស៊ី បច្ចុប្បន្នមានតួនាទីជាអភិបាលឯករាជ្យមិនប្រតិបត្ត និងជាប្រធានក្រុមប្រឹក្សាភិបាលហានិភ័យ និងគណៈកម្មាធិការផលិតផលថ្មីនៃធនាគារ ព្រីនស៍ បានគូសបញ្ជាក់ថា “តម្លៃស្នូលរបស់យើង ស្ថិតលើការមានជំនឿថា អភិបាលកិច្ចប្រកបដោយប្រសិទ្ធភាព គឺជាកត្តាសំខាន់បំផុតក្នុងការអភិវឌ្ឍន៍ និងរក្សាស្ថាប័នហិរញ្ញវត្ថុឱ្យមានភាពរឹងមាំ និងឋិតឋេរ។ ដូច្នេះហើយ យើងប្តេជ្ញាធានាថា ប្រតិបត្តិការរបស់យើងទាំងអស់ត្រូវបានគ្រប់គ្រងដោយការអនុវត្តល្អបំផុត ចាប់ពីការអភិវឌ្ឍន៍ផលិតផល រហូតដល់ការគ្រប់គ្រងហានិភ័យ។ ក្រោមគោលការណ៍អភិបាលកិច្ចសាជីវកម្មដ៏ល្អសម្រាប់ធនាគារ ធនាគារ ព្រីនស៍ បានសង្កត់ធ្ងន់យ៉ាងខ្លាំងអំពីតម្លាភាព និងការលាតត្រដាង ដោយយើងយល់ច្បាស់ថាកត្តាទាំងនេះមានសារៈសំខាន់ណាស់ក្នុងការបង្កើតក្របខ័ណ្ឌអភិបាលកិច្ចជាក់ស្តែង។​ យើងនឹងបន្តខិតខំបង្កើន និងរក្សានូវទំនុកចិត្តសម្រាប់ម្ចាស់ភាគហ៊ុនរបស់យើង ខណៈពេលដែលផ្តល់នូវតម្លៃប្រកបដោយនិរន្តរភាពដល់អតិថិជន និងសហគមន៍របស់យើងកាន់តែទូលំទូលាយ។”

ធនាគារ ព្រីនស៍ ទទួលបានពានរង្វាន់ទាំងនេះ​ ស្របពេលដែលធនាគារកំពុងពង្រីកប្រតិបត្តិការ និងពង្រឹងជំហររបស់ខ្លួនជាគ្រឹះស្ថានហិរញ្ញវត្ថុឈានមុខគេនៅកម្ពុជា។ ជាការអបអរសាទរខួបលើកទី8 របស់ខ្លួននៅឆ្នាំនេះ ធនាគារ ព្រីនស៍ បានប្តេជ្ញាផ្តល់ជូនអតិថិជនរបស់ខ្លួននូវដំណោះស្រាយហិរញ្ញវត្ថុប្រកបដោយភាពច្នៃប្រឌិត និងសេវាកម្មលំដាប់ពិភពលោក ព្រមទាំងរួមចំណែកដល់ការអភិវឌ្ឍន៍សេដ្ឋកិច្ចកម្ពុជាផងដែរ។

ស្វែងយល់បន្ថែមអំពីផលិតផល និងសេវាកម្មរបស់ធនាគារ ព្រីនស៍ តាមរយៈគេហទំព័រ www.princebank.com.kh ឬទំនាក់ទំនងទៅកាន់សេវាទំនាក់ទំនងអតិថិជនតាមរយៈលេខ 1800 20 8888 (មិនគិតថ្លៃ) ដើម្បីប្រឹក្សាជាមួយបុគ្គលិកដែលមានវិជ្ជាជីវៈរបស់ធនាគារ ព្រីនស៍។

GenMusix  បានសម្ពោធជាផ្លូវការ នៅថ្ងៃទី ១៩ ខែកញ្ញា ឆ្នាំ ២០២៣ ដែលជាផលិតកម្មថ្មីសន្លាង ដ៏ធំមួយក្នុងប្រទេសកម្ពុជា។ ដែលក្នុងនោះគេសង្កេតឃើញមានវត្តមានតារាចម្រៀងប្រុស-ស្រី ២រូប STEP និង SK ដែលជាសិល្បករ សិល្បការិនី ពោរពេញដោយទេពកោសល្យ និងសមត្ថភាពដ៏ពូកែ ពួកគេនឹងក្លាយជាសមាជិកផ្លូវការរបស់ GenMusix ហើយនឹងនៅមានធនធានសិល្បៈពូកែៗជាច្រើនរូបទៀត ដែលនឹងបង្ហាញខ្លួនជាបន្តបន្ទាប់។

អ្វីដែលទស្សនិកជនទន្ទឹងរង់ចាំ ក្រោយពីបានឃើញផ្ទាំង Poster និងវីដេអូខ្លីៗ លើបណ្ដាញផ្សព្វផ្សាយសង្គមផ្សេងៗនោះ ពេលនេះបានដឹងហើយ គឺការប្រកាសសម្ពោធផលិតកម្មថ្មីសន្លាងឈ្មោះថា “GENMUSIX” មកកាន់វិស័យតន្ត្រីក្នុងប្រទេសកម្ពុជា។

អ្វីដែលកាន់តែគួរឱ្យភ្ញាក់ផ្អើលខ្លាំងសម្រាប់មហាជនគឺ ផលិតកម្មទើបតែប្រសូត្រឡើងនេះ គឺជាបុត្រសម្ព័ន្ធរបស់ក្រុមហ៊ុនតន្ត្រីដ៏ធំលំដាប់លេខ១ ក្នុងប្រទេសកម្ពុជា គឺ «ហង្សមាស» ដែលគេស្គាល់ថា ជាបងធំក្នុងវិស័យតន្ត្រីនៅកម្ពុជា ជាច្រើនទសវត្សរ៍មកហើយ។

ដូចអ្នកគ្រប់គ្នាបានដឹងហើយថា ហង្សមាស ជាក្រុមហ៊ុនតន្ត្រីដ៏ធំបំផុតមួយនៅកម្ពុជា ប្រជុំដោយកំពូលតារាចម្រៀងល្បីៗលំដាប់កំពូលជាច្រើនរូប ឈរជើងយ៉ាងរឹងមាំជាង ២០ឆ្នាំ និងបន្តទទួលបានការគាំទ្រកាន់តែខ្លាំងឡើង តាមរយៈការផលិតបទនូវចម្រៀងដ៏មានគុណភាព ពេញនិយមគ្រប់ស្រទាប់វណ្ណៈ។ ដូច្នេះការបោះទុនបន្ថែម ដើម្បីបង្កើតផលិតកម្មថ្មីសន្លាង “GENMUSIX” ពីសំណាក់បងធំក្នុងវិស័យតន្ត្រីមួយនេះ គេជឿជាក់ថា ប្រាកដជានឹងធ្វើឱ្យវិស័យតន្ត្រីនៅកម្ពុជា កាន់តែរីកចម្រើនខ្លាំងបន្ថែមទៀត តាមរយៈកម្លាំងធនធានមនុស្ស បច្ចេកវិទ្យាទំនើបៗ ព្រមទាំងសមត្ថភាព ទេពកោសល្យដ៏អស្ចារ្យរបស់សិល្បករ-សិល្បការិនី ប្រចាំផលិតកម្មមួយនេះ។

តាមប្រសាសន៍របស់លោកស្រី អ៊ឹង គីមលាង អគ្គនាយិកាក្រុមហ៊ុន GenMusix ឱ្យដឹងថា ការបោះទុន បង្កើតផលិតកម្មថ្មីនេះឡើង គឺដើម្បីផ្ដល់នូវវេទិកាស្ដាប់តន្ត្រីរសជាតិបែបថ្មី ដ៏រស់រវើក ស្របតាមការរីកចម្រើននៃសង្គម ស្របតាមបរិបទថ្មី ជាពិសេសក្នុងសម័យឌីជីថល ការរស់នៅរបស់មនុស្សមានការផ្លាស់ប្ដូរ។ ដូច្នេះតន្ត្រីក៏ត្រូវតែថ្មី តាមបែបផែននៃការនិយមចូលចិត្តរបស់មនុស្ស។ GenMusix មិនត្រឹមតែជាវេទិកាស្ដាប់តន្ត្រី សម្រាប់ក្នុងប្រទេសកម្ពុជាប៉ុណ្ណោះទេ តែនឹងនាំយកនូវតន្ត្រី សិល្បៈ វប្បធម៌ដ៏ល្អផូផង់របស់កម្ពុជា ដើម្បីបង្ហាញទៅកាន់ពិភពលោក៕