DAP Business

ក្រុមសាស្រ្តាចារ្យឈ្មោះ Hatka ទទួលបានជ័យលាភីចំណាត់ថ្នាក់លេខមួយក្នុងកម្មវិធី SmartStart Lecturer Hackathon ដំបូងបំផុតដោយទទួលបានឱកាស ធ្វើដំណើរទស្សនកិច្ចសិក្សា បច្ចេកវិទ្យាទៅប្រទេសសិង្ហបុរី

event

bora.chhouk@gmail.com

-

September 23, 2022

ក្រុមសាស្រ្តាចារ្យឈ្មោះ Hatka ទទួលបានជ័យលាភីចំណាត់ថ្នាក់លេខមួយក្នុងកម្មវិធី SmartStart Lecturer Hackathon ដំបូងបំផុតដោយទទួលបានឱកាស ធ្វើដំណើរទស្សនកិច្ចសិក្សា បច្ចេកវិទ្យាទៅប្រទេសសិង្ហបុរី

ភ្នំពេញ ប្រទេសកម្ពុជា ថ្ងៃទី២៣ ខែកញ្ញា ឆ្នាំ២០២២៖ សាស្ត្រាចារ្យមួយក្រុមមកពីសាកលវិទ្យាល័យចំនួន៣ ផ្សេងគ្នាបានជ័យលាភីចំណាត់ថ្នាក់លេខមួយក្នុងវគ្គផ្តាច់ព្រ័ត្ររបស់កម្មវិធី Lecturer Hackathon ដែលជាកម្មវិធីលើកដំបូងរបស់ SmartStart Unipreneur Learning Platform (SmartStart ULP) ក្នុងការប្រកួតប្រជែងដែលមានបំណងលើកកម្ពស់ជំនាញបង្រៀនសហគ្រិនភាពដល់សាស្ត្រាចារ្យនៅតាមសាកលវិទ្យាល័យនៅកម្ពុជា។

កម្មវិធី Lecturer Hackathon នេះគឺជាព្រឹត្តិការណ៍ដំបូងបំផុតសម្រាប់សាស្រ្តាចារ្យ ដែលកន្លងមកធ្លាប់បានធ្វើជាមួយក្រុមនិស្សិត ដើម្បីលើកកម្ពស់ការយល់ដឹងនិងការប្រាស្រ័យទាក់ទងឱ្យកាន់តែប្រសើរឡើងរវាងសាស្រ្តាចារ្យនិង និស្សិតកម្ពុជា ដើម្បីឱ្យយុវជនជំនាន់ក្រោយត្រៀមខ្លួនសម្រាប់ភាពជាសហគ្រិនឌីជីថល។ ក្រៅពីការលើកកម្ពស់ការយល់ដឹង និងការប្រាស្រ័យទាក់ទងគ្នារវាងសាស្ត្រាចារ្យ និងនិស្សិត កម្មវិធី Lecturer Hackathon ក៏បានលើកទឹកចិត្តឱ្យមានការប្រាស្រ័យទាក់ទង និងការធ្វើការងារជាក្រុមរវាងសាស្រ្តាចារ្យនៃសាកលវិទ្យាល័យនានានៅក្នុងប្រទេសកម្ពុជាផងដែរ ខណៈដែលសាស្ត្រាចារ្យមកពីស្ថាប័នផ្សេងៗគ្នាបានចូលរួមគ្នាជាក្រុមដើម្បីធ្វើការប្រកួតប្រជែងជាមួយក្រុមផ្សេងទៀត។

ក្រោមកិច្ចសហការរវាងក្រុមហ៊ុន Smart Axiata និង Impact Hub Phnom Penh កម្មវិធី SmartStart ULP Hackathon ក៏មានបំណងផ្តល់ឱកាសដល់សាស្ត្រាចារ្យសាកលវិទ្យាល័យឱ្យយល់ដឹងកាន់តែច្បាស់អំពីតម្រូវការផ្នែកសហគ្រិន និងការអប់រំរបស់និស្សិតរបស់ពួកគាត់ ដោយអនុញ្ញាតឱ្យពួកគាត់ស្វែងយល់ពីបទពិសោធន៍របស់សិស្សនៅក្នុងបរិយាកាសកម្មវិធី Lecturer Hackathon ដែលពោរពេញដោយការប្រកួតប្រជែង។

ក្រុមដែលទទួលបានជ័យលាភី មានឈ្មោះថា Hatka ដែលប្រមូលផ្តុំដោយសាស្ត្រាចារ្យមកពីសាកលវិទ្យាល័យ CamTech សាកលវិទ្យាល័យស្វាយរៀង និងសាកលវិទ្យាល័យអង្គរ។ សាស្ត្រាចារ្យទាំងបីនាក់នៅក្នុងក្រុមដែលទទួលបានជ័យជម្នះ បានទទួលនូវរង្វាន់ជាការធ្វើដំណើរទស្សនកិច្ចសិក្សាផ្នែកបច្ចេកវិទ្យានៅប្រទេសសិង្ហបុរី ដែលរាល់ការចំណាយត្រូវបានរ៉ាប់រងទាំងស្រុងដោយក្រុមហ៊ុន Smart Axiata។ ទស្សនកិច្ចសិក្សានេះមានរួមបញ្ចូលទាំងដំណើរទស្សនកិច្ចទៅកាន់ក្រុមហ៊ុន «បច្ចេកវិទ្យាធំៗ» ផងដែរដូចជាក្រុមហ៊ុន Google ។ ក្រុមដែលឈ្នះក៏នឹងធ្វើដំណើរទៅទស្សនាសាកលវិទ្យាល័យជាតិសិង្ហបុរី ដើម្បីស្វែងយល់ពីរបៀបដែលស្ថាប័ននេះគាំទ្រដល់សហគ្រិននៅក្នុងសាកលវិទ្យាល័យនោះផងដែរ។

ភាពច្នៃប្រឌិតដែលនាំឱ្យក្រុម Hatka ទទួលបានជ័យជម្នះនោះគឺជាវេទិកា មានមូលដ្ឋានលើគេហទំព័រ ដែលភ្ជាប់ទំនាក់ទំនងរវាងនិស្សិតសាកលវិទ្យាល័យដែលកំពុងស្វែងរកកន្លែងចុះកម្មសិក្សាជាមួយក្រុមហ៊ុនដែលកំពុងស្វែងរកអ្នកហាត់ការ។

ឯកឧត្តមបណ្ឌិត អ៊ុម រម្យណី រដ្ឋលេខាធិការក្រសួងអប់រំ យុវជន និងកីឡា បានមានប្រសាសន៍ថា៖ «SmartStart គឺជាកិច្ចសហការជាមួយ Impact HUB Phnom Penh ដើម្បីលើកកម្ពស់សកម្មភាព SmartStart ដូចជាកម្មវិធីLecturer Hackathon ជាដើម។ កម្មវិធី Lecturer Hackathon មានគោលបំណងផ្តោតលើសាស្ត្រាចារ្យនិងគ្រូបង្គោលមួយចំនួននៅកម្ពុជា។ តាមរយៈការផ្តល់ឱកាសដល់គ្រូបង្រៀន និងគ្រូបង្គោលនៅប្រទេសយើងដែលបានចូលរួមក្នុងកម្មវិធីនេះ អ្នករៀបចំកម្មវិធីសង្ឃឹមថា សាស្ត្រាចារ្យនឹងយល់កាន់តែច្បាស់អំពីប្រព័ន្ធអេកូឡូស៊ីរបស់សហគ្រិន»។

សាស្ត្រាចារ្យមកពីសាកលវិទ្យាល័យចំនួន៩ ក្នុងរាជធានីភ្នំពេញ ស្វាយរៀង សៀមរាប និងបាត់ដំបង បានចូលរួមក្នុងកម្មវិធី SmartStart ULP Lecturer Hackathon រយៈពេល ៣ថ្ងៃ។ ពួកគាត់រួមគ្នាបង្កើតបានជាក្រុមចំនួន ៦ ដែលមានឈ្មោះថា JEANG, HATKA, ANAKUT, TORSU, BOSDOM និង THNAL LEARNING។

ក្រុមទាំង៦ ដែលចូលរួមក្នុងកម្មវិធី Lecturer Hackathon នេះបានបង្កើតគំនិតច្នៃប្រឌិតថ្មី វាយតម្លៃភាពប្រកួតប្រជែងរបស់ខ្លួន ហើយបានធ្វើតេស្តគំរូដើម (Prototype) ជាមួយការសាកល្បងយុទ្ធសាស្រ្តចូលទីផ្សារ (go-to-market) ចូលរួមធ្វើការងារជាក្រុម និងអនុវត្តការងារជាច្រើនផ្សេងទៀតដែលត្រូវបានបង្កើតឡើងដើម្បីស្វែងយល់ពីនិស្សិតរបស់ខ្លួន និងដើម្បីផ្តល់ឱ្យនិស្សិតទាំងនោះ នូវបទពិសោធផ្ទាល់អំពីសហគ្រិនភាព។

លោក Feiruz Ikhwan នាយកប្រតិបត្តិស្តីទីរបស់ក្រុមហ៊ុន Smart Axiata បានមានប្រសាសន៍ថា៖ «វាគឺជាបេសកកម្មរបស់ក្រុមហ៊ុន Smart Axiata ក្នុងការក្លាយជាអ្នកគាំទ្រខាងផ្នែកឌីជីថល ដើម្បីជួយរាជរដ្ឋាភិបាលកម្ពុជាក្នុងកិច្ចខិតខំប្រឹងប្រែងជំរុញវិស័យបច្ចេកវិទ្យាព័ត៌មានកុំព្យូទ័រតាមប្រព័ន្ធឌីជីថលសំដៅជាប្រយោជន៍ដល់ប្រទេសជាតិ និងសេដ្ឋកិច្ច។ ក្រុមហ៊ុន Smart Axiata នឹងរួមចំណែកបន្ថែមទៀតដល់ការរីកចម្រើនយ៉ាងឆាប់រហ័សរបស់ព្រះរាជាណាចក្រកម្ពុជា តាមរយៈការវិនិយោគលើយុវជនជំនាន់ក្រោយរបស់កម្ពុជា និងអ្នកដែលបង្រៀនពួកគេ។ យើងនៅក្រុមហ៊ុន Smart Axiata មានការស្ញប់ស្ញែងយ៉ាងខ្លាំងទៅនឹងគំនិតច្នៃប្រឌិតរបស់គ្រប់សាកលវិទ្យាល័យទាំងអស់ និងការធ្វើការងារជាក្រុម ដែលយើងបានឃើញក្នុងពេលធ្វើបទបង្ហាញ។ យើងមិនត្រឹមតែអបអសាទរដល់ក្រុម Hatka ដែលទទួលបានជ័យជម្នះប៉ុណ្ណោះទេ ប៉ុន្តែខ្ញុំក៏សូមកោតសរសើរដល់សាកលវិទ្យាល័យ និងក្រុមទាំងអស់ដែលបានរួមគ្នាចូលរួមក្នុងព្រឹត្តិការណ៍ដ៏អស្ចារ្យនេះ»។

ព្រឹត្តិការណ៍វគ្គផ្តាច់ព្រ័ត្រដ៏ធំនេះត្រូវបានប្រារព្ធធ្វើឡើងនៅថ្ងៃពុធ ទី៧ ខែកញ្ញា នៅសណ្ឋាគារ ពូឡូវ៉ៃ រាជធានីភ្នំពេញ។ មានអ្នកចូលរួមប្រហែល ៦០នាក់ រួមទាំងសាស្ត្រាចារ្យ អ្នករៀបចំកម្មវិធី និងមន្ត្រីរាជការបានចូលរួមក្នុងវគ្គផ្តាច់ព្រ័ត្រនេះ។

កញ្ញា Melanie Mosard នាយកប្រតិបត្តិ Impact Hub Phnom Penh បានមានប្រសាសន៍ថា៖ «កម្មវិធី Hackathon គឺជាការបង្ហាញដ៏អស្ចារ្យអំពីទេពកោសល្យក្នុងការបង្រៀន និងការបង្វឹកដែលមាននៅកម្ពុជា។ ដោយសារតែកម្មវិធី peer-to-peer បានធ្វើអោយសាស្ត្រាចារ្យនីមួយៗ អាចលើកបង្ហាញនិងចែករំលែកអំពីរបៀបដែលពួកគាត់អាចអនុវត្តវិធីសាស្រ្តដែលបានប្រើនៅក្នុងកម្មវិធី Hackathon ទោសាកលវិទ្យាល័យ របស់ខ្លួនផ្ទាល់។ ជាចុងក្រោយ យើងសង្ឃឹមថា បទពិសោធជាក់ស្តែងនេះបានបំផុសគំនិតដល់សាស្ត្រាចារ្យជំនាន់ថ្មីដែលនឹងបង្រៀនអំពីសហគ្រិនភាពនៅទូទាំងប្រទេសកម្ពុជានៅក្នុងសាកលវិទ្យាល័យរៀងៗខ្លួនរបស់ពួកគាត់»។

ជាផ្នែកមួយនៃការប្តេជ្ញាចិត្តរបស់ក្រុមហ៊ុន Smart Axiata ចំពោះការអភិវឌ្ឍឌីជីថល និងសហគ្រិនភាពនៅកម្ពុជា ក្នុងខែធ្នូ ឆ្នាំ២០២១ ក្រុមហ៊ុនបានចុះហត្ថលេខាលើអនុស្សរណៈនៃការយោគយល់គ្នា (MoU) មួយជាមួយក្រសួងអប់រំ យុវជន និងកីឡា, ក្រសួងប្រៃសណីយ៍និងទូរគមនាគមន៍, Impact Hub Phnom Penh និងសាកលវិទ្យាល័យកម្ពុជាចំនួន១០ ដើម្បីផ្តល់ជូននូវវគ្គបណ្តុះបណ្តាល SmartStart Unipreneur Learning Platform (SmartStart ULP) ដែលផ្តល់ឱ្យនិស្សិតសាកលវិទ្យាល័យនូវគំនិតសហគ្រិនភាព និងសមត្ថភាពបច្ចេកទេស រួមទាំងការប្រើប្រាស់សំខាន់ៗនូវជំនាញបច្ចេកវិទ្យាដែលពាក់ព័ន្ធទៅនឹងទីផ្សារកម្ពុជា។

កម្មវិធី SmartStart ULP ត្រូវបានកំពុងដាក់អនុវត្តនៅបណ្ឌិត្យសភាបច្ចេកវិទ្យាឌីជីថលកម្ពុជា, សាកលវិទ្យាល័យពុទ្ធិសាស្ត្រ, សាកលវិទ្យាល័យជាតិគ្រប់គ្រង, សាកលវិទ្យាល័យភូមិន្ទនីតិសាស្រ្តនិងវិទ្យាសាស្ត្រសេដ្ឋកិច្ច, សាកលវិទ្យាល័យបៀលប្រាយភ្នំពេញ និងសៀមរាប, សាកលវិទ្យាល័យភូមិន្ទកសិកម្ម, សាកលវិទ្យាល័យបញ្ញាសាស្រ្តកម្ពុជាបាត់ដំបង, សាកលវិទ្យាល័យអង្គរ, សាកលវិទ្យាល័យស្វាយរៀង និងសាកលវិទ្យាល័យបច្ចេកវិទ្យានិងវិទ្យាសាស្ត្រកម្ពុជា (CamTech)។

សម្រាប់ព័ត៌មានបន្ថែម និងព័ត៌មានថ្មីៗអំពីវគ្គសិស្សា SmartStart Unipreneur Learning Platform សូមតាមដានទំព័រFacebook របស់ Smart for Cambodia នៅ http://facebook.com/smartforcambodia ឫចូលទៅកាន់ http://www.smartstart.com.kh/ ៕

ការណែនាំវិធីសាស្ដ្រផ្សេងៗក្នុងការបង្កើត និងភ្ជាប់ជាមួយ TikTok Now

សេដ្ឋកិច្ច

bora.chhouk@gmail.com

-

September 23, 2022

0

ការណែនាំវិធីសាស្ដ្រផ្សេងៗក្នុងការបង្កើត និងភ្ជាប់ជាមួយ TikTok Now

រៀងរាល់ថ្ងៃ ក្រុមអ្នកផលិតមាតិកានៅលើ TikTok កំពុងកំណត់ជាថ្មីចំពោះនិយមន័យនៃការទទួលបាននូវការកម្សាន្ដ ចាប់ពីចម្រៀងល្បីៗសម្រាប់រដូវក្ដៅ It’s Corn រហូតដល់តុក្កតាក្រាហ្វិករាំ ដូចជា Horace។ TikTok ជាវេទិកាដែលមានការបង្កើតមាតិកាដ៏ទាក់ទាញ ក៏ដូចជាស្វែងរកសហគមន៍ថ្មីៗ និងគួររំភើបរីករាយ។ មានវិធីសាស្ដ្រជាច្រើនក្នុងការបង្កើតមាតិកានៅលើ TikTok ចាប់ពីការបន្ថែមក្រាហ្វិកពន្លឺ សំឡេង និងការឌីហ្សាញផ្សេងៗ វីដេអូ ចម្រៀងសម្រាប់មនុស្សពីរនាក់ និងការប្រើប្រាស់ដោយចាប់ផ្ដើមពីវីដេអូឃ្លីបអ្នកដទៃ រួចបញ្ចប់ជាមួយវីដេអូរបស់ខ្លួនឯង (stitch) រហូតដល់ការផលិតវីដេអូវែងៗ ឬផ្សាយផ្ទាល់ ហើយពេលនេះ TikTok កំពុងតែពង្រីកឧបករណ៍ផលិតផ្សេងៗទៀត ខណៈពេល ប្លេតហ្វមនេះបន្ដជំរុញការផ្សារភ្ជាប់ទំនាក់ទំនងដ៏ប្រាកដនិយម និងដោយឯកឯងនៅលើ TikTok។

ផ្ដល់ការកម្សាន្ដ និងចែករំលែកភាពរីករាយជាមួយមនុស្សសំខាន់បំផុត

ពេលនេះ TikTok Now គឺជាមធ្យោបាយថ្មីបំផុតក្នុងការទទួលបាននូវកម្មវិធីកម្សាន្ដ និងផ្សារភ្ជាប់ទំនាក់ទំនងជាមួយគ្នាទៅវិញទៅមកនៅលើ TikTok នូវបទពិសោធរូបភាព និងវីដេអូប្រចាំថ្ងៃដើម្បីចែករំលែកនូវភាពសប្បាយរីករាយដ៏ពិតប្រាកដជាមួយមនុស្សដ៏សំខាន់បំផុត។ TikTok Now ប្រែក្លាយភាពពិតប្រាកដនៃ TikTok ទៅជាបទពិសោធច្នៃប្រឌិតថ្មីទាំងស្រុង ដែលផ្សារភ្ជាប់សហគមន៍ និងបន្ដជំរុញវប្បធម៌ទៅមុខជានិច្ច។

ការបង្កើតទំនាក់ទំនងកាន់តែស៊ីជម្រៅ និងការកម្សាន្តដ៏រីករាយក្នុងទម្រង់ងាយស្រួលប្រើ TikTok Now សូមអញ្ជើញលោកអ្នក និងមិត្តភក្តិរបស់លោកអ្នករំលេចនូវអ្វីដែលលោកអ្នកកំពុងធ្វើក្នុងពេលបច្ចុប្បន្នដោយប្រើកាមេរ៉ាខាងមុខ និងខាងក្រោយរបស់លោកអ្នក។ លោកអ្នកនឹងទទួលបានសារដាស់តឿនប្រចាំថ្ងៃដើម្បីថតវីដេអូរយៈពេល ១០ វិនាទី ឬរូបថតសន្លឹក ដើម្បីចែករំលែកនូវអ្វីដែលអ្នកកំពុងធ្វើបានយ៉ាងងាយស្រួល និងរហ័ស។

TikTok កំពុងតែដាក់ដំណើរការពិសោធជាមួយ TikTok Now រយៈពេលប៉ុន្មានសប្ដាហ៍ទៀត។ នៅក្នុង កម្ពុជា TikTok Now អាចចូលទៅប្រើប្រាស់តាមរយៈ កម្មវិធីទូរស័ព្ទទាំង TikTok និង TikTok Now ។ នៅតាមតំបន់ផ្សេងៗទៀត TikTok Now អាចត្រូវបានដាក់ឱ្យដំណើរក្នុងកម្មវិធីទូរស័ព្ទ TikTok ដោយដោនឡូតកម្មវិធី TikTok Now ថ្មី ឬអាចប្រើបានទម្រង់ទាំងពីរ។ TikTok នឹងបន្ដពង្រីកវិសាលភាពបទពិសោធអ្នកប្រើប្រាស់ ខណៈប្លេតហ្វមសិក្សាបន្ថែមអំពីវិធីបញ្ចូលទម្រង់បែបច្នៃប្រឌិតថ្មីទៅក្នុងសហគមន៍ TikTok។

ផ្តល់អំណាចឱ្យលោកអ្នកបន្តគ្រប់គ្រងបទពិសោធ TikTok របស់ខ្លួន

TikTok បានបង្កើតកម្មវិធី TikTok Now ដោយគិតគូរពីសុវត្ថិភាព និងឯកជនភាពរបស់សហគមន៍យើង។ អ្នកបង្កើតមាតិកាមានសិទ្ធិគ្រប់គ្រងថា តើអ្នកណាអាចចូលមើល និងចូលរួមជាមួយមាតិការបស់ពួកគេបាន។ ពួកគេអាចប្លុកអ្នកផ្សេងទៀត និងជ្រើសរើសថា តើមតិណាគួរត្រូវបានបង្ហាញនៅលើមាតិការបស់ខ្លួន។ បើនរណាម្នាក់ត្រូវបានមើលឃើញថាមានអាកប្បកិរិយាមិនសមទំនង ដែលពួកគេជឿថាអាចបំពាននូវគោលការណ៍ណែនាំសហគមន៍របស់ TikTok ពួកគេអាចរាយការណ៍ឱ្យមានការត្រួតពិនិត្យ។

TikTok បានយកចិត្ដទុកដាក់ចំពោះបញ្ហាសុវត្ថិភាពសហគមន៍របស់យើង និងបន្ដបោះជំហានទៅមុខក្នុងការជួយគាំទ្រដល់សុវត្ថិភាព និងសុខុមាលភាពយុវវ័យជាពិសេស។

បើបុគ្គលអាយុក្រោម ១៦ឆ្នាំ បង្កើតគណនីប្រើប្រាស់កម្មវិធី TikTok Now ដូចទៅនឹង TikTok គណនីរបស់ពួកគេ នឹងត្រូវបានកំណត់ដោយស្វ័យប្រវត្ដិជាប្រភេទគណនីមានមហានិភ័យក្នុងការទទួលបានទិន្នន័យមិនសមរម្យ ឬ (private by default)
បុគ្គលអាយុក្រោម ១៨ឆ្នាំ នឹងមិនអាចចែករំលែកមាតិការបស់ខ្លួនទៅកាន់ Explore ហ្វីដបានឡើយ
បុគ្គលអាយុចន្លោះពី ១៣ ទៅ ១៥ឆ្នាំ នឹងត្រូវបានកំណត់ចំពោះជម្រើសបញ្ចេញមតិទៅកាន់ Friend only ដើម្បីជួយទប់ស្កាត់ការប្រាស្រ័យទាក់ទងដែលមិនត្រូវការ។

អ្នកមានអាយុចាប់ពី ១៨ឆ្នាំឡើង អាចកំណត់ (settings) ចំពោះការចែករំលែកបន្ថែម។ លើសពីការចែករំលែកជាមួយមិត្ដភក្ដិពេញវ័យ ពួកគេអាចជ្រើសរើសចែករំលែកការបង្ហោះរបស់ខ្លួនជាមួយសហគមន៍ TikTok Now ដ៏កាន់តែទូលំទូលាយ អាស្រ័យលើការកំណត់ឯកជនភាព ដែលពួកគេ បានជ្រើសរើស។

ការកំណត់ស្រាប់ៗជាស្វ័យប្រវត្ដិ គឺ «Friends can view»។ ដើម្បីផ្លាស់ប្តូរការកំណត់ឯកជនភាពរបស់លោកអ្នកសម្រាប់ TikTok Now* សូមអនុវត្ដដូចខាងក្រោម៖

នៅលើអេក្រង់ Post កំណត់យកមិត្តភក្ដិអាចមើលបាន (Friends can view) ។
ជ្រើសរើសអ្នកដែលលោកអ្នកចង់អនុញ្ញាតឱ្យមើលការបង្ហោះ TikTok Now របស់អ្នក។
មិត្តភក្តិអាចមើលបាន (Friends can view) ៖ នរណាដែលចុចតាមដានអ្នក ហើយអ្នកចុចតាមដានពួកគេត្រឡប់មកវិញ អាចទស្សនា TikTok Now របស់អ្នក។
អ្នកគ្រប់គ្នា (Everyone)៖ អ្នកនៅក្នុងតំបន់របស់លោកអ្នកអាចមើលការបង្ហោះ TikTok Now របស់អ្នក។ សូមចងចាំថា មនុស្សដែលមិនតាមដានអ្នក ឬអ្នកមិនតាមដានត្រឡប់មកពួកគេវិញ មិនអាចបញ្ចេញមតិ ឬទាក់ទងជាមួយការបង្ហោះ TikTok Now របស់លោកអ្នកបានទេ។

TikTok តែងតែបន្ដបង្កើតវិធីសាស្ដ្រដ៏ស័ក្ដិសមសម្រាប់សហគមន៍កម្ពុជារបស់យើងក្នុងការបង្កើតទំនាក់ទំនងដ៏ពិតប្រាកដ នៅពេលដែលពួកគេបន្តការកម្សាន្តនៅលើ TikTok។ TikTok Now នឹងដាក់ឱ្យប្រើប្រាស់សម្រាប់មនុស្សទូទាំងពិភពលោកក្នុងរយៈពេលប៉ុន្មានសប្តាហ៍ខាងមុខនេះ។ យើងរីករាយក្នុងការស្វែងយល់ពីសហគមន៍របស់យើង ហើយបន្តកែលម្អបង្កើន និងពង្រីកលើបទពិសោធ TikTok។

ចូរស្វែងរក TikTok និងចូលរួមសហគមន៍របស់យើងដោយគ្រាន់តែទាញយកកម្មវិធីដោយឥតគិតថ្លៃតាមរយៈ Apple App Store, Google Play ឬ Amazon។

រោងចក្រថាមពលកម្តៅ ជីវម៉ាស របស់ក្រុមហ៊ុន ហ៊ិននីគែន ខេមបូឌា បើកដំណើរការជាផ្លូវការនៅកម្ពុជា ក្រោមកិច្ចសហការជាមួយក្រុមហ៊ុន BECIS ដើម្បីសម្រេចបានថាមពលកម្តៅកកើតឡើងវិញ ១០០%

event

bora.chhouk@gmail.com

-

September 23, 2022

0

រោងចក្រថាមពលកម្តៅ ជីវម៉ាស របស់ក្រុមហ៊ុន ហ៊ិននីគែន ខេមបូឌា បើកដំណើរការជាផ្លូវការនៅកម្ពុជា ក្រោមកិច្ចសហការជាមួយក្រុមហ៊ុន BECIS ដើម្បីសម្រេចបានថាមពលកម្តៅកកើតឡើងវិញ ១០០%

ភ្នំពេញ ថ្ងៃទី២២ ខែកញ្ញា ឆ្នាំ២០២២៖ ក្រុមហ៊ុន ហ៊ិននីគែន ខេមបូឌា និងក្រុមហ៊ុន Berkeley Energy Commercial Industrial Solutions (BECIS) នៅថ្ងៃទី២២ ខែកញ្ញានេះ បានបើកសម្ពោធជាផ្លូវការនូវរោងចក្រថាមពលកម្តៅជីវម៉ាសធំដំបូងគេបង្អស់នៅកម្ពុជាក្រោមអធិបតីភាពដ៏ខ្ពង់ខ្ពស់របស់រដ្ឋមន្ត្រីក្រសួងបរិស្ថាន ថ្នាក់ដឹកនាំក្រុមហ៊ុន HEINEKEN Group ដៃគូអាជីវកម្ម សមាគមពាណិជ្ជកម្ម និងប្រព័ន្ធផ្សព្វផ្សាយ។

ការបើកសម្ពោធរោងចក្រថាមពលកម្ដៅជីវម៉ាសដែលមានទីតាំងនៅទល់មុខរោងចក្រស្រាបៀររបស់ក្រុមហ៊ុន ហ៊ិននីគែន ខេមបូឌា ក្នុងខណ្ឌច្បារអំពៅ រាជធានីភ្នំពេញ គឺជាព្រឹត្តិការណ៍ដ៏សំខាន់មួយសម្រាប់ក្រុមហ៊ុនក្នុងការលើកកម្ពស់ពាក្យស្លោក “ធ្វើឱ្យប្រទេសកម្ពុជាកាន់តែប្រសើរ” របស់ខ្លួន ពោលគឺជាការប្តេជ្ញាចិត្តឆ្ពោះទៅរកពិភពលោកដែលបំភាយឧស្ម័នកាបូនត្រឹមកម្រិតសូន្យ កាន់តែមានសមភាព និងភពផែនដីដែលកាន់តែប្រសើរឡើង។

រោងចក្រថាមពលកម្តៅជីវម៉ាសដែលមានតម្លៃ ៥,៨លានដុល្លារអាមេរិកនេះនឹងប្រើប្រាស់អង្កាមដែលនាំយកមកពីខេត្តព្រៃវែងដើម្បីដុតបង្កើតជាចំហាយដែលនឹងផ្គត់ផ្គង់ថាមពលកម្តៅកកើតឡើងវិញ ១០០% សម្រាប់ផ្គត់ផ្គង់ដល់រោងចក្រផលិតស្រាបៀររបស់ក្រុមហ៊ុន ហ៊ិននីគែន ខេមបូឌា។ តាមរយៈការផ្លាស់ប្តូរទៅប្រើប្រាស់ថាមពលកម្តៅជីវម៉ាស ក្រុមហ៊ុន ហ៊ិននីគែន ខេមបូឌា រំពឹងថានឹងកាត់បន្ថយការបំភាយឧស្ម័នកាបូន (ឧស្ម័នកាបូនិច) ដល់ទៅ ៦០% នៅក្នុងផលិតកម្មរបស់ខ្លួន។

ពិធីសម្ពោធជាផ្លូវការនេះធ្វើឡើងក្រោមអធិបតីភាពដ៏ខ្ពង់ខ្ពស់របស់ឯកឧត្តម សាយ សំអាល់ រដ្ឋមន្ត្រីក្រសួងបរិស្ថានកម្ពុជា លោក Dolf van den Brink ប្រធានក្រុមប្រឹក្សាប្រតិបត្តិ និងជាអគ្គនាយកក្រុមហ៊ុន HEINEKEN Group លោក Michel de Carvalho នាយកប្រតិបត្តិក្រុមហ៊ុន Heineken Holding NV លោកស្រី Charlene L. de Carvalho-Heineken នាយកប្រតិបត្តិក្រុមហ៊ុន Heineken Holding NV លោក Jacco vander Linden ប្រធានទទួលបន្ទុកតំបន់អាស៊ីប៉ាស៊ីហ្វិកនៃក្រុមហ៊ុន HEINEKEN Group លោក Samson Wong នាយកគ្រប់គ្រងក្រុមហ៊ុន ហ៊ិននីគែន ខេមបូឌា និងលោក Eren Ergin អគ្គនាយកក្រុមហ៊ុន BECIS។

លោក សាយ សំអាល់ រដ្ឋមន្ត្រីក្រសួងបរិស្ថានបានមានប្រសាសន៍ថា៖ «យើងត្រូវទទួលស្គាល់ការពិតមិនអាចប្រកែកបានថា សន្តិភាពនិងស្ថិរភាពនៅទូទាំងប្រទេសដែលបានវិវឌ្ឍចេញពីមនសិការ ឯកភាពជាតិ និងសមាហរណកម្មក្រោមគោលនយោបាយឈ្នះ-ឈ្នះ គឺជាកាតាលីករសម្រាប់កំណើនសេដ្ឋកិច្ច ការអភិវឌ្ឍប្រទេស និងការលើកកម្ពស់កម្រិតជីវភាពរស់នៅរបស់ប្រជាជន។ ជាមួយនឹងការប្រឹងប្រែងដែលលើកឡើងខាងលើ ប្រទេសកម្ពុជាបានរីកចម្រើនពីប្រទេសមានប្រាក់ចំណូលទាបទៅជាប្រទេសមានចំណូលមធ្យមកម្រិតទាប ហើយមានគោលដៅក្លាយជាប្រទេសមានចំប្រាក់ណូលខ្ពស់នៅឆ្នាំ២០៥០។ ដោយផ្អែកលើមូលដ្ឋានគ្រឹះដ៏មានតម្លៃនេះ កម្ពុជាអាចឈានទៅមុខមួយជំហានបន្ថែមទៀតក្នុងការពិចារណា និងដោះស្រាយបញ្ហាប្រឈមនានាដែលកើតចេញពីបញ្ហាបរិស្ថាន និងការប្រែប្រួលអាកាសធាតុ។ ថ្ងៃនេះ យើងបង្កើតឱកាសដ៏សំខាន់មួយសម្រាប់កម្ពុជាជាមួយនឹងការបើកដំណើរការរោងចក្រថាមពលជីវម៉ាសដែលទន្ទឹងរង់ចាំជាយូរមកហើយថានឹងផ្តល់ផ្លែផ្កាដល់ប្រទេសជាតិ។ យើងសូមថ្លែងអំណរគុណដល់ក្រុមហ៊ុន ហ៊ិននីគែន សម្រាប់ការបន្តជំរុញការប្តេជ្ញាចិត្តផ្នែកនិរន្តរភាពរបស់ខ្លួនក្នុងនាមជាក្រុមហ៊ុនផលិតស្រាបៀរអន្តរជាតិដ៏ធំមួយ ជាក្រុមហ៊ុនដែលមានការទទួលខុសត្រូវចំពោះសង្គម និងជាអ្នកចូលរួមចំណែកយ៉ាងសំខាន់ក្នុងការអភិវឌ្ឍរបស់ប្រទេសកម្ពុជា។ ការវិនិយោគរបស់ក្រុមហ៊ុន ហ៊ិននីគែន គឺជាផ្តល់ទំនុកចិត្តនិងភាពជឿជាក់មកលើកម្ពុជា និងការប្តេជ្ញាចិត្តក្នុងការវិនិយោគបន្ថែមទៀតក្នុងប្រទេសកម្ពុជា។ សូមរួមគ្នាបន្តដំណើរទៅមុខទៀតដើម្បីជំរុញអនាគតដ៏រីកចម្រើន ប្រកបដោយបរិយាបន្នផ្នែកសង្គម និងប្រកបដោយនិរន្តរភាពផ្នែកបរិស្ថានសម្រាប់យើងទាំងអស់គ្នា»។

លោក Dolf van den Brink ប្រធានក្រុមប្រឹក្សាប្រតិបត្តិ និងជាអគ្គនាយកក្រុមហ៊ុន HEINEKEN Group មានប្រសាសន៍ថា៖ «សម្រាប់រយៈពេលជាង ១៥៨ឆ្នាំមកនេះ និរន្តរភាពនិងការទទួលខុសត្រូវគឺជាផ្នែកមួយនៃ DNA របស់ក្រុមហ៊ុន ហ៊ិននីគែន។ យើងជាអ្នកផលិតនិងជាអ្នកធ្វើ ហើយយើងដឹងថា សកម្មភាពរបស់យើងបង្ហាញឱ្យឃើញច្បាស់ជាងពាក្យសម្ដី។ ខ្ញុំមានមោទនភាពចំពោះក្រុមការងាររបស់ក្រុមហ៊ុន ហ៊ិននីគែន ខេមបូឌា សម្រាប់ប្រតិបត្តិការរោងចក្រថាមពលកម្តៅជីវម៉ាសទ្រង់ទ្រាយធំនេះ ដើម្បីកាត់បន្ថយការបំភាយកាបូនរបស់យើង និងនាំ យើងឱ្យដើរឆ្ពោះទៅមុខមួយជំហានទៀតលើដំណើរផ្លូវរបស់យើងឆ្ពោះទៅរកការសម្រេចបាននូវការបំភាយកាបូនត្រឹមកម្រិតសូន្យ»។

ក្រៅពីការបង្កើតការងារថ្មីនៅរោចក្រផ្ទាល់ រោងចក្រថាមពលកម្តៅជីវម៉ាសនេះក៏នឹងផ្តល់អត្ថប្រយោជន៍ដល់អ្នកដែលធ្វើការងារពាក់ព័ន្ធនឹងសង្វាក់ផលិតកម្មស្រូវផងដែរដូចជារោងម៉ាស៊ីនកិនស្រូវ និងកសិករជាដើម។ ការប្រើប្រាស់អង្កាមធ្វើជាប្រភពថាមពលកម្តៅនេះបានប្រែក្លាយកាកសំណល់កសិកម្មនិងសរីរាង្គដែលត្រូវបានបោះចោល ទៅជាប្រភពចំណូលបន្ថែមសម្រាប់សហគមន៍មូលដ្ឋាន។

លោក Samson Wong នាយកគ្រប់គ្រងក្រុមហ៊ុន ហ៊ិននីគែន ខេមបូឌា បានថ្លែងថា៖ «យើងមានឫសគល់ដ៏រឹងមាំនៅក្នុងប្រទេសកម្ពុជា ហើយក្នុងរយៈពេលប៉ុន្មានឆ្នាំមកនេះ យើងបានបណ្តាក់ទុនរាប់រយលានដុល្លារនៅក្នុងក្រុមហ៊ុនផលិតស្រាបៀរក្នុងស្រុករបស់យើង ដែលផ្តល់ការងារដល់បុគ្គលិករាប់រយនាក់ និងផ្តល់ការងារប្រយោលនៅទូទាំងខ្សែសង្វាក់ផលិតកម្មរាប់ចាប់ពីការងារផលិតវត្ថុធាតុដើមរហូតដល់ការងារនៅតាមហាងទំនិញ។ ជាមួយនឹងការចាប់ផ្តើមដំណើរការរោងចក្រថាមពលកម្តៅជីវម៉ាសនេះ យើងសង្ឃឹមថានឹងបង្កើតឱ្យមានផលវិជ្ជមានបន្ថែមទៀត នៅក្នុងសហគមន៍ដែលយើងធ្វើការងារជាមួយ។ មហិច្ឆតា “ធ្វើឱ្យប្រទេសកម្ពុជាកាន់តែប្រសើរ” របស់យើងបានបង្កប់យ៉ាងជ្រៅនៅក្នុងអាជីវកម្មរបស់យើងអស់រយៈពេលជាច្រើនឆ្នាំមកហើយ ហើយការបើកដំណើរការរោងចក្រថាមពលថ្មីនេះបង្ហាញឱ្យឃើញថា មហិច្ឆតានេះនឹងដឹកនាំយើងឱ្យដើរឆ្ពោះទៅមុខសម្រាប់មនុស្សជាច្រើនជំនាន់ទៅមុខទៀត»។

ការសាងសង់រោងចក្រថាមពលកម្តៅជីវម៉ាសនេះត្រូវបានបញ្ចប់ក្រោមការសហការជាមួយក្រុមហ៊ុន BECIS ដែលជាក្រុមហ៊ុនផ្តល់សេវាថាមពល (EaaS) ឈានមុខគេដែលមានទីស្នាក់ការកណ្តាលនៅប្រទេសសិង្ហបុរី។ កិច្ចសហការនេះធ្វើឡើងក្នុងរូបភាពជាកិច្ចព្រមព្រៀងទិញថាមពលក្នុងរយៈពេលវែង (PPA)។

លោក Eren Ergin អគ្គនាយកក្រុមហ៊ុន BECIS មានប្រសាសន៍ថា៖ «វាជាកិត្តិយសណាស់ក្នុងការចាប់ដៃគូជាមួយក្រុមហ៊ុន ហ៊ិននីគែន ខេមបូឌា ដើម្បីនាំយកគម្រោងដ៏សំខាន់នេះមកកាន់ប្រទេសកម្ពុជា។ ការផ្លាស់ប្តូរឆ្ពោះ ទៅកាន់ការប្រើប្រាស់ថាមពលដែលមាននិរន្តរភាព នឹងជះឥទ្ធិពលយ៉ាងខ្លាំងលើការដោះស្រាយវិបត្តិអាកាសធាតុ និងកែប្រែរបៀបដែលយើងធ្វើអាជីវកម្មនិងផ្តល់ជូនអតិថិជន។ យើងជឿថា ការបង្កើតតម្លៃនិងការអភិវឌ្ឍប្រកបដោយនិរន្តរភាព គឺជាគោលដៅបំពេញបន្ថែមដែលពឹងផ្អែកគ្នាទៅវិញទៅមកយ៉ាងខ្លាំង»។

ធ្វើឱ្យពិភពលោកកាន់តែប្រសើរ, ធ្វើឱ្យប្រទេសកម្ពុជាកាន់តែប្រសើរ

នៅឆ្នាំ២០២១ ក្រុមហ៊ុន HEINEKEN Group បានបង្ហាញគោលបំណងថ្មីៗជាលក្ខណៈអន្តរជាតិ និងសម្រាប់ប្រទេសកម្ពុជា ដើម្បីឈានទៅដល់ការបំភាយឧស្ម័នសូន្យនៅក្នុងផលិតកម្មរបស់ខ្លួននៅឆ្នាំ២០៣០ និងនៅទូទាំងខ្សែសង្វាក់ផលិតកម្មទាំងមូលនៅឆ្នាំ២០៤០។ ក្រុមហ៊ុនកំពុងប្រកាន់យកវិធីសាស្រ្តផ្អែកលើវិទ្យាសាស្ត្រ ដោយធ្វើការងារយ៉ាងជិតស្និទ្ធជាមួយ Science Based Targets initiative (SBTi) ដើម្បីធ្វើឱ្យការប្តេជ្ញាចិត្តរបស់ក្រុមហ៊ុនមានភាពស្របតាមស្តង់ដាសកល ហើយក្រុមហ៊ុនផ្តោតលើសកម្មភាពជាក់ស្តែងដោយធ្វើការងារយ៉ាងជិតស្និទ្ធជាមួយអតិថិជន អ្នកប្រើប្រាស់ និងអ្នកផ្គត់ផ្គង់ ដើម្បីជម្រុញសេដ្ឋកិច្ចវិលជុំ។

មុននឹងបង្កើតរោងចក្រថាមពលកម្តៅជីវម៉ាសនេះ ក្រុមហ៊ុន ហ៊ិននីគែន ខេមបូឌា បានវិនិយោគរួចហើយលើរោងចក្រប្រព្រឹត្តិកម្មសំណល់រាវដ៏ធំដំបូងគេបង្អស់នៅកម្ពុជានៅរោងចក្រផលិតស្រាបៀររបស់ក្រុមហ៊ុននៅរាជធានីភ្នំពេញ។ ជីវឧស្ម័នដែលបញ្ចេញដោយរោងចក្រប្រព្រឹត្តិកម្មសំណល់រាវនេះក៏ត្រូវបានប្រើប្រាស់ជាថាមពលកម្តៅក្នុងប្រតិបត្តិការផលិតស្រាបៀររបស់ក្រុមហ៊ុនផងដែរ ក្នុងទម្រង់ជាថាមពលកកើតឡើងវិញ។ ចាប់ពីថ្ងៃនេះតទៅ ថាមពលកម្តៅដែលអាចកកើតឡើងវិញបាន ១០០% របស់ក្រុមហ៊ុន នឹងត្រូវបានផ្គត់ផ្គង់ដោយជីវឧស្ម័ន និងជីវម៉ាស។

ក្រុមហ៊ុន ហ៊ិននីគែន ខេមបូឌា ត្រូវបានទទួលស្គាល់លើការប្តេជ្ញាចិត្តរបស់ខ្លួនខាងផ្នែកបរិស្ថានតាមរយៈការឈ្នះពានរង្វាន់ EuroCham CSR Environmental Award និងការឧបត្ថម្ភដល់កិច្ចប្រជុំកំពូលស្តីពីការប្រែប្រួលអាកាសធាតុនៅកម្ពុជាលើកដំបូងក្នុងឆ្នាំ២០២១។

និរន្តរភាពផ្នែកបរិស្ថាន និងសង្គម រួមជាមួយនឹងការលើកកម្ពស់ការពិសាគ្រឿងស្រវឹងដោយការទទួលខុសត្រូវ បង្កើតបានជាសសរស្តម្ភទាំងបី ដែលបង្កើតបានជាមហិច្ឆតា “ធ្វើឱ្យប្រទេសកម្ពុជាកាន់តែប្រសើរ” រយៈពេលវែងរបស់ក្រុមហ៊ុន៕

អំពីក្រុមហ៊ុន HEINEKEN

ក្រុមហ៊ុន ហ៊ិននីគែន ខេមបូឌា ជាក្រុមហ៊ុនផលិតស្រាបៀរឈានមុខគេមួយនៅកម្ពុជា ដែលបង្កើតឡើងក្នុងឆ្នាំ១៩៩៤។ ជំរុញដោយគោលបំណងបង្កើតភាពសប្បាយរីករាយរួមគ្នា ក្រុមហ៊ុនបង្កើតបទពិសោធដ៏អស្ចារ្យសម្រាប់អ្នកពិសារ និងអតិថិជន ដែលត្រូវការស្រាបៀរម៉ាកយីហោអន្តរជាតិគុណភាពខ្ពស់ដូចជាស្រាបៀរ Heineken© ស្រាបៀរ Tiger ស្រាបៀរ ABC ស្រាបៀរ Anchor និងស្រាបៀរ Gold Crown។ ជាមួយនឹងការគ្របដណ្តប់នៅទូទាំងប្រទេស និងដោយមានរោងចក្របច្ចេកវិទ្យាទំនើបស្ថិតនៅរាជធានីភ្នំពេញ ក្រុមហ៊ុនមានបុគ្គលិក ៧០០នាក់ និងផ្ដល់ការងារដោយប្រយោលជូនប្រជាជនកម្ពុជាចំនួន ១២០,០០០នាក់នៅទូទាំងចង្វាក់ផលិតកម្មរបស់ខ្លួន។ ប្តេជ្ញាចំពោះការអភិវឌ្ឍប្រកបដោយនិរន្តរភាពរបស់កម្ពុជា ក្រុមហ៊ុន ហ៊ិននីគែន ខេមបូឌា មានបំណង “ធ្វើឱ្យប្រទេសកម្ពុជាកាន់តែប្រសើរ” ជាមួយនឹងការផ្តោតលើបរិស្ថាន និរន្តរភាពសង្គម និងការពិសារដោយការទទួលខុសត្រូវដែលស្ថិតនៅលើមាគ៌ាឆ្ពោះទៅកាន់ពិភពលោកដែលមានកាបូនសូន្យ កាន់តែស្មើភាព និងកាន់តែមានសុខភាពល្អ។ ក្រុមហ៊ុន ហ៊ិននីគែន ខេមបូឌា គឺជាផ្នែកមួយនៃក្រុមហ៊ុន HEINEKEN Company ដែលជាក្រុមហ៊ុនផលិតស្រាបៀរលំដាប់ថ្នាក់ពិភពលោក៕

អំពីក្រុមហ៊ុន BECIS

មានមូលដ្ឋាននៅប្រទេសសិង្ហបុរី និងមានក្រុមហ៊ុនបុត្រសម្ព័ន្ធមួយនៅកម្ពុជា ក្រុមហ៊ុន BECIS មានផលបត្រវិនិយោគដ៏ច្រើននៅទូទាំងតំបន់អាស៊ី។ ជាក្រុមហ៊ុនផ្គត់ផ្គង់សេវាថាពមល (EaaS) ឈានមុខគេមួយ ក្រុមហ៊ុន BECIS ជឿជាក់ថា ការកាត់បន្ថយការបញ្ចេញឧស្ម័នកាបូន វិមជ្ឈការនីយកម្ម និងឌីជីថលូបនីយកម្មនៃថាមពល គឺជាគន្លឹះក្នុងការបើកឱកាសឱ្យក្រុមហ៊ុននានាសម្រេចគោលដៅប្រតិបត្ដិការប្រកបដោយចីរភាព។

ការផ្គត់ផ្គង់សេវាថាពមល (EaaS)៖ ជាមួយគំរូអាជីវកម្ម EaaS ក្រុមហ៊ុន BECIS អភិវឌ្ឍ សាងសង់ ប្រតិបត្តិការ និងកាន់កាប់ដំណោះស្រាយចែកចាយថាមពល។ គំរូអាជីវកម្មនេះកាត់បន្ថយហានិភ័យ និងភាពស្មុគស្មាញសម្រាប់អតិថិជន ខណៈសម្រេចគោលដៅសំខាន់ៗពាក់ព័ន្ធនឹងនិរន្តរភាព បង្កើនប្រសិទ្ធភាពចំណាយ និងលទ្ធភាពស្ទុះងើបនៃហេដ្ឋរចនាសម្ព័ន្ធថាមពល ដែលទាំងអស់នេះមិនត្រូវការការវិនិយោគមូលធនឡើយ៕

ផ្សារទំនើប ខេ ម៉ល ព្រែកត្នោត- ទីតាំងផ្សារទំនើបសហគមន៍ថ្មីសម្រាប់លោកអ្នក

event

bora.chhouk@gmail.com

-

September 20, 2022

0

ផ្សារទំនើប ខេ ម៉ល ព្រែកត្នោត- ទីតាំងផ្សារទំនើបសហគមន៍ថ្មីសម្រាប់លោកអ្នក

ផ្សារទំនើប ខេ ម៉ល អភិវឌ្ឍដោយក្រុមហ៊ុន អឺបេនលែន (Urbanland) ប្រកាសពង្រីកគម្រោងផ្សារ ទំនើបមួយទៀតនៅក្នុងតំបន់ព្រែកត្នោត ភាគខាងត្បូងនៃទីក្រុងភ្នំពេញ។ ផ្សារទំនើប ខេ ម៉ល ព្រែកត្នោតនឹងក្លាយជាទីតាំងសហគមន៍ថ្មីមួយនៅតាមបណ្តោយផ្លូវជាតិលេខ 2 ដើម្បីបង្កើន ភាពងាយស្រួលដល់អតិថិជន និងភាពរស់រវើកនៃតំបន់ព្រែកត្នោតនាពេលឆាប់ៗខាងមុខ។

***(រូបថតគំរូមើលពីលើរបស់ផ្សារទំនើប ខេ ម៉ល ព្រែកត្នោត)***

ដោយគ្រាន់តែធ្វើដំណើរត្រឹមតែប៉ុន្មាននាទីប៉ុណ្ណោះចេញពីមហាវិថីសម្តេច ហ៊ុន សែន ឆ្លងកាត់ផ្លូវជាតិលេខ 2 លោកអ្នកនឹងអាចមើលឃើញពីទីតាំងរបស់ផ្សារទំនើប ខេ ម៉ល ព្រែកត្នោតដ៏ធំទូលាយ អមជាមួយបរិយាកាសធម្មជាតិបៃតង ស្រស់រង់ចាំទទួលស្វាគមន៍ លោកអ្នកនាពេលអនាគត។

រចនាជាមួយភាពច្នៃប្រឌិត និងការផ្តោតគំនិតសំខាន់លើផាសុកភាពតាមបែបធម្មជាតិសម្រាប់ អ្នកប្រើប្រាស់ គម្រោងផ្សារទំនើបថ្មីនេះ ប្រៀបបីដូចជាសហគមន៍ចម្រុះមួយដែលនឹងផ្តល់ជូន នូវទីកន្លែងជួបជំុមិត្តភក្តិ និងក្រុមគ្រួសារក្នុងការលម្ហែកម្សាន្ត ក៏ដូចជាការទិញទំនិញ ប្រចាំថ្ងៃ ព្រមទាំងការចូលរួមប្រារព្ធកម្មវិធីផ្សេងៗជាច្រើនប្រភេទសម្រាប់សហគមន៍នៅជុំវិញតំបន់នេះ។

គម្រោងថ្មីនេះនឹងធ្វើឡើងលើទំហំផ្ទៃដីប្រមាណ 8,000 ម៉ែត្រការ៉េ ដោយរួមមានទីកន្លែងជួបជុំ ជាសាធារណៈ ផ្លាហ្សាធំទូលាយបែបបើកចំហ និងទីធ្លាបៃតងធម្មជាតិសម្រាប់សកម្មភាពកម្សាន្ត ផ្សេងៗ ដោយមានទីតាំងស្ថិតនៅជាប់នឹងបុរីចន្ទគីរី ហើយក៏ជាគម្រោងថ្មីមួយទៀតដែលត្រូវបាន បង្កើតឡើងដោយក្រុមហ៊ុនឈ្នះពានរង្វាន់ អឺបេនលែន (Urbanland) ក្នុងវិស័យអភិវឌ្ឍន៍ អចលនទ្រព្យ។

ផ្សារទំនើបថ្មីនេះបានប្រារព្ធពិធីប្រកាសគម្រោងអភិវឌ្ឍន៍ជាផ្លូវការនៅថ្ងៃទី 19 ខែកញ្ញា ឆ្នាំ 2022 ជាមួយពិធីចុះហត្ថលេខាលើអនុស្សរណៈយោគយល់គ្នារវាងផ្សារទំនើបឡាក់គី ប្រោនកាហ្វេ និង Kungfu Kitchen ស្របពេលដែលដៃគូពិសេសៗជាច្រើនទៀតនឹងចូលរួមមានវត្តមានជាបន្ត បន្ទាប់ក្នុងពេលឆាប់ៗខាងមុខ។

(រូបភាពរបស់ លោក ហុក កាំង កំពុងនិយាយនៅក្នុងកម្មវិធីអំពីគម្រោងផ្សារទំនើបថ្មី)

លោក កាំង ហុក អគ្គនាយកប្រតិបត្តិក្រុមហ៊ុន អឺបេនលែន បានមានប្រសាសន៍ថា៖ «គម្រោងអភិវឌ្ឍទីមួយនៃផ្សារទំនើប ខេ ម៉ល គឺជាសមិ្ធផលនៃស្នាដៃអភិវឌ្ឍន៍របស់យើងនៅក្នុងតំបន់ វេង ស្រេង។ ហើយក្រុមការងាររបស់យើងមានភាពជឿជាក់ក្នុងការនាំយកគម្រោងផ្សារទំនើបនេះ ទៅភាគខាងត្បូងនៃទីក្រុងភ្នំពេញ ដែលជាតំបន់ដ៏មានសក្តានុពលមួយមានការអភិវឌ្ឍន៍ យ៉ាងឆាប់រហ័ស។ យើងខ្ញុំសូមថ្លែងអំណរគុណដល់ដៃគូសហការដំបូងគេទាំងបីរបស់យើង ដែលនេះបង្ហាញយ៉ាងច្បាស់អំពីទំនុកចិត្ត និងភាពជាដៃគូរ ហើយយើងប្តេជ្ញានឹងសាងសង់គម្រោង ផ្សារទំនើបសហគមន៍ថ្មីដ៏ល្អបំផុតសម្រាប់តំបន់ព្រែកត្នោត។»

លោក Jose Carlos Reis Bettencourt នាយកគ្រប់គ្រងផ្សារទំនើបឡាក់គី បានមានប្រសាសន៍ថា៖ «យើងមានការកោតសរសើរដល់ក្រុមការងាររបស់ផ្សារទំនើប ខេ ម៉ល និង អឺបេនលែន ដែលបានខិតខំប្រឹងប្រែងអស់ពីចិត្ត និងប្រើប្រាស់ជំនាញរបស់ខ្លួនក្នុង ការបង្ហាញស្នាដៃរចនាដ៏ល្អប្រណិតប្លែក ហើយពួកយើងពិតជាមានសំណាង ដែលបានចូលរួមជាចំណែកមួយក្នុងការអភិវឌ្ឍន៍ថ្មីនេះ ព្រមទាំងបន្តភាពជាដៃគូ ពាណិជ្ជកម្មរួមគ្នាជាមួយ ប្រោនកាហ្វេ Kungfu Kitchen និងម៉ាកយីហោផ្សេងៗជាច្រើនទៀត។»

(រូបភាពពីឆ្វេងទៅស្តាំ អ្នកតំណាងផ្សារទំនើប ខេ ម៉ល ព្រែកត្នោត និងអ្នកតំណាងដៃគូសហការ***ពាណិជ្ជក**ម្ម)***

ក្នុងឱកាសនេះដែរ លោកស្រី Denise Lim នាយកគ្រប់គ្រងភោជនីយដ្ឋាន Kungfu Kitchen បានបង្ហាញចំណាប់អារម្មណ៍អំពីភាពជោគជ័យរបស់ភោជនីយដ្ឋាន Kungfu Kitchen ដែលកំពុងបើកដំណើរការនៅផ្សារទំនើប ខេ ម៉ល វេង ស្រេង ដោយមានក្រុមការងារផ្សារទំនើប ខេ ម៉ល និង អឺបេនលែន តែងតែផ្តល់ការគាំទ្រ ទំនុកចិត្ត និង ភាពជឿជាក់ ក្នុងការបន្តដំណើរក្នុងភាព ជាដៃគូសហការ ព្រមទាំងផ្តល់ឱកាសដល់ Kungfu Kitchen ចូលរួមក្នុងការពង្រីកសាខាថ្មីរបស់ ខ្លួនមួយទៀតនៅផ្សារទំនើប ខេ ម៉ល ព្រែកត្នោតផងដែរ។

***(អ្នកតំណាងរបស់ ប្រោនកាហ្វេ ដែលជាដៃគូសហការ**ពាណិជ្ជក**ម្មផ្សារទំនើប ខេ ម៉ល)***

ក្នុងពេលបច្ចុប្បន្ននេះ លោកអ្នកដែលធ្វើដំណើរឆ្លងកាត់ភាគខាងត្បូងនៃរាជធានីភ្នំពេញត្រង់តំបន់ផ្លូវ 60 ម៉ែត្រ ជាពិសេសតំបន់ព្រែកត្នោត លោកអ្នកនឹងបានឃើញនូវភាពលេចធ្លោនៃការវិនិយោគ និងការអភិវឌ្ឍន៍ធំៗជាច្រើនរួមមាន គម្រោងសាងសង់បុរី សាលារៀន និងហេដ្ឋារចនាសម្ព័ន្ធថ្មីៗ ដូចជា អាកាសយានដ្ឋានអន្តរជាតិតេជោតាខ្មៅដ៏ធំជាងគេមួយក្នុងតំបន់ និង គម្រោងស្ពានអាកាស ព្រះមុនីវង្សដែលនឹងតភ្ជាប់ចរាចរណ៍សំខាន់ៗឆ្លងកាត់តំបន់ផ្លូវ 60 ម៉ែត្រ និងតំបន់ស្ទឹងព្រែកត្នោត នាពេលអនាគត។

(រូបភាពបង្ហាញទីតាំងផ្លូវ និងតំបន់ព្រែកត្នោតនៃគម្រោងផ្សារទំនើប ខេ ម៉ល ព្រែកត្នោត)

ភាពជោគជ័យនៃគម្រោងអភិវឌ្ឍន៍ដំបូងគេរបស់ផ្សារទំនើប ខេ ម៉ល នៅក្នុងតំបន់ វេង ស្រេង គឺជាភស្តុតាងនៃទស្សនៈវិស័យរបស់ក្រុមហ៊ុន អឺបេនលែន (Urbanland) ក្នុងការរៀបចំអនាគត និងបង្កើនគុណភាពនៃការរស់នៅឱ្យកាន់តែល្អប្រសើរជាងមុនសម្រាប់ប្រជាជនកម្ពុជា។ លើសពីនេះទៅទៀត ការទទួលស្គាល់ និងការគាំទ្រពីអតិថិជនជាច្រើនដល់ផ្សារទំនើប ខេ ម៉ល នេះ បានបង្ហាញពីលទ្ធផលប្រកបដោយផ្លែផ្កាល្អមួយពីសហគមន៍តំបន់ វេង ស្រេង ហើយ គម្រោងថ្មី របស់ផ្សារទំនើប ខេ ម៉ល ព្រែកត្នោត ក៏នឹងបន្តផ្តល់ជូននូវការរស់នៅប្រកបដោយផាសុកភាព

និងភាពងាយស្រួលដល់សហគមន៍ក្នុងបរិស្ថានប្រណិតបែបធម្មជាតិផងដែរ។

***(ទិដ្ឋភាពនៃផ្សារទំនើប ខេ ម៉ល វេង ស្រេង)***

បច្ចុប្បន្ន ផ្សារទំនើប ខេ ម៉ល មានហាងម៉ាកល្បីៗទាំងក្នុងនិងក្រៅស្រុកចំនួន 33 ហាង និងជា ផ្សារទំនើបសហគមន៍ដំបូងគេបង្អស់ក្នុងការលើកកម្ពស់មុខមាត់តំបន់ វេង ស្រេង ដែលបម្រើជូន ប្រជាជនក្នុងសហគមន៍ជុំវិញជាមួយការរចនាស្ថាបត្យកម្មដ៏ល្អឥតខ្ចោះប្រកបដោយបរិយាកាសធម្មជាតិបៃតង ហើយដែលកំពុងទទួលស្វាគមន៍អតិថិជនប្រមាណ ៤,៥00 នាក់ជារៀងរាល់ថ្ងៃ។

ទីតាំងរបស់ផ្សារទំនើប ខេ ម៉ល វេង ស្រេង មានចំងាយប្រមាណតែ 5 នាទី ប៉ុណ្ណោះពីរង្វង់មូលស្ទឹង មានជ័យ និងប្រមាណតែ 10 នាទីពីរង្វង់មូលចោមចៅ និងត្រឹមតែ 15នាទី ពីអាកាសយានដ្ឋាន

អន្តរជាតិ។ ផ្សារទំនើប ខេ ម៉ល ក៏ជាផ្នែកមួយនៃគម្រោងអភិវឌ្ឍន៍របស់ KMH Park ក្នុងតំបន់ វេង ស្រេង ដែលឈរនៅលើផ្ទៃដីទំហំ 6 ហិកតា រួមជាមួយអគារ ISI Tower ផ្ទះអាជីវកម្មចំនួន 40 និងតារាងបាល់ទាត់មួយផងដែរ។

អំពីក្រុមហ៊ុន អឺបេនលែន (Urbanland)

ក្រុមហ៊ុន អឺបេនលែន គឺជាក្រុមហ៊ុនអភិវឌ្ឍន៍អចលនទ្រព្យ ក្នុងស្រុកមួយដែលមានគោលដៅ បង្កើតកន្លែងដែលមានភាពច្នៃប្រឌិតខ្ពស់ដើម្បីឱ្យមនុស្សគ្រប់គ្នារស់នៅ ធ្វើការ និងកម្សាន្ដ ជាមួយការប្ដេជ្ញាមុតមាំលើគុណភាព ភាពឋិតថេរ និង ភាពផ្ចិតផ្ចង់។ ក្រុមហ៊ុន អឺបេនលែន បានបង្កើតឡើងនៅឆ្នាំ 2013 ដោយលោកស្ថាបត្យករ កាំង ហុក ដោយលោកជឿជាក់ថាការ ផ្ដោតលើតម្រូវការអ្នករស់នៅជាចម្បង គឺជាយុទ្ធសាស្រ្តដ៏ល្អដើម្បីជួយលើកកម្ពស់គុណភាព រស់នៅរបស់ពួកគេ និងបង្កើតបរិយាកាសប្រកបដោយផាសុកភាព។

ក្រុមហ៊ុន អឺបេនលែន ក៏ជាសមាជិក នៃសហព័ន្ធក្រុមហ៊ុន ISI GROUP ដែលជាក្រុមហ៊ុនក្នុងស្រុក ខ្នាតធំមួយមានបទពិសោធជាង 22 ឆ្នាំក្នុងវិស័យសំណង់។ ក្រុមហ៊ុន អឺបេនលែន ត្រូវបានទទួល ស្គាល់តាមរយៈការបង្កើតគម្រោងប្រណិតៗពោរពេញដោយភាពច្នៃប្រឌិតដោយប្រើប្រាស់ ការរចនាផ្ដោតលើតម្រូវការអ្នករស់នៅជាចម្បងដែលឆ្លុះបញ្ចាំងតាមរយៈគម្រោងអភិវឌ្ឍន៍ដែល ជាប់ជ័យលាភីរួមមានអាគារ Raintree (អគារការិយាល័យ និងពាណិជ្ជកម្ម) Embassy Residences និង Embassy Central (ខុនដូ បែបប្រណីត) ព្រមទាំងសណ្ឋាគាររចនាម៉ូដបែបប្រណីតដំបូងគេនៅក្រុងសៀមរាប Treeline Urban Resort ក៏ដូចជាគម្រោងអភិវឌ្ឍន៍ដំបូងគេមួយទៀតនៅតំបន់ វេង ស្រេង គឺ KMH Park ដែលជាផែនការ ធំថ្មីរួមមានអគារ ការិយាល័យហាងលក់ទំនិញ លំនៅឋាន និងសួនលម្ហែកាយបែបធម្មជាតិរួមទាំង K Mall និងអគារ ISI Tower។

សម្រាប់ព័ត៌មានបន្ថែមអំពីគម្រោងរបស់ក្រុមហ៊ុន អឺបេនលែន សូមចុចនៅទីនេះ Projects – Urbanland Asia៕

សមាគមចលនាយុវជនកម្ពុជា (ក្រុម១៥៧) អបអរសាទរដល់ក្រុមកង់ ធ្វើដំណើរលើ ផ្លូវល្បឿនលឿនភ្នំពេញ-ខេត្តព្រះសីហនុ

សិល្បៈ កម្សាន្ត កីឡា

private

-

September 18, 2022

0

សមាគមចលនាយុវជនកម្ពុជា (ក្រុម១៥៧) អបអរសាទរដល់ក្រុមកង់ ធ្វើដំណើរលើ ផ្លូវល្បឿនលឿនភ្នំពេញ-ខេត្តព្រះសីហនុ

ភ្នំពេញ៖ ក្រោយទទួលបានជោគជ័យយ៉ាងត្រចះត្រចង់ សម្រាប់ព្រឹត្តិការណ៍ជិះកង់ប្រមាណ ២០០គីឡូម៉ែត្រ ពីរាជធានីភ្នំពេញ ទៅកាន់ក្រុងព្រះសីហនុ តាមផ្លូវល្បឿនលឿនភ្នំពេញ-ព្រះសីហនុ ដើម្បីឈ្វេងយល់ពីទីតាំងភូមិសាស្ត្រ និងសក្តានុពលផ្លូវល្បឿនលឿន ក៏ដូចជាភាពរីកចម្រើននៃប្រទេសកម្ពុជា ក៏ដូចជាដេីម្បីរឹតចំណងមិត្តភាពស ម្រាប់ក្រុមកីឡាជិះកង់កាលពីដេីមខែកន្លងមកនេះសមាគមចលនាយុវជនកម្ពុជា (ក្រុម១៥៧) នាល្ងាចថ្ងៃទី១៧ ខែកញ្ញា ឆ្នាំ២០២២នេះ បានរៀបចំពិធីជប់លៀង ដេីម្បីអបអរសាទរ ក៏ដូចជាការថ្លែងអំណរគុណដល់ក្រុមកីឡាករ រួមទាំងម្ចាស់ឧបត្ថម្ភទាំងអស់ ដែលបានធ្វើអោយកម្មវិធីជិះកង់នេះ ទទួលបានជោគជ័យជាអនេក។

លោក វិន យ៉ូរ៉ូហាស៊ីឈីរ៉ូ រដ្ឋបាលថ្នាក់កណ្តាល នៃសមាគមចលនាយុវជនកម្ពុជា (ក្រុម១៥៧) បានឱ្យដឹងថា គោលបំណងនៃការរៀបចំកម្មវិធីនេះដេីម្បីអបអរសាទរដល់ក្រុមកីឡាករ កីឡាការិនី ក៏ដូចជាការថ្លែងអំណរគុណដល់ម្ចាស់ក្រុមហ៊ុនឧបត្ថម្ភទាំងអស់ ដែលបានចំណាយនូវថវិកាផ្ទាល់ខ្លួនធ្វេីឱ្យកម្មវិធីជិះកង់តាមផ្លូវល្បឿនលឿននេះទទួលបានជោគជ័យ។

លោក វិន យ៉ូរ៉ូហាស៊ីឈីរ៉ូ បានបន្ថែមថា ព្រឹត្តិការណ៍នេះ មិនត្រឹមតែក្នុងគោលបំណងដើម្បីសុខភាពនោះទេ ប៉ុន្តែវាក៏ជាផ្នែកមួយក្នុងស្មារតី យុវជន “អរគុណសន្តិភាព” ដើម្បីរឹតចំណងសាមគ្គីភាព មិត្តភាពចំពោះអ្នកស្រលាញ់កីឡាជិះកង់ ក៏ដូចជាការស្វែងរកមូលនិធិសម្រាប់ជួយសង្គមផងដែរ។ តាមរយៈយុទ្ធនាការជិះកង់នេះ លោកបានសង្កេតឃេីញក្រុមកីឡាករទាំងអស់គឺមានភាពសាមគ្គីគ្នាយ៉ាងល្អ ជាមួយនឹងការទទួលបានការគាំទ្រយ៉ាងច្រេីន ពីសំណាក់ប្រជាពលរដ្ឋផងដែរ។

សូមជម្រាបដែរថា សម្រាប់កម្មវិធីជប់លៀងអបអរនេះដែរក៏មានការប្រគល់លិខិតសរសេីរដល់ក្រុមកីឡាករ កីឡាការិនី និងចែកលិខិតថ្លែងអំណរគុណដល់ម្ចាស់ឧបត្ថម្ភទាំងអស់ ក៏ដូចជាមានជាកម្មវិធីចាប់រង្វាន់អនុស្សាវរីយ៍ជាច្រេីនផងដែរ។

សូមបញ្ជាក់ដែរថា សមាគមចលនាយុវជនកម្ពុជា (ក្រុម១៥៧) បានរៀបចំក្បួនជិះកង់ ដែលមានអ្នកចូលរួមជាង ៣០០នាក់ ក្នុងស្មារតីយុវជន «អរគុណសន្តិភាព» ដែលព្រឹត្តិការណ៍នេះត្រូវបានធ្វើឡើងកាលពីថ្ងៃទី៣-៤ ខែកញ្ញា ឆ្នាំ២០២២ ដោយចេញដំណើរពីរាជធានីភ្នំពេញនៅវេលាម៉ោង៤ព្រឹក ហើយទៅដល់ក្រុងព្រះសីហនុនៅពេលរសៀល។

ការរៀបចំព្រឹត្តិការណ៍នេះដែរ គឺដើម្បីរឹតចំណងសាមគ្គីភាព មិត្តភាពចំពោះអ្នកស្រលាញ់កីឡាជិះកង់ ក៏ដូចជាដើម្បីស្វែងយល់ពីសក្តានុពលនៃផ្លូវល្បឿនលឿនភ្នំពេញ-ព្រះសីហនុ និងចូលរួមផ្សព្វផ្សាយវិស័យទេសចរណ៍ជាមួយរាជរដ្ឋាភិបាលកម្ពុជា។

ក្រៅពីការជិះកង់មើលពីសក្តានុពលផ្លូវល្បឿនលឿនភ្នំពេញ-ព្រះសីហនុនេះ ក្រុមជិះកង់ខាងលើក៏បានបន្តដំណើរជិះកង់ទៅទស្សនាពីការអភិវឌ្ឍ និងសក្តានុពលនៃការរីកចម្រើននៅក្រុងព្រះសីហនុ ជាមួយនឹងការទៅឱ្យដល់ផ្ទាល់នៅចំណុច «ខ្មែរធ្វើបាន» ផងដែរ៕

គម្រោងបង្កើតរោងចក្រ កាត់ដេរសម្លៀកបំពាក់ថ្មីចំនួន៣ ក្នុងទំហំទុនវិនិយោគ ជាង១៦លានដុល្លារ បានអនុម័ត

Uncategorized

bora.chhouk@gmail.com

-

September 18, 2022

0

គម្រោងបង្កើតរោងចក្រ កាត់ដេរសម្លៀកបំពាក់ថ្មីចំនួន៣ ក្នុងទំហំទុនវិនិយោគ ជាង១៦លានដុល្លារ បានអនុម័ត

ភ្នំពេញ៖ គម្រោងបង្កើតរោងចក្រ កាត់ដេរសម្លៀកបំពាក់ថ្មីចំនួន៣បន្ថែមទៀត ត្រូវបានក្រុមប្រឹក្សាអភិវឌ្ឍន៍កម្ពុជា អនុម័ត ដែលមានទុនវិនិយោគសរុប១៦,៥លានដុល្លារអាមេរិក។

ក្រុមប្រឹក្សាអភិវឌ្ឍន៍កម្ពុជា The Council for the Development of Cambodia បានឲ្យដឹងកាលពីថ្មៗនេះថា តាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីគម្រោងវិនិយោគ ជូនដល់ក្រុមហ៊ុនដូចខាងក្រោម៖

១-CHINA TING (CAMBODIA) FASHION CO., LTD គម្រោងបង្កើតរោងចក្រកាត់ដេរសម្លៀកបំពាក់ដែលមានទីតាំងវិនិយោគស្ថិតនៅភូមិត្រពាំងផ្លុង ឃុំដំណាក់រាំង ស្រុកឧដុង្គ ខេត្តកំពង់ស្ពឺ ក្នុងទុនវិនិយោគប្រមាណ ៥,៦លានដុល្លារអាមេរិក និងអាចបង្កើតការងារបានចំនួន ៣.១៥៨កន្លែង។

២-Y.T.I (CAMBODIA) GARMENT CO., LTD គម្រោងបង្កើតរោងចក្រកាត់ដេរសម្លៀកបំពាក់ដែលមានទីតាំងវិនិយោគស្ថិតនៅភូមិឯកភាព ឃុំខ្ទុំក្រាំង ស្រុកសំរោងទង ខេត្តកំពង់ស្ពឺ ក្នុងទុនវិនិយោគប្រមាណ ៥,៥លានដុល្លារអាមេរិក និងអាចបង្កើតការងារបានចំនួន ២.១៨៣កន្លែង។

៣-SKY CLOTHING (CAMBODIA) CO., LTD គម្រោងបង្កើតរោងចក្រកាត់ដេរសម្លៀកបំពាក់ដែលមានទីតាំងវិនិយោគស្ថិតនៅភូមិដំណាក់ធំ២ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ ក្នុងទុនវិនិយោគប្រមាណ ៥,៤លានដុល្លារអាមេរិក និងអាចបង្កើតការងារបានចំនួន ១.៣៤៧កន្លែង។

កិច្ចប្រជុំកំពូលផ្នែកទីផ្សារប្រចាំឆ្នាំរបស់ក្រុមហ៊ុន Meta នឹងមកដល់ ប្រទេសកម្ពុជា ដើម្បីជួយអាជីវកម្មត្រៀមខ្លួនជាស្រេចសម្រាប់អនាគត

សេដ្ឋកិច្ច

bora.chhouk@gmail.com

-

September 17, 2022

0

កិច្ចប្រជុំកំពូលផ្នែកទីផ្សារប្រចាំឆ្នាំរបស់ក្រុមហ៊ុន Meta នឹងមកដល់ ប្រទេសកម្ពុជា ដើម្បីជួយអាជីវកម្មត្រៀមខ្លួនជាស្រេចសម្រាប់អនាគត

ប្រទេសកម្ពុជា ថ្ងៃទី១៧ ខែកញ្ញា ឆ្នាំ២០២២៖ ក្រុមហ៊ុន Meta នឹងពង្រីកវិសាលភាពនៃកិច្ចប្រជុំកំពូលផ្នែកទីផ្សារប្រចាំឆ្នាំរបស់ខ្លួនទៅកាន់បណ្ដាប្រទេសជាច្រើនទៀតនៅតំបន់អាស៊ីប៉ាស៊ីហ្វិកក្នុងឆ្នាំនេះ ដែលរួមមាន បង់ក្លាដែស កម្ពុជា ឡាវ ប៉ាគីស្ថាន និងស្រីលង្កា នៅថ្ងៃព្រហស្បតិ៍ ទី២៩ ខែកញ្ញា ឆ្នាំ២០២២ នេះ។ កិច្ចប្រជុំនេះនឹងក្លាយជាជំនួបថ្នាក់ដឹកនាំផ្នែកទីផ្សារថ្នាក់តំបន់ និងពិភពលោក ដើម្បីស្វែងយល់ និងពិភាក្សាអំពីបច្ចេកវិទ្យា និងនិន្នាការដែលជះឥទ្ធិពលដល់អាជីវកម្មរបស់យើងនាពេលបច្ចុប្បន្ន ដូចជា កម្មវិធីផ្ញើសារសម្រាប់អាជីវកម្ម (Business Messaging), មេតាវឺស និងការធ្វើទីផ្សារ (Metaverse & Marketing), វិធីសាស្ដ្រលក់លើអនឡាញដោយណែនាំផលិតផលជូនដល់ភ្ញៀវ (Discovery Commerce), អ្នកបង្កើតមាតិកាសម្រាប់អាជីវកម្ម (Creators for Business) និងផ្សេងៗទៀត។ កិច្ចប្រជុំកំពូលដែលជាព្រឹត្ដិការណ៍ប្រចាំឆ្នាំលើកទីបួននៅតំបន់អាស៊ីអាគ្នេយ៍នឹងពង្រីកវិសាលភាពទៅកាន់ប្រទេសទាំងនេះជាលើកដំបូងនាឆ្នាំនេះ។

កិច្ចប្រជុំកំពូលនេះនឹងមានការថ្លែងសុន្ទរកថាបើក ដោយលោកស្រី Michelle Klein ជាអគ្គនាយករងទទួលបន្ទុកផ្នែកទីផ្សារជំនួញសកល និង លោក Benjamin Joe អគ្គនាយករងប្រចាំតំបន់អាស៊ីអាគ្នេយ៍ និងទីផ្សារកំពុងអភិវឌ្ឍ របស់ក្រុមហ៊ុន Meta ដែលនឹងថ្លែងអំពីអនាគតនៃចក្រវាឡនិម្មិត metaverse និងឱកាសសម្រាប់អាជីវកម្ម ហើយអំពីរបៀបដែលក្រុមហ៊ុន Meta កំពុងគាំទ្រដល់ប្រព័ន្ធអេកូឡូស៊ី metaverse តាមរយៈកិច្ចសហការជាមួយដៃគូឧស្សាហកម្ម អ្នកជំនាញ និងអ្នកបង្កើតគោលនយោបាយ។

បន្ទាប់ពីថ្លែងបើកកម្មវិធី លោក Jordi Fornies នាយកទទួលបន្ទុកទីផ្សារកំពុងអភិវឌ្ឍប្រចាំតំបន់អាស៊ីប៉ាស៊ីហ្វិករបស់ក្រុមហ៊ុន Meta និងលោក Rafael Frankel នាយកគោលនយោបាយសាធារណៈសម្រាប់ទីផ្សារកំពុងអភិវឌ្ឍប្រចាំតំបន់អាស៊ីប៉ាស៊ីហ្វិករបស់ក្រុមហ៊ុន Meta នឹងថ្លែងអំពីគំនិតស្នូលរបស់ក្រុមហ៊ុន Meta ក្នុងការបង្កើតផលិតផលដែលដើរតួជាស្ពានសម្រាប់ភ្ជាប់ទំនាក់ទំនង ស្វែងរកសហគមន៍ និងបង្កើនអាជីវកម្មកាន់តែរីកចម្រើន ពោលគឺជាចំណុចប្រសព្វដែលអាជីវកម្ម និងសហគមន៍ជួបគ្នា។ អ្នកទាំងពីរក៏នឹងចែករំលែកគំនិតផ្តួចផ្តើមមួយចំនួន ដើម្បីបង្កើនចំណេះដឹងផ្នែកឌីជីថល និងការផ្លាស់ប្តូរទាំងស្រុងសម្រាប់អាជីវកម្មបែបទីផ្សារកំពុងអភិវឌ្ឍនៅក្នុងតំបន់អាស៊ីប៉ាស៊ីហ្វិកទាំងនេះ ក៏ដូចជាបង្ហាញឱ្យកាន់តែច្បាស់នូវអាជីពដ៏គួរជាទីចាប់អារម្មណ៍ ដែលកែសម្រួលគំរូអាជីវកម្មរបស់ខ្លួនដើម្បីសម្របទៅនឹងបញ្ហាប្រឈមនានា។

លោក Jordi Fornies នាយកទទួលបន្ទុកទីផ្សារកំពុងអភិវឌ្ឍប្រចាំតំបន់អាស៊ីប៉ាស៊ីហ្វិករបស់ក្រុមហ៊ុន Meta បានថ្លែងថា៖ «យើងមានក្តីរំភើបរីករាយក្នុងការរៀបចំកិច្ចប្រជុំកំពូលផ្នែកទីផ្សារប្រចាំឆ្នាំរបស់ក្រុមហ៊ុន Meta នៅ ប្រទេសកម្ពុជា នាឆ្នាំនេះ។ ប្រធានបទកិច្ចប្រជុំកំពូលរបស់យើងឆ្នាំនេះគឺ ‘នៅពេលដែលថ្ងៃនេះជួបថ្ងៃស្អែក (Where today meets tomorrow)’ ដែលយើងនឹងពិភាក្សាអំពីនិន្នាការអភិវឌ្ឍ និងបច្ចេកវិទ្យាសំខាន់ៗ ដើម្បីជួយក្រុមហ៊ុនអាជីវកម្ម និងសហគមន៍ក្នុងការស្វែងរកឱកាសឱ្យអាជីវកម្មរបស់ពួកគេរីកចម្រើន និងជំរុញកំណើនសេដ្ឋកិច្ច។ កិច្ចប្រជុំកំពូលប្រចាំឆ្នាំនេះគឺជាឱកាសដ៏គួរឱ្យរំភើបមួយសម្រាប់ការដោះដូរគំនិត និងកាន់តែស៊ីជម្រៅ ក៏ដូចជាបង្កើតទំនាក់ទំនងដ៏មានអត្ថន័យជាមួយអ្នកផ្សេងទៀត និងជួយឱ្យពួកគេដោះស្រាយបញ្ហាប្រឈមនៅថ្ងៃស្អែក»។

ថ្នាក់ដឹកនាំផ្នែកទីផ្សារលំដាប់ពិភពលោក និងក្នុងតំបន់ ដូចជា លោកស្រី Eva Chen អគ្គនាយករងផ្នែក Fashion Partnerships របស់ក្រុមហ៊ុន Meta និងលោក Gary Vaynerchuck អគ្គនាយកក្រុមហ៊ុន VaynerX និងជានាយកប្រតិបត្ដិក្រុមហ៊ុន VaynerMedia ក៏នឹងចូលរួមផងដែរដើម្បីពិភាក្សាអំពីប្រធានបទផ្សេងៗដូចជា៖

● ការតភ្ជាប់ទំនាក់ទំនងតាមរយៈ Discovery Commerce៖ សារៈសំខាន់នៃការស្វែងរកអតិថិជនតាមរយៈការច្នៃប្រឌិត និងរបៀបដែលក្រុមហ៊ុនអាជីវកម្មអាចភ្ជាប់ទំនាក់ទំនងជាមួយអតិថិជនរបស់ពួកគេតាមរយៈបទពិសោធផ្ទាល់ខ្លួនដោយប្រើប្រាស់ឧបករណ៍ និងបច្ចេកវិទ្យាដែលត្រឹមត្រូវ។

● លើកកម្ពស់ភាពជោគជ័យរបស់សហគ្រិន៖ របៀបដែលបច្ចេកវិទ្យារបស់ក្រុមហ៊ុន Meta ផ្តល់អំណាចដល់ក្រុមហ៊ុនអាជីវកម្មខ្នាតតូច និងមធ្យមនៅទូទាំងឧស្សាហកម្មចម្រុះ ដើម្បីនវានុវត្ដ ផ្សារភ្ជាប់ទំនាក់ទំនង និងរីកចម្រើនប្រកបដោយនិរន្តរភាព

● ការបំផុសគំនិតច្នៃប្រឌិតលើបណ្តាញសង្គម៖ របៀបដែលម៉ាកយីហោ និងអ្នកបង្កើតមាតិកាអាចប្រើប្រាស់ទម្រង់ Reels និងវីដេអូ (Reels and video formats) ដើម្បីបង្កើតទំនាក់ទំនងប្រកបដោយអត្ថន័យ និងនិរន្តរភាពជាមួយអ្នកផ្សេងទៀតតាមរយៈបទពិសោធរៀបរាប់រឿងរ៉ាលម្អិត និងសំបូរបែប។

កិច្ចប្រជុំកំពូលផ្នែកទីផ្សាររបស់ក្រុមហ៊ុន Meta គឺជាព្រឹត្តិការណ៍ដែលរៀបចំឡើងតាមអនឡាញ ហើយលោកអ្នកអាចជ្រើសរើសរបៀបនៃការចូលរួមក្នុងកិច្ចប្រជុំនេះបានតាមជម្រើសបីប្រភេទដូចខាងក្រោម៖

● ទីមួយ លោកអ្នកអាចមើលកិច្ចប្រជុំពេញលេញនៅថ្ងៃស្អែកនេះ ជាមួយកម្មវិធីនៅលើកុំព្យូទ័រ ដូចជា កម្មវិធីសំណួរ និងចម្លើយផ្ទាល់ជាមួយអ្នកជំនាញរបស់ក្រុមហ៊ុន Meta ក្នុងការឆ្លើយសំណួររបស់លោកអ្នក។

● ទីពីរ ប្រសិនបើលោកអ្នកចង់មើលតែវគ្គជាក់លាក់ណាមួយ ឬការរុករកអ្វីផ្សេងៗទៀត លោកអ្នកអាចចូលទៅកាន់បណ្ណាល័យ Watch Anytime របស់យើងដែលលោកអ្នកចូលទៅប្រើប្រាស់មាតិកាគ្រប់បែបយ៉ាង។

● ទីបី ប្រសិនបើលោកអ្នកមិនមានពេលវេលា ឬកំពុងធ្វើដំណើរ លោកអ្នកអាចស្តាប់ផតខាសត៍ (podcasts) របស់យើងបានជាមួយនឹងការសង្ខេបខ្លីៗអំពីមាតិកាសំខាន់របស់យើង។

ជម្រើសទាំងនេះមាននៅលើគេហទំព័ររបស់កិច្ចប្រជុំកំពូលផ្នែកទីផ្សាររបស់ក្រុមហ៊ុន Meta នៅ ប្រទេសកម្ពុជា ដែលចាប់ផ្តើមពីថ្ងៃទី២៩ ខែកញ្ញារហូតដល់ថ្ងៃទី៣១ ខែតុលា ឆ្នាំ ២០២២៕

ឧកញ៉ា ទៀ វិចិត្រ បញ្ចូនអូប័រល្បឿនលឿន ចេញទៅទទួលបុរសម្នាក់ពីកោះរ៉ុង មកកាន់មន្ទីរពេទ្យបង្អែក បន្ទាប់ពីជួបគ្រោះថ្នាក់ថ្មបាក់សង្កត់ជើង

សិល្បៈ កម្សាន្ត កីឡា

private

-

September 17, 2022

0

ឧកញ៉ា ទៀ វិចិត្រ បញ្ចូនអូប័រល្បឿនលឿន ចេញទៅទទួលបុរសម្នាក់ពីកោះរ៉ុង មកកាន់មន្ទីរពេទ្យបង្អែក បន្ទាប់ពីជួបគ្រោះថ្នាក់ថ្មបាក់សង្កត់ជើង

ភ្នំពេញ៖ កាលពីល្ងាចថ្ងៃទី១៥ ខែកញ្ញា ឆ្នាំ២០២២ លោកឧកញ៉ា ទៀ វិចិត្រ ប្រធានសាខាគណបក្សភ្នាក់ងារ ដឹកជញ្ជូនទេសចរណ៍ជលយានខេត្តព្រះសីហនុ បានបញ្ជូនអូប័រពេទ្យល្បឿនលឿន និងក្រុមការងារសង្គ្រោះ របស់គណៈកម្មាធិការសាខាគណបក្សប្រជាជនកម្ពុជា ភ្នាក់ងារដឹកជញ្ជូនទេសចរណ៍ជលយាន ខេត្តព្រះសីហនុ ទៅទទួលយកបុរសម្នាក់ ដែលបានជួនគ្រោះថ្នាក់ថ្មបាក់សង្កត់ជើង បណ្តាលឲ្យបាក់ជើងខាងស្តាំ ពីកោះរ៉ុង មកកាន់មន្ទីរពេទ្យបង្អែកខេត្តព្រះសីហនុ។

លោកឧកញ៉ា ទៀ វិចិត្រ មានប្រសាសន៍ថា បុរសខាងលើមានឈ្មោះ សុខ វាសនា អាយុ ៣២ឆ្នាំ បច្ចុប្បន្នជាកម្មករសំណង់ ដែលមានទីតាំង ស្ថិតនៅ ភូមិកោះរ៉ុងសន្លឹម (ឆ្នេរ២៣) សង្កាត់កោះរ៉ុងសន្លឹម ក្រុងកោះរ៉ុង ខេត្តព្រះសីហនុ។

ជនរងគ្រោះខាងលើ ត្រូវបានក្រុមការងារសង្គ្រោះ របស់លោកឧកញ៉ា បញ្ជូនតាមអូប័រពេទ្យល្បឿនលឿន មកកាន់កំពង់ផែនៅក្រុងព្រះសីហនុដោយសុវត្ថិភាព នឹងបន្តដឹកតាមរថយន្តសង្គ្រោះរបស់ គណៈកម្មាធិការ សាខាគណបក្សប្រជាជនកម្ពុជា ភ្នាក់ងារដឹកជញ្ជូនទេសចរណ៍ជលយានខេត្ត យកទៅសង្គ្រោះបន្ទាន់នៅមន្ទីរពេទ្យ ក្នុងខេត្តព្រះសីហនុ៕

ចង់បានរូបភាពថតចេញមកច្បាស់..ស្អាត..ម៉ដ្ឋល្អ..មែនទេ!! Galaxy Z Fold4 និង Galaxy Z Flip4 ច្បាស់ជាស្អំបេះដូងអ្នកប្រើប្រាស់ឱ្យកាន់តែពេញចិត្ត!

event

bora.chhouk@gmail.com

-

September 16, 2022

0

ចង់បានរូបភាពថតចេញមកច្បាស់..ស្អាត..ម៉ដ្ឋល្អ..មែនទេ!! Galaxy Z Fold4 និង Galaxy Z Flip4 ច្បាស់ជាស្អំបេះដូងអ្នកប្រើប្រាស់ឱ្យកាន់តែពេញចិត្ត!

(ភ្នំពេញ) ថ្ងៃទី ១៦ ខែកញ្ញា ឆ្នាំ២០២២៖ ពេលស្មាតហ្វូនអេក្រង់បត់ Galaxy Z Fold និង Galaxy Z Flip បានចេញនៅជំនាន់ទី3 មាននាមជាកំពូលស្មាតហ្វូនដ៏ល្អឯករួចទៅហើយ ប៉ុន្តែដល់ពេលចេញ Galaxy Z Fold4 និង Galaxy Z Flip4 ក្នុងជំនាន់ថ្មីនេះម្តង..លើសពីកំពូលស្មាតហ្វូនដ៏ល្អឯកទៅទៀត! ពិតជាមានសមត្ថភាពខ្លាំងហួសពីការរំពឹងទុកពិតមែន..!

នាមជាកំពូលស្មាតហ្វូនអេក្រង់បត់ទៅហើយ…ត្រូវតែមានកន្លែងពិសេស…កន្លែងឆ្ងាញ់ដើម្បីបំពេញតម្រូវការរបស់អតិថិជនទាំងអស់ និងធ្វើយ៉ាងណាផលិតចេញបាននូវស្មាតហ្វូនដ៏ល្អប្រណិតសម្រាប់អតិថិជនរបស់ខ្លួន…! តោះ!!! ចង់ដឹងមែនទេថាតើកាមេរ៉ារបស់ Galaxy Z Fold4 និង Galaxy Z Flip4 ដាំត្រូវចំបេះដូងអ្នកប្រើប្រាស់កម្រិតណា?

* Galaxy Z Fold4៖

– ទម្រង់ដដែលតែខ្លាំងជាងមុន កាមេរ៉ាគោល (Wide Camera) រហូតដល់ 50MP ថតបានច្បាស់ដាច់ស្អាតល្អ និង ការថតឆ្ងាយ (Telephoto) 10MP តែគុណភាពរូបវិញគឺគណនាបានស្អាត ទាំងពណ៌ និងពន្លឺ តែម្តង។ បន្ថែមពីនេះទៅទៀត ជាមួយការបំពាក់បច្ចេកវិទ្យាចុងក្រោយនៃបន្ទះឈីបថ្មី និងប្រព័ន្ធសេនស័រចុងក្រោយ ដែលអាចផលិតរូបភាពចេញមកបានច្បាស់..ម៉ដ្ឋល្អ…(ទាំងថត រូប និង វីដេអូ) លើគ្រប់កាលៈទេសៈនៃពន្លឺ (មិនថាថ្ងៃ ឬ យប់), រីឯការរក្សាលំនឹងថតវិញគឺបានស្មើរស្អាតល្អ និងគណនាប្លង់បានយ៉ាងត្រឹមត្រូវទៀតផង។

ឈប់ៗ ខ្លាចថតselfie មិនស្អាតមែនទេ?? កុំបារម្មណ៍យើងអាច selfie ជាមួយកាមេរ៉ាខាងមុខបានយ៉ាងងាយស្រួយ និងអាច Preview ពីអេក្រង់ខាងមុខយ៉ាងត្រជាក់ភ្នែកផងតែម្តង!

* រីឯ Galaxy Z Flip4៖

– ចង់និយាយថាគឺជាកំពូលទូរស័ព្ទ selfie តែម្តងដែលអាចទាក់ទាញចិត្តមិត្តនារីៗឱ្យលង់ មិនតិចអ្នកទេ! កាមេរ៉ាទំហំ 12MP បំពាក់នូវសេនស័រថ្មីចុងក្រោយបំផុតដែលមានទំហំ 1.8µm ធំជាងមុន៖ អាចផលិតរូបភាព និង វីដេអូ បានច្បាស់…ម៉ដ្ឋស្អាតល្អ…ផ្ដល់នូវទឹកពណ៌ និងពន្លឺ បានដឹត..ច្បាស់ជាងមុន។

បើនិយាយពីការ selfie វិញយើងអាចថតរូបជុំគ្នាដោយមិនបាច់ប្រើ tripod មកជំនួយនោះទេ… ជាមួយ Flexcam លោកអ្នកអាចថតបានគ្រប់ទម្រង់ គ្រប់ស្ទាយបានយ៉ាងងាយស្រួល។

មិនមែនមានត្រឹមប៉ុនហ្នឹងនោះទេ…នៅមានលក្ខណៈពិសេសជាច្រើនទៀតដែលធ្វើឱ្យកំពូលស្មាតហ្វូនអេក្រង់បត់ Galaxy Z Fold4 និង Galaxy Z Flip4 អង្រួនបេះដូងអ្នកប្រើប្រាស់ស្មាតហ្វូនអេក្រង់បត់ប្រចាំសករាជថ្មីឆ្នាំ 2022 នេះ…! ចឹងសូមកុំភ្លេចរង់ចាំមើលនូវការបង្ហាញជាបន្តបន្ទាប់ទៀតណា៎..!

បន្ថែមលើសពីនេះទៀតលោកអ្នកនឹងទទួលបានកាដូភ្លាមៗរាល់ការទិញ Galaxy Z Fold4 និង Galaxy Z Flip4 ចាប់ពីថ្ងៃនេះរហូតដល់ថ្ងៃទី 31 តុលា 2022 ដែលមានដូចជា៖

– ការបង់រំលស់ជាមួយធនាគារ AEON នឹងទទួលបានការផ្ដល់ជូននូវអត្រាការប្រាក់ 0% ក្នុងរយះពេល 9ខែ

– ទទួលបានប័ណ្ណទូទាត់ដែលមានសាច់ប្រាក់ 80$ (Gift Voucher 80$) រាល់ការជាវ Galaxy Z Fold4 និងប័ណ្ណទូទាត់ដែលមានសាច់ប្រាក់ 50$ រាល់ការជាវ Galaxy Z Flip4 សម្រាប់ការទិញនាឡិកា Watch5 series

– ទទួលបានស៊ីមស្មាតលេខពិសេសជាមួយគម្រោងអ៊ីនធឺណេត 4GB រយៈពេល 12 ខែ!

– បញ្ចុះតម្លៃលើការប្តូរអេក្រង់ថ្មីរយៈពេល1ឆ្នាំ (គិតចាប់ពីថ្ងៃទិញ)

– Battery Pack ទំហំ10,000mAh

– Note package (ស្រោមទូរស័ព្ទជាមួយប៊ិច និងឆ្នាំងសាក)សម្រាប់ Galaxy Z Fold4

– Flap leather Cover ស្រោមទូរស័ព្ទស្បែកសម្រាប់ Galaxy Z Flip4

ហើយសម្រាប់អតិថិជនដែលបានធ្វើការទិញនៅ K-Mall , ChipMong SenSok, Exchaange Square, Monivong, KLDs និង សាមសុង Service Center និងទទួលបាន Protection Film បន្ថែមលើប្រូម៉ូសិនដែលមានស្រាប់នោះទៀត។

សម្រាប់ព័ត៌មានលម្អិតបន្ថែមសូមអញ្ជើញមកសាកសួរនៅតាមហាងទំនើបចែកចាយផលិតផល សាមសុង ដោយផ្ទាល់ទាំងអស់ដែលនៅជិតលោកអ្នកបំផុតទូទាំងប្រទេស ឬក៏អាចចូលទៅកាន់ Facebook: SamsungCambodia, IG: samsungcambodia, TikTok: samsungcambodia ឬក៏អាចធ្វើការទំនាក់ទំនងទៅកាន់ផ្នែកសេវាបម្រើអតិថិជន 24/7 ឥតគិតថ្លៃតាម រយៈទូរស័ព្ទលេខ៖ 1800-20 32 32!

“អ៊ីអ៊ែនអឹម កាហ្វេ និង ភោជនីយដ្ឋាន” បើកសម្ពោធជាផ្លូវការ សាខាហ្វេ្រនឆាយទី២របស់ខ្លួននៅលើផ្លូវជាតិ6A ទីប្រជុំជនស្គន់ ខេត្តកំពង់ចាម

event

bora.chhouk@gmail.com

-

September 14, 2022

0

“អ៊ីអ៊ែនអឹម កាហ្វេ និង ភោជនីយដ្ឋាន” បើកសម្ពោធជាផ្លូវការ សាខាហ្វេ្រនឆាយទី២របស់ខ្លួននៅលើផ្លូវជាតិ6A ទីប្រជុំជនស្គន់ ខេត្តកំពង់ចាម

ភ្នំពេញ៖ កាលពីព្រឹកថ្ងៃពុធ ទី០៧ ខែកញ្ញា ឆ្នាំ ២០២២ “អ៊ីអ៊ែនអឹម កាហ្វេ និង ភោជនីយដ្ឋាន” បានបើកសម្ពោធដំណើរការជាផ្លូវការនូវសាខាថ្មីរបស់ខ្លួនដែលស្ថិតនៅលើបណ្តោយផ្លូវ6A ភូមិស្គន់ ស្រុកជើងព្រៃ ខេត្តកំពង់ចាម នៅក្នុងស្ថានីយ៍ប្រេងឥណ្ធនៈតូតាល់ TotalEnergies Skun (ទីតាំង Google Map : https://goo.gl/maps/9ULevDEnZdU1DcW66)។

ស្របតាមចក្ខុវិស័យរបស់លោកស្រី ហ៊ុក ស្រីហួរ អគ្គនាយិកា និង ជាស្ថាបនិក អ៊ីអ៊ែនអឹម ការបើកអោយដំណើរការអ៊ីអ៊ែនអឹម សាខាស្គន់មិនមែនជារឿងចៃដន្យនោះទេ វាជាទិសដៅ នៃការពង្រីកសក្តានុពលរបស់ម៉ាកដែលបានគ្រោងទុក។

ហាងអ៊ីអ៊ែនអឹម សាខាស្គន់ត្រូវបានរៀបចំតុបតែងយ៉ាងស្អាតសាមញ្ញទូលាយ មានចំណតធំ ងាយចេញចូល ជាមួយជម្រើសអាហារប្រចាំហាងអ៊ីអ៊ែនអឹមយ៉ាងសំបូរបែប ដូចជាបាយ គុយទាវច្រើនជម្រើសសម្រាប់អាហារពេលព្រឹក ម្ហូបបែបអាស៊ី ម្ហូបខ្មែរ សម្រាប់អាហារថ្ងៃត្រង់ អាហារសម្រន់ និងអាហារពេលល្ងាច ជាមួយនិងភេសជ្ជៈ កាហ្វេ ទឹកផ្លែឈើស្រស់ ។ល។ ក្នុងចេតនាផ្តល់នូវផាសុខភាព ទទួលស្វាមគន៍អតិថិជនរបស់ខ្លួនដែលរស់នៅក្នុងទីប្រជុំជនស្គន់ផ្ទាល់សំរាប់ការជួបជុំពិភាក្សាការងារ ពិសារអាហារលក្ខណះក្រុមការងារ គ្រួសារ និងអតិថិជនដែលត្រូវធ្វើដំណើរឆ្លងកាត់តាមផ្លូវជាតិលេខ៦A ភ្នំពេញ កំពង់ចាម កំពង់ធំ សៀមរាបនិងបណ្តាខេត្តផ្សេងៗ ជាពិសេសក្នុងឱកាសបុណ្យភ្ជុំបិណ្ឌប្រពៃណីជាតិខ្មែរយើង។ សម្រាប់ពត៌មានលម្អិតលោកអ្នកអាចទាក់ទងទៅកាន់ក្រុមការងារអ៊ីអ៊ែនអឹម កាហ្វេ និង ភោជនីយដ្ឋានតាមរយៈ

ទូរស័ព្ទ ៖ 012 59 19 15/ 010 59 19 15

Facebook Page: E&M Coffee & Restaurant