ភ្នំពេញ៖ ក្នុងសប្តាហ៍ទី៤ នៃខែវិច្ឆិកា ភ្ញៀវទេសចរ កម្សាន្តក្នុងខេត្តព្រះសីហនុ មានចំនួន ១៨១.៥៣៩នាក់ នេះបើតាមការបញ្ជាក់ពីប្រធានមន្ទីរទេសចរណ៍ខេត្តព្រះសីហនុ លោក តាំង សុចិត្តគ្រឹស្នា ។
លោក តាំង សុចិត្តគ្រឹស្នា បានឲ្យដឹងនៅថ្ងៃទី២៧ នៃសប្តាហ៍ទី៤ ខែវិច្ឆិកា ឆ្នាំ២០២២ តាមរយៈហ្វេសប៊ុកក្រសួងទេសចរណ៍ Ministry of Tourism, Cambodia ថា ភ្ញៀវទេសចរដែលចូលទៅលេងកម្សាន្ត ក្នុងខេត្តព្រះសីហនុ មានចំនួន ១៨១.៥៣៩នាក់ ដែលចំនួននេះកើនឡើង ៩,៧៧%។ ក្នុងនោះភ្ញៀវជាតិ ១៧៦.៤៨៣នាក់ កើនឡើង ១០,១៤% និងភ្ញៀវបរទេសសរុប ៥.០៥៦នាក់ ថយចុះ ១,៩៤%។
ចំណែកភ្ញៀវចូលតាមព្រលានយន្ត ហោះចំនួន ១៤ជើង ស្មើនឹងសប្តាហ៍មុន មានភ្ញៀវសរុប ៧១០នាក់ ថយចុះ ២,៣៤% ក្នុងនោះ ភ្ញៀវជាតិ ៣៦នាក់ថយចុះ ១៤,២៩% និងភ្ញៀវអន្តរជាតិ ៦៧៤នាក់ ថយចុះ ៧,៤១%។
ដោយឡែក ភ្ញៀវទេសចរទៅកម្សាន្តតាមបណ្តាកោះនានាសរុប ១.៩៧៦នាក់ ថយចុះ ០,៥៥% ក្នុងនោះភ្ញៀវជាតិ ៨៧៤នាក់ ថយចុះ ៩,០៥% និងភ្ញៀវបរទេស ១.១០២នាក់ កើនឡើង ៧,៤១%។ រីឯភ្ញៀវតាមបណ្តាឆ្នេរ និងរមណីយដ្ឋាននានាសរុប ១៧៨.៨៥៣នាក់ កើនឡើង ៩,៩៥% ក្នុងនោះភ្ញៀវជាតិ ១៧៥.៥៧៣នាក់ កើនឡើង ១០,២៦% និង ភ្ញៀវបរទេស ៣.២៨០នាក់ ថយចុះ ៤,៧៦%៕
